Hlutfallslega langmesti niðurskurðurinn hjá HS og HÞ

Heilbrigðisstofnun Þingeyinga og Heilbrigðisstofnunin Sauðárkróki hafa verið látnar bera þyngri byrðar en aðrar heilbrigðisstofnanir í landinu í niðurskurði síðustu ára og búa íbúar við umtalsvert breytta og skerta þjónustu. Þetta er meðal niðurstaðna skýrslu sem unnin var af Capacent fyrir sveitarfélögin Norðurþing, Tjörneshrepp, Skútustaðahrepp, Þingeyjarsveit og Skagafjörð.  

Capacent skoðaði að beiðni sveitarfélaganna hvernig fjárveitingar síðustu ára skiptast á milli heilbrigðisstofnana og landsvæða m.t.t. íbúafjölda, aldurssamsetningar og vegalengda innan héraðs.

Niðurskurður fjárveitingar til HS nemur 34,1% frá 2008 og niðurskurður til HÞ nemur 34,8% frá sama ári. Í slíkri niðurstöðu virðist felast ákvörðun stjórnvalda um forgangsröðun sem byggir á framtíðarsýn um breytta uppbyggingu og fyrirkomulag heilbrigðisþjónustu. Í greinargerð með frumvarpi til fjárlaga fyrir árið 2011 mátti greina þann þráð að til stæði að efla verulega vægi heilsugæslu í dreifðum byggðum landsins og draga samhliða úr vægi sjúkradeilda á minni heilbrigðisstofnunum.

Við skoðun á fjölda hjúkrunarrýma á hverju landsvæði borið saman við reiknaða þörf samkvæmt reiknireglu velferðarráðuneytisins kemur einnig í ljós að þessi landsvæði bera verulega skertan hlut. Þó eru aldraðir (eldri en 67 ára) hlutfallslega fleiri í Skagafirði og Þingeyjarsýslum en á flestum öðrum stöðum landsins.

Það er niðurstaða skýrslunnar að í ljósi samanburðar á milli þróunar fjárveitinga og staðbundinna aðstæðna að rökstuðning vanti af hálfu ráðuneytisins fyrir miklum mun á fjölda hjúkrunarrýma eftir landsvæðum. Ekki sé að sjá að ákvarðanir um úthlutun rýma séu studdar gögnum.

Á sínum tíma voru rökin fyrir sameiningu heilsugæslustöðva og minni sjúkrahúsa úti á landi þau að mynda öflugri skipulagseiningar og samnýta mannafla milli heilsugæslu og sjúkrasviða. Þannig er í dag til staðar samspil og hagkvæmni við skipulagningu og mönnun vakta milli sjúkrasviðs og heilsugæslunnar hjá Heilbrigðisstofnuninni Sauðárkróki og Heilbrigðisstofnun Þingeyinga.

Færa má almenn rök fyrir því að með því að breyta heilbrigðisstofnunum í nokkurs konar heilsugæslusjúkrahús, eins og fram kom í greinargerð með frumvarpi til fjárlaga fyrir árið 2011, verði dregið enn frekar úr skilvirkni og hagkvæmni rekstrarins auk neikvæðra áhrifa á aðgengi að fagfólki. Þessi vilji endurspeglast berlega þegar litið er til fjárlagafrumvarps 2012 en verði niðurskurður þess að veruleika má gera ráð fyrir því að enn verði dregið úr þjónustu á heilbrigðisstofnununum og þeim sem þurfa viðkomandi þjónustu verði vísað annað, með ófyrirséðum afleiðingum.

„Niðurskurður síðustu ára hefur haft mikil áhrif á heilbrigðisþjónustu á svæðunum og ljóst að frekari niðurskurður mun kalla á erfiðar ákvarðanir um skerðingu þjónustu.  Það ósamræmi sem kemur fram í skýrslunni um þróun fjárveitinga vekur upp margar spurningar.  Það má velta því upp hvort sá gríðarlegi munur sem birtist í þróun fjárveitinga til heilbrigðisstofnana feli í sér það mat stjórnvalda að ekki sé þörf fyrir þá heilbrigðisþjónustu sem veitt hefur verið í Skagafirði og Þingeyjarsýslum á liðnum árum,“ segir  Stefán Vagn Stefánsson, formaður byggðaráðs Sveitarfélagsins Skagafjarðar.

/Fréttatikynning