Fréttir

Fimmta mót sumarmótaraðar Pílukastfélags Skagafjarðar fer fram fimmtudaginn 13. ágúst næstkomandi. Að þessu sinni verður spilað 1001 SISO, þar sem keppendur keppast um að komast fyrst úr 1001 niður í 0. Þetta keppnisform hentar óreyndum sérstaklega vel þar sem nota má hvaða reit sem er á spjaldinu til að klára legginn.

Króksmótið var haldið á Sauðárkróki um síðastliðna helgi og heppnaðist frábærlega. Þrátt fyrir leiðindaveður skemmtu allir sér vel, enda iðaði mótssvæðið af lífi og fótboltafjöri. Tæplega 90 lið, eða um 500 krakkar mættu til leiks og komu þau alls staðar að af landinu. Mikil barátta og leikgleði var á öllum völlum frá upphafi til enda.

Eins og komið hefur fram eru hinsegin dagar í Skagafirði í gangi þessa viku og líkur á sunnudaginn. Sjá má hinsegin fána og flögg víða um fjörðinn.

Sveitafélagið Skagafjörður tilkynnti fyrr í dag, mánudaginn 10. ágúst, að fræðslunefnd og sveitarstjórn hafa samþykkt breytingar á reglum um leikskólastarf í sveitarfélaginu og taka þær gildi frá og með deginum í dag. Breytingarnar koma til vegna vaxandi óánægju á meðal foreldra/forráðamanna og starfsfólks skólans með fyrirkomulag skráningardaga og gjaldskrá. Um er að ræða aðgerðir sem innleiddar voru árið 2024 til þess að bregðast við áskorunum í starfsmannahaldi og sporna við neikvæðum áhrifum á faglegt starf og starfsþróun leikskólanna.

Kormákur/Hvöt tók á móti Þrótti úr Vogum í gær, sunnudaginn 9. ágúst. Lítið var um tilþrif í leiknum en heimamenn höfðu á endanum 2-0 sigur og tryggðu sér mikilvæg þrjú stig, þótt þeir sitji enn sem fastast í fimmta sæti 2. deildar.

Nú á dögunum fékk Bárður SH-81 frá Skagaströnd bátsflak í veiðarfærin. Þarna var á ferð Frami HU-25 [5997]. Báturinn var smíðaður í Hafnarfirði úr furu og eik 1979, 2,4 brl. með 23 ha. Volvo Penta vél.

Víða á túnum meðfram þjóðvegum landsins má sjá uppstilltar heyrúllur með skilaboðum um verðandi kosningar um aðildarviðræður að ESB. Eitthvað ber á að reynt sé að eiga við boðskapinn eftir á og er það auðvitað ekki lögum samkvæmt heimilt að fara leyfislaust inn á eignarlönd annarra. Erla Jónsdóttir á Skagaströnd segir svo frá á facebook síðu sinni:

Áhangendur nýs menningarhúss á Sauðárkróki hafa lengi beðið eftir að sjá einhverja framkvæmdahreyfingu á Flæðunum og nú virðast draumar þeirra vera að rætast. Þórður Hansen mætti með tæki og tól og hóf jarðvegsframkvæmdir vegna menningarhúss nú fyrir helgina og sagði Magnús Barðdal sveitarstjóri það vera virkilega ánægjulegt að sjá að loksins sé farið að vinna á svæðinu, þegar Feykir spurði hann út í málið.

Um 90 lið keppa nú á Króksmótinu á Sauðárkróki og mikil stemning verður á Króknum um helgina. Mótinu er ætlað drengjum í 6. og 7. flokki en einnig verður haldið fótboltafjör fyrir yngri systkini. Mótið hófst í gær, föstudaginn 7. ágúst og því lýkur á morgun, sunnudaginn 9. ágúst.

Í gær, föstudaginn 7. ágúst, fór fram toppslagur í 3. deild karla þar sem Reynir Sandgerði tók á móti liði Tindastóls. Leikurinn endaði 5-0 fyrir heimamenn og fleytti sigurinn Reynismönnum á topp deildarinnar en Stólunum í annað sætið. Tindastólsliðið frumsýndi jafnframt nýjan leikmann í leiknum.