Sláturtíðin gekk vel á Blönduósi
Sláturtíðin gekk vel hjá SAH Afurðum á Blönduósi en hún hófst þann 4. september sl. Búið að slátra yfir 100 þúsund fjár sem er svipaður fjöldi og í fyrra og er fallþungi lamba að meðaltali um 15,98 kíló, sem er um 360 grömmum léttari en síðasta haust, að sögn Gunnars Tryggva Halldórssonar framkvæmdastjóra fyrirtækisins.
„Við erum mjög ánægð með haustið, með þennan árangur og hvað vel hefur gengið,“ segir Gunnar í samtali við Húnahornið og bætir við að starfsfólkið, sem er að stórum hluta erlent, fari til síns heima um helgina en áætlað var að sláturtíð lyki í gær. „Oft hefur þó verið einhver slátrun eftir að sláturtíð lýkur en það getum við vel afgreitt með föstum starfsmönnum.“
Gunnar segir að vel hafi gengið að fá starfsfólk, hvort sem um sé að ræða sláturtíðarfólk eða fasta starfsmenn. „Við fengum í þessari sláturtíð yfir 90% af starfsfólki sem var hér hjá okkur í seinustu sláturtíð. Með reyndu fólki sem þekkir okkar starfsemi náum við upp fullum afköstum strax á fyrsta degi.“
Annasamt fram að jólum
Samkvæmt Gunnari er í mörg horn að líta þessa dagana þar sem stórgripaslátrun hafi verið mikil hjá sláturhúsinu síðsumars og í haust. „Folaldaslátrun hófst að krafti í byrjun september samhliða sauðfjárslátrun. Við höfum tekið um 1000 stórgripi til slátrunar nú í september og október, þar af 500 folöld. Við reiknum með að slátra 1000 folöldum til viðbótar fram að jólum. Fullorðnum hrossum og nautgripum er slátrað allt árið hér á Blönduósi. Það sem af er þessu ári höfum við slátrað rúmum 3000 stórgripum en reiknum með að sú tala verði nálægt 5000 í árslok.“
Tíminn fram að jólum annasamur hjá SAH Afurðum þar sem verkefnin eru næg. „Við reykjum um 70 tonn af hangikjöti fyrir þessi jólin auk þess sem þorramaturinn er óðum að komast í súrtunnurnar. Sviðasulta er framleidd ný í hverri viku auk annarra hefðbundinna kjötvinnsluverkefna. Við erum bara jákvæð hér á Blönduósi og fögnum því hvað veturkonungur var blíður þetta haustið,“ segir Gunnar að lokum.
Fleiri fréttir
-
Jólatréssalan á Eyrinni komin í gang
feykir.is Skagafjörður 17.12.2025 kl. 16.36Jólatréssala körfuknattleiksdeilar Tindastóls fór í gang í dag og nú er ekkert annað í stöðunni en mæta á sama gamla góða staðinn á Eyrinni, hitta fyrir eldhressa körfuboltamenn og fara heim með jólin í skottinu – enda ekkert betra en ilmurinn af lifandi tré yfir jólin.Meira -
Stelpurnar fengu KR en strákarnir Snæfell
feykir.is Skagafjörður, Íþróttir, Lokað efni 17.12.2025 kl. 16.14Dregið var í átta liða úrslit VÍS bikarsins í körfuknattleik í hádeginu í dag. Tindastóll átti lið í pottunum báðum þar sem bæði karla- og kvennalið félagsins höfðu unnið leiki sína sl. sunnudag. Stelpurnar fengu heimaleik gegn spræku liði KR og þar verður væntanlega hart barist. Leið karlaliðsins í fjögurra liða úrslit ætti að vera nokkuð örugg þar sem Stólarnir fengu útileik gegn 1. deildar liði Snæfells.Meira -
Heimismenn sjálfir í aðalhlutverki
feykir.is Skagafjörður 17.12.2025 kl. 10.25Karlakórinn Heimir heldur sína árlegu áramótatónleika í Miðgarði þann 28. desember næstkomandi. Af því tilefni hafði blaðamaður samband við Atla Gunnar Arnórsson formann kórsins, til þess að forvitnast um tónleikana og starfsemi kórsins í haust og vetur.Meira -
Jólamót Molduxa haldið enn og aftur
feykir.is Skagafjörður, Íþróttir 17.12.2025 kl. 09.47Jólamót Molduxa verður haldið samkvæmt venju annan dag jóla en mótið er í hugum margra ómissandi þáttur í jólahefð Skagfirðinga. Samkvæmt bestu vitund talnagleggstu Molduxa er þetta mót það 32. sem haldið er.Meira -
Síðasti Feykir ársins 2025 kominn úr prentun
feykir.is Skagafjörður, Austur-Húnavatnssýsla, Vestur-Húnavatnssýsla 17.12.2025 kl. 09.40Þá er kominn út síðasti Feykir ársins 2025. Svokallað jólakveðjublað enda fullt af jólakveðjum og auglýsingum og sennilega hefur þetta síðasta blað fyrir jól aldrei verið stærra, heilar 36 síður. Að sjálfsögðu er blaðið stútfullt af áhugaverðum umfjöllunum og viðtölum. Blaðið fer í drefingu í dag en er þegar opið í rafrænni áskrift.Meira
