Skagafjörður

Þann 13. október síðastliðinn bauð Soroptimistaklúbbur Skagafjarðar öllum stúlkum í 7. bekk grunnskólanna í Skagafirði á námskeið sem nefnist „Stelpur geta allt“ og var námskeiðið ætlað til eflingar sjálfsmyndar stúlkna. Er þetta annað árið sem klúbburinn stendur fyrir slíku námskeiði en það fyrsta var haldið í október 2017 og mæltist vel fyrir.

Guðbrandur Ægir Ásbjörnsson á Sauðárkróki varð fyrir miklum vonbrigðum er hann leit út sl. laugardag og uppgötvaði að rjúpurnar tvær sem hann veiddi daginn áður voru horfnar en þær héngu á grein í einu trénu í garðinum hjá honum. Þar sem engin ummerki voru eftir rándýr taldi hann að einhver bíræfinn þjófur hefði verið að verki sem vantaði í jólamatinn eða þá einhver paur á leiðinni heim af barnum um nóttina og fundist hann vera fyndinn.

Næstkomandi föstudag efnir Félag hrossabænda til sölusýningar í Svaðastaðahöllinni á Sauðárkróki og hefst kl. 17:00. Markmiðið er að búa til markaðsglugga og auðvelda fólki að koma hestum sínum á framfæri, segir í tilkynningu frá FHB. Bein útsending verður frá viðburðinum sem verður dreift víða á Facebook og öðrum félagsmiðlum (fhb.is) og mun efnið lifa þar inni þannig fólk getur nálgast upptökuna af sínum hesti að lokinni sýningu.

Á heimasíðu UMF Tindastóls segir að undanfarna mánuði hafi verið í gangi vinna við stofnun unglingráðs og skilgreiningu verkefna þess hjá knattspyrnudeildinni og hafa þau Írisi Ósk Elefsen og Guðmund Helga Gíslason verið fengin til starfa.

Dansverkið FUBAR verður sýnt í Bifröst á Sauðárkróki nk. fimmtudag, 1. nóvember, klukkan 18:00. Höfundur verksins og aðaldansari er Sigríður Soffía Níelsdóttir, Sigga Soffía, en verkið er unnið í samstarfi við Jónas Sen, tónskáld og gagnrýnanda, sem kemur einnig fram í verkinu sem dansari en hann dansar með Siggu Soffíu í byrjunarsenu verksins með tai chi líkum dansi auk þess að semja tónlistina og spila á flygil í verkinu.

Á haustmánuðum fékk Brynjar Páll Rögnvaldsson á Sauðárkróki styrk frá Menningarsjóði KS til útgáfu á plötu með frumsömdum lögum og textum. Hann þáði styrkinn með þökkum og fór strax í það að vinna plötuna sem nú er komin út og nefnist Leiðarvísir að lífshamingju. Binni, eins og hann er kallaður, notaði styrkinn meðal annars til kaupa á upptökugræjum og til rafræns útgefanda sem sér til þess að tónlist hans komist til skila á allar helstu streymisveitur á netinu, Sporify, Google Play, Itunes , Tidal og á fleiri staði.

Á haustþingi Samtaka sveitarfélaga á Norðurlandi vestra, SSNV, sem haldið var á Blönduósi 19. október sl.var skipuð samgöngu- og innviðanefnd í framhaldi af samþykkt 25. ársþings SSNV. Nefndinni er ætlað að vinna að upplýsingaöflun vegna samgönguáætlunar SSNV með starfsmönnum samtakanna en að því er segir á vef SSNV er „ítarleg upplýsingaöflun og greining á þáttum er varða samgöngu- og innviðamál grundvöllur þess að setja megi saman raunhæfar áætlanir um uppbyggingu samgöngumannvirkja og annarra innviða í landshlutanum.“

Annað haustþing SSNV var haldið 19. október á Blönduósi en þar var m.a. kosin ný stjórn samtakanna. Hana skipa: Þorleifur Karl Eggertsson, formaður, Húnaþingi vestra; Stefán Vagn Stefánsson, Sveitarfélaginu Skagafirði; Álfhildur Leifsdóttir, Sveitarfélaginu Skagafirði; Valdimar O. Hermannsson, Blönduósbæ og Ragnhildur Haraldsdóttir, Húnavatnshreppi.

Á fundi sveitarstjórnar Svf. Skagafjarðar í síðustu viku var þeirri ákvörðun atvinnuvega- og nýsköpunarráðuneytisins að hætta við ráðningu skrifstofustjóra á skrifstofu matvæla og landbúnaðar mótmælt.

Vel hefur gengið að undirbúa árshátíð Hestamannafélagsins Skagfirðings sem haldin verður í Melsgili 3. nóvember nk. Þetta árið var ákveðið að slá saman uppskeruhátíðinni og árshátíðinni og mun skemmtinefndin njóta aðstoðar nokkurra lands- og heimsþekktra einstaklinga. Að sögn Rósu Maríu Vésteinsdóttur er því ekki annað að vænta en að hestamenn í Skagafirði eigi eftir að skemmta sér mjög vel enda ekki þekktir fyrir annað.