Undirfellsrétt seinkaði um tvo daga
Um síðustu helgi fóru fyrstu göngur og réttarstörf víða fram á landinu í misgóðu veðri. Fyrri part sunnudags var veðrið til friðs en eftir hádegi fór að rigna víðast hvar á Norðurlandi. Laugardagurinn skartaði hins vegar sínu fegursta og fengu þau sem gengu þann daginn, og drógu sitt fé, kjörið veður til þeirra verka.
En smölun á heiðum hálendisins tekur heldur lengri tíma en þær sem fram fara á fjöllum nær byggð og þannig fóru smalar á Grímstunguheiðina snemma morguns þriðjudaginn 1. september og gekk smölun framar vonum fyrsta daginn.
„Í kjölfarið fór þó veður að gera þeim erfitt fyrir. Á degi tvö gerði svo mikla þoku að þeir máttu hafa sig alla við að tapa ekki áttum og komast heilir heim í skála. Þá var veðurspáin fyrir komandi sólarhring orðin með þeim hætti að ákveðið var í öryggisskyni að keyra þeim af heiðinni á meðan veðrið gengi yfir,“ segir Holger Páll Sæmundsson, sá er tók meðfylgjandi mynd. Hann er bróðir Péturs Snæs Sæmundssonar, bónda í Brekkukoti, en fjölskylda hans er sauðfjárbændur sem reka sitt fé á Grímstunguheiði. Þegar gangnamönnum var ekið aftur á heiðina á föstudagsmorgni fylgdi Holger með til að aðstoða bróður sinn, og þá gangnamenn sem honum fylgja, við að koma sér af stað og keyra bílinn til baka.
„Ég greip myndavélina með, því aðstæður voru með þeim hætti að ég taldi víst að gaman yrði að eiga heimild um þessar göngur seinna meir,“ segir hann aðspurður um myndina en þar sést hvar Karl Gústaf Davíðsson, gullsmiður og gull af manni, leggur af stað ríðandi frá Öldumóðuskála þennan morgun. „Mér þykir myndin lýsa aðstæðum ansi vel. Það var hvasst og það snjóaði, heiðin var að stórum hluta orðin alhvít og aðstæður til sauðfjárleitar því með versta móti. En sem betur fer rættist úr veðrinu eftir því sem leið á daginn og féð var komið af heiðinni um kvöldmatarleytið á laugardag. Vanalega er féð af Grímstunguheiði réttað í Undirfellsrétt á föstudegi, en veðráttan þetta árið varð til þess að réttum þurfti að fresta fram á sunnudag.“
Ljósmyndun er áhugamál hjá Holger og hafi fólk áhuga á að sjá fleiri myndir eftir hann má finna þær á Instagram síðu hans @hollogram_.
Fleiri fréttir
-
Jólatréssalan á Eyrinni komin í gang
feykir.is Skagafjörður 17.12.2025 kl. 16.36Jólatréssala körfuknattleiksdeilar Tindastóls fór í gang í dag og nú er ekkert annað í stöðunni en mæta á sama gamla góða staðinn á Eyrinni, hitta fyrir eldhressa körfuboltamenn og fara heim með jólin í skottinu – enda ekkert betra en ilmurinn af lifandi tré yfir jólin.Meira -
Stelpurnar fengu KR en strákarnir Snæfell
feykir.is Skagafjörður, Íþróttir, Lokað efni 17.12.2025 kl. 16.14Dregið var í átta liða úrslit VÍS bikarsins í körfuknattleik í hádeginu í dag. Tindastóll átti lið í pottunum báðum þar sem bæði karla- og kvennalið félagsins höfðu unnið leiki sína sl. sunnudag. Stelpurnar fengu heimaleik gegn spræku liði KR og þar verður væntanlega hart barist. Leið karlaliðsins í fjögurra liða úrslit ætti að vera nokkuð örugg þar sem Stólarnir fengu útileik gegn 1. deildar liði Snæfells.Meira -
Heimismenn sjálfir í aðalhlutverki
feykir.is Skagafjörður 17.12.2025 kl. 10.25Karlakórinn Heimir heldur sína árlegu áramótatónleika í Miðgarði þann 28. desember næstkomandi. Af því tilefni hafði blaðamaður samband við Atla Gunnar Arnórsson formann kórsins, til þess að forvitnast um tónleikana og starfsemi kórsins í haust og vetur.Meira -
Jólamót Molduxa haldið enn og aftur
feykir.is Skagafjörður, Íþróttir 17.12.2025 kl. 09.47Jólamót Molduxa verður haldið samkvæmt venju annan dag jóla en mótið er í hugum margra ómissandi þáttur í jólahefð Skagfirðinga. Samkvæmt bestu vitund talnagleggstu Molduxa er þetta mót það 32. sem haldið er.Meira -
Síðasti Feykir ársins 2025 kominn úr prentun
feykir.is Skagafjörður, Austur-Húnavatnssýsla, Vestur-Húnavatnssýsla 17.12.2025 kl. 09.40Þá er kominn út síðasti Feykir ársins 2025. Svokallað jólakveðjublað enda fullt af jólakveðjum og auglýsingum og sennilega hefur þetta síðasta blað fyrir jól aldrei verið stærra, heilar 36 síður. Að sjálfsögðu er blaðið stútfullt af áhugaverðum umfjöllunum og viðtölum. Blaðið fer í drefingu í dag en er þegar opið í rafrænni áskrift.Meira
