Fréttir

Króksarinn Kristján Gíslason er meðal bakraddasöngvara hjá Gretu Salóme þegar Ísland keppir í fyrri undanúrslitum í kvöld. Keppnin fer fram í Globen í Stokkhólmi. Kristján er að taka þátt í Eurovision í fjórða sinn, en árið 2001 flutti hann lagið Angel í keppninni. Þetta er í þriðja sinn sem hann tekur þátt sem bakraddasöngvari.

Nú í maí verður haldið áfram með eftirlitsverkefni, sem fór fyrst af stað með fyrir tveimur árum, á veitingahúsum á Norðurlandi vestra. Þetta kemur fram á heimasíðu Heilbrigðiseftirlits Norðurlands vestra.

Snekkja rússneska milljarðamæringsins Andrey Melnichenko var á ferð um Skagafjörð í gær. Snekkjan, sem ber hið látlausa nafn „A“, er 120 metrar að lengd og hönnuð af hinum heimsfræga Philippe Starck. Hún er metin á um 39 milljarða króna en Melnichenko var í fyrra talinn sá 137. á lista yfir ríkustu menn í heimi.

Vinaliðaverkefni' og verkefnið Að vera 10. bekkingur í Árskóla hafa verið tilnefnt til Foreldraverðlauna Heimilis og skóla, sem eru landssamtök foreldra. Verða verðlaunin veitt í 21. sinn við hátíðlega athöfn á morgun.

Lars Lagerback og Heimir Hallgrímsson kynntu í dag landsliðshóp Íslands sem fer á EM í Frakklandi í sumar. Í hópnum er 25 ára gamall Skagfirðingur, Rúnar Már Sigurjónsson, sem leikur með liði Sundsvall í Svíþjóð.

Húnaþing vestra og Akureyri hafa gert samkomulag við Eldvarnabandalagið um að efla eldvarnir á heimilum og í stofnunum sveitarfélaganna. Samstarfið felur í sér að sveitarfélögin innleiða eigið eldvarnaeftirlit í stofnunum sínum í haust samkvæmt leiðbeiningum, gátlistum og öðrum gögnum sem Eldvarnabandalagið hefur gefið út. Þá verður fræðslu um eldvarnir beint að umsækjendum um húsaleigubætur en rannsóknir sýna að eldvarnir eru mun lakari í leiguhúsnæði en hjá þeim sem búa í eigin húsnæði.

Flutningafyrirtækið Vörumiðlun á Sauðárkróki bauð til afmælisgleði í tilefni af 20 ára afmæli sínu á laugardaginn. Opið hús var hjá fyrirtækinu auk þess sem bílar Vörumiðlunar, um 35 tæki óku frá Blönduósi yfir Vatnsskarð og gegnum Sauðárkróki og voru svo til sýnis á útisvæði á Eyrinni.

Kvennalið Tindastóls átti magnaða endurkomu á Seltjarnarnesi í gær þar sem þær heimsóttu Gróttu og sigruðu 3-2. Í leikhléi var Grótta yfir 2-0 en gestirnir tóku leikinn yfir í síðari hálfleik og skoruðu þrjú mörk. Kolbrún Ósk Hjaltadóttir átti tvö þeirra en Snæbjört Pálsdóttir eitt.

Aðsókn hefur verið frábær á uppsetningu Leikfélags Sauðárkróks á Fullkomnu brúðkaupi eftir Robin Howdon í leikstjórn Guðbrands Ægis Ásbjörnssonar. Uppselt hefur verið á fjórar sýningar af tíu hingað til og góður rómur gerður að sýningunni. Ýmsan skemmtilegan fróðleik um sýninguna og þátttakendur má lesa á heimasíðu leikfélagsins.

Félagið Hólanes ehf. hefur uppi áform um byggingu Hótels við Fjörubraut 6 á Skagaströnd. Að sögn Adolfs H. Berndsen, stjórnarformanns í félaginu, er málið í farvegi og m.a. verið að leggja lokahönd á viðskiptaáætlun.