Fréttir

Nú hefur Veðurklúbburinn á Dalbæ tekið aftur til starfa eftir sumarfrí og segir í skeyti til fjölmiðla að nýr starfsmaður hafi tekið við stjórn klúbbsins. Þá kemur einnig fram að með nýju fólki megi búast við breytingum og nýjungum. Jákvætt er að spáð er mildum október með suðlægum áttum.

Starfsmenn leik- og grunnskóla í Austur-Húnavatnssýslu taka nú þátt í þróunarverkefninu Lærdómssamfélagið í A-Hún. sem Anna Kristín Sigurðardóttir prófessor við Menntavísindasvið Háskóla Íslands leiðir. Verkefnið er styrkt af Sprotasjóði og er markmiðið að efla faglegt samstarf, starfsþróun og gagnvirkt nám og skapa menningu sem hvetur og viðheldur stöðugu námi meðal starfsfólks leik- og grunnskóla til að efla nám nemenda.

Á þriðjudaginn var haldinn kynningarfundur fyrir komandi leiktíð í úrvalsdeildum karla og kvenna í körfubolta þar sem spár þjálfara, fyrirliða og formanna liða í úrvals- og 1. deildum karla og kvenna voru m.a. kynntar, ásamt spá fjölmiðla fyrir úrvalsdeildir karla og kvenna. Karlaliði Tindastóls er spáð 3. sæti af þjálfurum, fyrirliðum og formönnum en 5. sæti af fjölmiðlum en kvennaliðið því áttunda. Í upphafi fundar var skrifað undir samning við nýjan samstarfsaðila úrvalsdeilda og heitir nú Subway-deildin og tekur við af Dominos.

Þegar þessi pistill er í smíðum er ekki enn komin niðurstaða um það hvað á að gera í sambandi við talningaklúðrið í Norðvesturkjördæmi eftir kosningar til Alþingis. Eins og kunnugt er kom í ljós að mistök höfðu átt sér stað við talninguna með þeim afleiðingum að heilmikil hringekja fór af stað hjá uppbótarþingmönnum landsins alls. Ekki breytist fjöldi þingmanna hvers flokks heldur fengu einhverjir inni á þingi á kostnað flokksfélaga sem áður hafði hlotið kjörgengi í öðru kjördæmi.

Í ár var haldið haustþing leikskóla á Norðurlandi vestra og Strandabyggðar. Sveitarfélögin skiptast á að halda þingið og sjá skólastjórnendur í sveitarfélögunum um skipulagningu. Í ár sá Húnaþing vestra um skipulagningu og var haustþingið haldið á Hótel Laugarbakka í september.

Stór tímamót urðu sl. mánudag er lokahönd var lagt á 10. bindi Byggðasögu Skagafjarðar, sem jafnframt er það síðasta í ritröð þessa viðamikla og metnaðarfulla verkefni sem Hjalti Pálsson hefur stýrt allt frá upphafi, og bíður þess nú að verða prentað. Lokaritið fjallar m.a. um kauptúnin þrjú í austanverðum Skagafirði, Grafarós, Hofsós og Haganesvík. Reiknað er með að bókin komi úr prentun um miðjan nóvember.

Það fór sennilega ekki framhjá neinum að ansi leiðinlegt veður var á norðanverðu landinu í síðustu viku og urðu ýmsir fyrir skakkaföllum, þó aðallega inn til sveita þar sem nokkur fjöldi fjár drapst vegna ofankomunnar sem fylgdi þessu veðri.

Eins og margir vita kom nú á haustdögum upp nýtt riðutilfelli í kind í Skagafirði. Áfallið er mikið fyrir bændur á viðkomandi bæ og miðað við núverandi reglur er niðurskurður alls fjárstofnsins á bænum framundan með tilheyrandi fjárhagstjóni og andlegu álagi, en flestir sauðfjárbændur sem stunda sinn búskap af alúð tengjast dýrunum tilfinningaböndum.

Vegfarendur sem um Eyrarveginn fara á Sauðárkróki hafa getað fylgst með niðurrifi gömlu Sandbúðanna svokölluðu sem hýstu m.a. saltverkun Fisk Seafood til langs tíma en fyrirhugað er að byggja þar nýja aðstöðu fyrir fiskmarkað.

Þann 8. júlí 2020 birti Feykir frétt þess efnis að Kaupfélag Skagfirðinga hefði þegar hafið framkvæmdir við endurbyggingu húsnæðis að Aðalgötu 16b á Sauðárkróki, áður kallað Pakkhúsið en Minjahúsið síðar. Breyta átti húsnæðinu í starfsmannahúsnæði fyrir aðkomufólk sem tímabundið sækir vinnu hjá framleiðslufyrirtækjum KS. Nú hefur hluti hússins verið tekinn í notkun og komu fyrstu gestirnir í byrjun sláturtíðar að sögn Sigurgísla Kolbeinssonar hjá Trésmiðjunni Borg sem annast framkvæmdina.