Skagafjörður

Einar Mikael töframaður ætlar að vera með sýningu á Mælifelli í næstu viku. Sagðist hann hlakka mikið til að koma og gleðja fjölskyldur á Króknum. Hann segir sýninguna vera troðfulla af flottum sjónhverfingum og nýjum atriðum sem hafa aldrei sést áður á Íslandi.

Á mánudaginn heimsóttu 40 nemendur úr 8. bekkjum Árskóla á Sauðárkróki Verið Vísindagarða. Stöldruðu þau við í þrjár klukkustundir og drukku í sig margvíslegan fróðleik um fjölbreytileika í vistkerfum sjávar og ferskvatns, eins og sagt er frá á vef Háskólans á Hólum.

Stjórn Bændasamtaka Íslands skipaði á fundi þann 20. apríl síðastliðinn nýja stjórn RML en stjórnin hefur að mestu leyti verið óbreytt frá stofnun fyrirtækisins. Fyrirkomulagi varafulltrúa í stjórn var einnig breytt en fram til þessa hafa verið varamenn fyrir hvern og einn stjórnarmann. Nú verður því háttað þannig að varamenn verða tveir, 1. og 2. varamaður.

Í fyrradag var stór stund hjá hinu nýstofnaða hestamannafélagi Skagfirðingi. Formaður þess, Guðmundur Sveinsson, og sveitarstjóri Skagafjarðar, Ásta Pálmadóttir, undirrituðu samning um uppbyggingu og viðhald reiðvega í sveitarfélaginu.

Aðalfundur Beint frá býli, félags heimavinnsluaðila fór fram 16. apríl sl. að Hraunsnefi í Borgarbyggð. Í upphafi fundar flutti gestur fundarins, Elfa Björk Sævarsdóttir frá Rauðabergi á Mýrum, stutt erindi um hugmynd sem hún er með og gengur út á að veita faglega aðstoð við uppsetningu á gæðakerfi í heimavinnslum. Elfa er matvælafræðingur að mennt og hefur unnið hjá Actavis síðustu 18 ár við gæðastjórnun.

Karlatölt Norðurlands fór fram á Hvammstanga á laugardaginn. „Var það samróma álit allra að mótið hefði verið hið glæsilegasta og sé algjörlega komið til þess að vera um ókomna tíð,“ segir á heimasíðu Hestamannafélagsins Þyts.

Kirkjukvöld í Sauðárkrókskirkju er árviss viðburður í Sæluviku Skagfirðinga og verður það í Sauðárkrókskirkju í kvöld, mánudagskvöldið 25. apríl kl. 20. Að vanda verður boðið upp á song, hljóðfæraleik og ræðuhöld.

Sæluvika Skagfirðinga var sett í blíðaskaparveðri í gær en athöfnin fór fram í Safnahúsinu á Sauðárkróki. Þá var opnuð glæsileg myndlistarsýning Hallrúnar Ásgrímsdóttur, tilkynnt úrslit í Vísnakeppni Safnahúss Skagfirðinga og opinberað hver hlyti fyrstu Samfélagsverðlaun Sveitarfélagsins Skagafjarðar, sem afhent verða í Sæluviku ár hvert framvegis. Nemendur úr Tónlistarskóla Skagafjarðar léku nokkur lög á milli ávarpa.

Farskólinn hyggst bjóða upp á Matarsmiðju, námskeið í meðhöndlun matvæla með áherslu á kjötafurðir og vinnslu beint frá býli. Nemandi sem lýkur matarsmiðju hefur öðlast grunnfærni, leikni og öryggi í vinnubrögðum til að hann geti unnið að vöruþróun úr eigin afurðum í samræmi við lög og reglur.

Sæluvika Skagfirðinga, lista- og menningarhátíð, hefst um helgina. Í Sæluviku verður boðið upp á fjölbreytta menningardagskrá víðs vegar um fjörðinn. Sæluvika Skagfirðinga er ein elsta menningarhátíð landsins og nær saga hennar allt aftur til ársins 1874 þegar svonefndar sýslunefndarvikur hófu göngu sína.