Fréttir

Það er líf og fjör í framboðsmálum á Skagaströnd. Feykir hefur þegar sagt frá tveimur framboðum; Samfylking og óháðir og Fyrir Skagaströnd, og nú bætist við framboðslisti Framsóknar og óháðra. Það er Eydís Inga Sigurjónsdóttir hjúkrunardeildarstjóri sem fer fyrir listanum en í öðru sæti er Guðlaugur Siggi Hannesson viðskiptalögfræðingur.

Söngkeppni framhaldsskólanna verður haldin í Háskólabíói á laugardaginn 11. apríl. 25 skólar taka þátt í keppninni í ár. Fulltrúi FNV. verður Lára Sigurðardóttir frá Sauðárkróki.

Lið ÍR og Tindastóls mættust í Skógarselinu í gærkvöldi í öðrum leik liðanna í úrslitakeppni Bónus deildar karla. Stólarnir höfðu unnið fyrsta leikinn hér heima sem var jafn og spennandi. Í gærkvöldi tóku okkar menn völdin í öðrum leikhluta og leiddu lengstum með 10-15 stigum. Heimamenn náðu smá skorpu undir lok leiksins en þó aldrei svo að það færi um stuðningsmenn Stólanna. Lokatölur 90-98 og staða Tindastóls orðin góð í einvíginu.

Um næstu helgi, sem jafnframt markar upphaf Sæluviku, verður þess minnst í Safnahúsi Skagfirðinga að þann 18. apríl verða liðin 100 ár frá fæðingu Indriða G. Þorsteinssonar. Verður boðið upp á ferð um æsku- og sagnaslóðir skáldsins. Einnig verður haldið málþing og sýning í Safnahúsinu og kvikmyndin Land og synir sýnd í Bifröst.

Í gærkvöldi var D listi sjálfstæðismanna og óháðra í Húnaþingi vestra samþykktur. Nýr oddviti leiðir listann því efsta sætið skipar Örn Arnarson frá Laugarbakka sem tekur við af Magnúsi Magnússyni sem færir sig í þriðja sætið. Sigríður Ólafsdóttir í Víðidalstungu skipar eftir sem áður annað sæti listans.

Slagarasveitin húnvetnska heldur tónleika á Sjávarborg á Hvammstanga föstudaginn 10. apríl og á Teni á Blönduósi laugardaginn 11. apríl. Báðir tónleikarnir hefjast kl. 21:15 og standa yfir í tæpa klukkustund. Á tónleikunum flytur sveitin nokkur af sínum frumsömdu lögum á lágstemmdum nótum.

Fyrir Skagaströnd er nýtt framboð á Skagaströnd sem mun bjóða fram í sveitarstjórnarkosningunum í vor. Í tilkynningu frá framboðinu, sem birt var á Húnahorninu, segir að um fjölbreyttan hóp fólks sé að ræða sem sameinast um eitt markmið: „Láta gott af okkur leiða og styrkja okkar góða samfélag. Með ólíkan bakgrunn, reynslu og hugmyndir viljum við vinna saman fyrir bæinn okkar.“

Lögreglan á Norðurlandi vestra vekur athygli á lokun vegar frá Sauðárkróksbraut að Norðurlandsvegi að austanverðu í Skagafirði vegna vatnavaxta. Vegagerðin er við vinnu á vettvangi.

Samfylkingin og óháðir munu bjóða fram í komandi sveitarstjórnarkosningum á Skagaströnd. Í frétt á Húnahorninu segir að hér sé um nýtt framboð að ræða sem leitt er af Ragnheiði Erlu Stefánsdóttur lögfræðingi og annað sætið skipar Davíð Birkir Tryggvason lögfræðingur.

Uppáhalds íslenski Mexíkói Feykis, Andri Már Sigurðsson, og félagar hans í hljómsveitinni Andri&FarmerJohn sendu á dögunum frá sér nýtt lag, The Raindog Lounge. „Lagið fjallar um ferðir mínar til San Miguel de Allende sem er borg full af túristum og ellilífeyrisþegum sem koma víðsvegar að úr heiminum,“ sagði Andri í stuttu spjalli við Feyki.