A-Húnavatnssýsla

Það verður sannkölluð tónlistarveisla á Blönduósi laugardagskvöldið 22. júlí. Dagur Sigurðsson söngvari og gítarleikari og Einar Örn Jónsson píanóleikari, verða á nýjum tónleikastað í gamla bænum, Krúttinu á Hótel Blönduósi, og flytja bestu lög tónlistarsögunnar, smelli, hittara og bangera - kraftballöður og rokkslagara - íslenskt og útlenskt.

Sameinað lið T/H/K/F (Tindastóll/Hvöt/Kormákur/Fram) í 3. flokki kvenna vann frábæran sigur í gærkvöldi þegar stelpurnar heimsóttu lið Fjölnis í Grafarvoginn reykvíska. Leikurinn fór 2-4 og það voru Skagstrendingarnir Elísa og Birgitta sem sáu um markaskorun liðsins en þær hafa sannarlega lifað fótboltadrauminn í sumar því auk þess að spila með 3. og 2. flokki T/H/K/F hafa þær verið að spila með Bestu deildar liði Tindastóls í sumar.

Stofutónleikar Heimilis-iðnaðarsafnsins fóru fram á síðasta degi Húnavöku, þann 16. júlí. Í þetta sinn var það Alexandra Chernyshova, sópran og tónskáld sem flutti fjölbreytta efnisskrá, íslensk og úkraínsk lög í bland við önnur þekkt erlend lög. Má segja að rómantíkin hafi svifið yfir þar sem lögin fjölluðu gjarnan um ástina, lífið og vonina.

Ef ferðalög er framundan í sumar er Þjónustukort Byggðastofnunar tilvalinn staður til að verða sér úti um upplýsingar um hvar fjölbreytta þjónustu er að finna á landinu öllu.

Húnahornið segir frá því að tæplega 24.500 gestir hafi heimsótt sundlaugina á Blönduósi það sem af er ári er það eru 2.300 fleiri gestir en höfðu heimsótt laugina á sama tíma í fyrra. Aukningin er því um 10% milli ára. Sundlaugargestum hefur fjölgað jafnt og þétt síðustu ár og sem dæmi má nefna þá höfðu um 15 þúsund heimsótt laugina um mitt sumar 2017 og hefur sundlaugargestum því fjölgað um 44% frá árinu 2017.

„Unglingalandsmótin eru fjölskylduhátíð þar sem alls konar íþróttir eru í fyrsta sæti. Mótin eru haldin árlega og að þessu sinni er mótið á Sauðárkróki,“ segir Ómar Bragi Stefánsson, framkvæmdastjóri Landsmóta UMFÍ, þegar Feykir forvitnast um Unglingalandsmót UMFÍ sem fram fer um verslunarmannahelgina. Ómar Bragi hefur fengið liðsstyrk en Pálína Ósk Hraundal er verkefnastjóri mótsins en þetta er í þriðja sinn sem þau vinna saman að ULM á Króknum.

Húnavökuleikurinn fór fram á Blönduósvelli í dag en þá tók lið Kormáks/Hvatar á móti Víði í Garði. Liðin eru bæði í töppbaráttunni í 3. deild en lið gestanna var í öðru sæti fyrir leik en heimamenn í fjórða sæti. Það var því mikið undir og úr varð töluverð veisla, boðið upp á fimm mörk og sem betur fer gerði lið Kormáks/Hvatar fleiri en andstæðingurinn og skaust upp í annað sæti deildarinnar. Lokatölur 3-2.

Lið Kormáks/Hvatar er nú á öðru ári sínu í 3. deild Íslandsmótsins í knattspyrnu. Lið Húnvetninga vann sér sæti í deildinni haustið 2021 og náði fínum árangri síðastliðið sumar undir stjórn Aco Pandurevic þó þunnskipaður hópur og meiðsli hafi næstum kostað liðið sætið. Aco yfirgaf Kormák/Hvöt eftir þrjá leiki og erfiða byrjun í sumar og Ingvi Rafn Ingvarsson tók við stýrinu en hann var einmitt við stjórnvölinn þegar liðið vann sér sæti í 3. deildinni.

Nú er það Pétur Arason, sveitarstjóri Húnabyggðar, sem hleypir lesendum Feykis að sínum innsta kjarna og tekst á við Rabb-a-babbið. Pétur er fæddur á því herrans ári 1970, er giftur og á þrjú börn og tvö barnabörn að auki. Hann segist búa á Blönduósi – miðju alheimsins!

Það er búið að auka öryggi á skólalóðinni á Blönduósi með því að setja nýja snyrtilega girðingu meðfram henni. Á Húnahorninu segir að girðingin afmarki nú skólalóðina frá Húnabraut og Norðurlandsvegi (þjóðvegi 1) og umlykur þannig sparkvöllinn, ærslabelginn, rampana og leiksvæðið við skólann.