Skagafjörður

Rithöfundurinn Brynja Sif Skúladóttir hefur skrifað sögur um Nikký sem nú er orðin orðin 12 ára gömul og ætlar ein til Sviss þar sem föðurfjölskylda hennar vinnur við stóran sirkus. Bókin er sjálfstætt framhald af bókinni um Nikký og slóð hvítu fjaðranna og verður eflaust spennandi kostur í jólapakkana þessi jólin. Brynja Sif rekur ættir sínar í Skagafjörðinn og segir að pabbi hennar, Skúli Br. Steinþórsson, hafi sagt að nafli alheimsins væri þar og þess vegna var hún send í sveit í Skagafjörð. Feykir fékk Brynju til að segja frá sveitinni, Nikký og sjálfri sér í Sviss.

23. jólamót Molduxa í körfubolta verður haldið á morgun, annan dag jóla, í íþróttahúsinu á Sauðárkróki. Mótið verður sett með veitingu Samfélagsviðurkenningar Molduxa kl. 10:55 og fyrstu leikir flautaðir á stundvíslega kl. 11:00. Keppt verður í einum flokki, og raðast lið saman eftir styrkleika strax að lokinni fyrstu umferð. Alls hafa 17 lið skráð sig til keppni svo það er ljóst að mikið verður að gerast. Meistaraflokkur Tindastóls sér um dómgæslu og yngri flokkar sjá um ritaraborðin.

Í dag, jóladag, verða hátíðarguðþjónustur víða í skagfirskum kirkjum. Klukkan 13:00 hefst guðþjónustan í Goðdalakirkju, organisti Thomas R. Higgerson en Ingibjörg Rós Jónsdóttir syngur einsöng. Í Hóladómkirkju hefst hún kl 14:00 og verður boðið upp á messukaffi á biskupssetrinu eftir guðsþjónustu. Í Fellskirkju verður einnig hátíðarguðsþjónusta kl 14 í dag, jóladag.

Feykir óskar landsmönnum öllum, til sjávar og sveita, gleðilegra jóla og farsældar á ári komanda með þökk fyrir samfylgdina á árinu sem er að líða.

Eins og undanfarin ár stendur Feykir fyrir kjöri á manni ársins. Gefst íbúum á svæðinu og öðrum lesendum Feykis kostur á að velja úr hópi þeirra sem tilnefndir voru af lesendum. Í þetta skiptið bárust sjö tilnefningar. Hægt verður að greiða atkvæði á vefnum Feyki.is eða senda atkvæði í pósti á Feykir, Borgarflöt 1, 550 Sauðárkróki. Kosningin hófst kl. 13 föstudaginn, 23. desember og lýkur kl. 12 á hádegi á nýársdag, 1. janúar.

Í dag klukkan 18:00 verður aftansöngur í Sauðárkrókskirkju, Edda Borg Stefánsdóttir mun syngja einsöng. Hún mun einnig sjá um einsöng í miðnæturmessu í sömu kirkju klukkan 23:30 í kvöld. Þá verður hátíðarmessa í Glaumbæjarkirkju kl 2130 og Víðimýrarkirkju kl: 23:00.

Lokið var við að tengja bæinn Víkur á Skaga við veiturafmagn í gær en þar með hefur dísilrafstöðin á bænum lokið hlutverki sínu. Lagður var háspennujarðstrengur frá Höfnum í Skagabyggð að Hrauni í Skagafirði, tæpa 15 kílómetra leið, auk ljósleiðara.

Sýslumaðurinn á Norðurlandi vestra og innanríkisráðuneytið hafa gert með sér árangursstjórnunarsamning og er tilgangur hans að festa í sessi ákveðið samskiptaferli milli aðila. Þá á samningurinn að skerpa áherslur um stefnumótun, framkvæmd verkefna, áætlanagerð og leggja grunn að mati á árangri af starfsemi embættisins. Húnahornið greinir frá þessu.

Síðast liðið vor fékk Feykir styrk úr Uppbyggingarsjóði til framleiðslu á dægurmálaþáttum. Ákveðið var að verja honum til að gera annars vegar þátt sem sýndi svipmyndir úr Sæluviku Skagfirðinga annars vegar og hins vegar til að framleiða jólaþátt í samstarfi við nemendur í kvikmyndagerð við FNV.

Hin árlega hátíð ljóss og friðar er handan við hornið. Ég sit í stofunni minni heima á Sauðárkrók með flöktandi kertaljós í vetrarmyrkrinu, úti bylur veðrið á gluggunum og snjórinn hylur götuna. Á þessum tíma hafa forfeður okkar haldið upp á jól langt aftur í aldir, allt frá því að heiðnir menn héldu sína jólahátíð til að fagna vetrarsólstöðum og eftir að Íslendingar tóku kristna trú og fögnuðu fæðingu frelsarans. Margt hefur breyst í tímanna rás en þó hafa ákveðin atriði haldið velli í jólahaldi en það eru gleði, vinátta og kærleikur.