Öxnadalsheiði lokuð vegna umferðaslyss
Um ellefu leytið í morgun þurfti að ræsa lögreglu, slökkviliðið og sjúkrabíl út vegna umferðaslyss á Öxnadalsheiði. Um er að ræða olíubifreið sem valt út af veginum.
Öxnadalsheiði verður lokuð fyrir umferð í óákveðinn tíma vegna umferðaslyss sem varð um ellefu leytið í morgun. Lögreglan beinir þeim tilmælum til vegfarenda að keyra um Ólafsfjörð og Siglufjörð hvort sem menn eru á suður eða norðurleið.
Ökumaður bílsins er alvarlega slasaður og var ökumaðurinn fluttur beint á sjúkrahúsið á Akureyri. Nú er verið að reyna að takmarka olíumengun eins og mögulegt er. Talsverður leki hefur komið úr bílnum segir lögreglan. Gröfur hafa verið fengnar á staðinn til að hefta að olían berist út í nær liggjandi á. Heilir 30.000 lítrar af olíu eru í bílnum.
Búast má við að vegurinn verði lokaður fram eftir degi þar sem einhverja klukkutíma muni taka að dæla olíunni af bílnum. Lögreglan á Norðurlandi vestra fer með rannsókn málsins ásamt lögreglu á Norðurlandi eystra.
Hér fyrir neðan má sjá fréttatilkynningu Lögreglunnar á Norðurlandi eystra.
Öxnadalsheiði lokuð fyrir umferð um óákveðinn tíma vegna umferðarslyss. Beinir lögreglan þeim tilmælum til vegfarenda að aka um Ólafsfjörð og Siglufjörð hvort sem menn eru á norður- eða suðurleið.
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.