Skagafjörður

Á heimasíðu KVH segir að síðustu vikuna í febrúar hafi borið til tíðinda þegar skrúfað var fyrir frostið í fyrsta og síðasta sinn síðan því var hleypt á í frystiklefunum sem KVH hefur rekið í um 100 ár. Var þessi ákvörðun tekin snemma á árinu 2023 því ekki borgaði sig að leggja í mikil fjárútlát og viðhald við að viðhalda frostinu þar sem kerfið var orðið gamalt og úrsérgengið. Er því KVH allra síðasta kaupfélagið sem hættir að bjóða upp á frystihólf til útleigu en það var þekkt í hverju einasta þéttbýli hér á árum áður. 

Á heimasíðu Holar.is segir að Hólmfríður Sveinsdóttir rektor Háskólans á Hólum og Hilmar J. Malmquist forstöðumaður Náttúruminjasafns Íslands hafi undirritað, þann 31. janúar síðastliðinn, rammasamkomulag um samstarf stofnananna um rannsóknir og miðlun á sviði náttúrufræða. Markmið samkomulagsins er að efla samstarf fræðimanna og nemenda á vegum stofnananna um rannsóknir og miðlun á fræðasviðum sínum.

Fjármála- og efnahagsráðherra hefur fyrir hönd íslenska ríkisins afhent óbyggðanefnd kröfur um þjóðlendur á svæði 12 sem nefnist „eyjar og sker“ og tekur til landsvæða innan landhelginnar en utan meginlandsins. Um er að ræða sautjánda og síðasta svæðið sem óbyggðanefnd tekur til meðferðar en það gerir kröfu í allar eyjar og sker, sem eru 105 talsins, á Norðurlandi vestra nema Málmey því það er í eigu ríkisins. 

Laugardaginn 24. febrúar síðastliðinn voru haldnar Menntabúðir fyrir björgunarsveitarfólk á Sauðárkróki. Á viðburðinn mættu sextíu manns frá alls fjórtán björgunarsveitum. Er þetta í þriðja sinn sem Menntabúðirnar eru haldnar en þetta hefur verið árlegt í febrúar síðan 2022.

Á vef Húnaþings vestra segir að á 1207. fundi byggðarráðs sem fram fór 4. mars 2024 var staðfestur samningur við menningar- og viðskiptaráðuneytið vegna tilmæla fjárlaganefndar um stuðning vegna endurbóta á Félagsheimilinu Hvammstanga.

Gærurnar, sem er hópur kvenna sem halda úti nytjamarkað á Hvammstanga, gáfu unglingunum í félagsmiðstöðinni Óríon góða gjöf er þær festu kaup á Playstation tölvu og fjarstýringum fyrir félagsmiðstöðina. Hugmyndin af kaupunum æxlaðist þannig að í vetur leitaði kjúklingaráð, hópur unglinga innan skólans, til þeirra með bréf þar sem þær voru spurðar hvort Gærurnar sæju sér fært að aðstoða krakkana með kaup á Playstation tölvu og fjarstýringum. Ekki stóð á svörum frá þeim og hafa þær komið færandi hendi með tölvuna. Fulltrúar kjúklingaráðs, nokkrir krakkar og starfsmenn Óríon tóku við þessari höfðinglegu gjöf á dögunum. Gleðin var mikil hjá unga fólkinu og þakks þau Gærunum kærlega fyrir þessa góðu gjöf.

Á heimasíðu Viðskiptablaðsins segir að Landsvirkjun hafi hagnast um 209,5 milljónir dala, eða sem nemur nærri 29 milljörðum króna, á árinu 2023, sem er um 30% aukning frá fyrra ári. Stjórn fyrirtækisins mun leggja til að greiddur verði arður til ríkisins upp á 20 milljarða króna líkt og í fyrra en Landsvirkjun birti ársuppgjörið sitt þann 29. febrúar.

Fyrsti fundur hjá Leikfélagi Sauðárkróks fyrir sæluvikuleikritið verður næstkomandi miðvikudag 6. mars kl. 20 í Leikborg, Borgarflöt 19 d.

Um árabil hafa nemendur úr Fjölbrautaskóla Norðurlands vestra tekið að sér að sjá um kvöldmessu á æskulýðsdeginum sem er þann 3. mars nk. Að þessu sinni munu Áróra Ingibjörg Birgisdóttir, Einar Ísfjörð, Ísak og Jóel Agnarssynir, Emelíana Lillý Guðbrandsdóttir og Steinunn Daníela Jóhannesdóttir syngja fagra tóna. Lydía Einarsdóttir varaformaður Nemendafélagsins mun svo flytja hugleiðingu. Verið öll hjartanlega velkomin til kirkjunnar kl. 20 á sunnudaginn.

Á huni.is segir að nokkrir stuðningsmenn knattspyrnuliðsins Kormáks/Hvatar hafa mikinn áhuga á því að liðið eignist svokallaða „Sports camera“ og hafa því efnt til söfnunar. Myndavélar þessar eru þeim eiginleikum gæddar að elta boltann sjálfkrafa og ná öllum vellinum í einu. Þeim er komið fyrir á þrífæti sem getur náð upp í sjö metra hæð og hægt er að stilla á upptöku í gegnum síma, og svo sér tæknin um rest. Að leik loknum er honum hlaðið niður og með aðstoð forrits er hægt að draga út og skoða hin ýmsu atriði og nýtist vélin þannig í faglegt starf þjálfara.