V-Húnavatnssýsla

Rekstrarniðurstaða aðalsjóðs Húnaþings vestra var jákvæður um 60,3 milljónir á síðasta ári, en áætlanir gerðu ráð fyrir 200 þúsund króna neikvæðum rekstri. Niðurstaða samstæðu A og B hluta var jákvæð um 82,3 milljónir en hafði verið áætluð jákvæð um 4,3 milljónir. Í fundargerði sveitarstjórnar frá 12. maí sl. kemur fram að sveitarstjórn sé afar ánægð með niðurstöðuna.

Uppbygging á 2300 leiguíbúðum er rétt handan við hornið en önnur umræða um frumvarp um almennar félagsíbúðir fór fram á Alþingi í vikunni. Þessi mikilvæga uppbygging er því rétt handan við hornið. Þetta er ein sú mesta uppbygging sem verið hefur á leigumarkaði frá árinu 1965 eða þegar Breiðholtið var byggt. Nú er tekið stórt skref til framtíðar með gríðarlegri uppbyggingu og stöðugleika á leigumarkaði. Hér er um að ræða uppbyggingu á kerfi þar sem stuðlað er að félagslegri blöndun íbúanna.

Gunnar Bragi Sveinsson, landbúnaðar-, sjávarútvegs- og byggðamálaráðherra, hyggst láta skoða hvernig beita megi skattkerfinu á því hvernig beita megi skattkerfinu við að styrkja byggðir landsins.

Flutningafyrirtækið Vörumiðlun á Sauðárkróki bauð til afmælisgleði í tilefni af 20 ára afmæli sínu um síðustu helgi. Opið hús var hjá fyrirtækinu auk þess sem bílar Vörumiðlunar, um 35 tæki óku frá Blönduósi yfir Vatnsskarð um Varmahlíð og Sauðárkrók og voru svo til sýnis á útisvæði á Eyrinni.

Mikill áhugi er á bókinni Forystufé eftir Ásgeir Jónsson frá Gottorp sem endurútgefin verður síðsumars, að sögn Bjarna Harðarsonar hjá bókaútgáfunni Sæmundi. „Texti bókarinnar er algjört konfekt og sögur Ásgeirs lifna við. Stundum finnst mér eins og hann sé að lýsa sögupersónum Íslendingasagnanna,“ segir Bjarni.

Ung kona frá Hvammstanga, Hildur Valsdóttir hefur dvalið í Ekvador síðan í janúar á þessu ári. Hún var stödd þar ytra þegar jarðskjálfti af stærðinni 7,8 reið þar yfir í apríl. Síðan hefur hún haldið úti söfnun fyrir fjölskyldur á svæðinu. Feykir hafði samband við Hildi og spurðist fyrir um starf hennar þar.

Nýtt hótel, Hótel Laugarbakki, verður opnað þann 17.maí á Laugarbakka í Miðfirði í húsnæði sem áður hýsti grunnskóla héraðsins á veturna en Edduhótel á sumrin. Eigendur hótelsins eru hjónin Hildur Ýr Arnarsdóttir danskennari og ferðamálafræðingur og Örn Arnarson iðnrekstrarfræðingur.

Í sumar verður boðið upp á rokkbúðir fyrir stelpur og konur á Akureyri. Verkefnið er 5 ára í ár og búðirnar á Akureyri eru styrktar af Sóknaráætlun Norðurlands vestra og Akureyrarstofu.

Nú í maí verður haldið áfram með eftirlitsverkefni, sem fór fyrst af stað með fyrir tveimur árum, á veitingahúsum á Norðurlandi vestra. Þetta kemur fram á heimasíðu Heilbrigðiseftirlits Norðurlands vestra.

Húnaþing vestra og Akureyri hafa gert samkomulag við Eldvarnabandalagið um að efla eldvarnir á heimilum og í stofnunum sveitarfélaganna. Samstarfið felur í sér að sveitarfélögin innleiða eigið eldvarnaeftirlit í stofnunum sínum í haust samkvæmt leiðbeiningum, gátlistum og öðrum gögnum sem Eldvarnabandalagið hefur gefið út. Þá verður fræðslu um eldvarnir beint að umsækjendum um húsaleigubætur en rannsóknir sýna að eldvarnir eru mun lakari í leiguhúsnæði en hjá þeim sem búa í eigin húsnæði.