Fréttir

Í lok ágúst stóð Héraðsbókasafn Skagfirðinga fyrir viðburðinum Sumarlestrarlok sem var endapunktur á lestraráskorun sumarsins. Sumarlesturinn er sameiginlegt átak miðstöðvar menntunar og skólaþjónustu og almenningsbókasafna um allt land. Að þessu sinni bar sumarlesturinn yfirskriftina Lestrarsprettur Gúnda geithafurs.

Á dögunum náðist sá merki áfangi að lagningu ljósleiðara í Húnaþingi vestra lauk með síðustu tengingunum í elsta hluta Hvammstanga. Var verkefnið seinni hluti átaks um lok ljósleiðaravæðingu landsins fyrir árslok 2026 sem samið var um haustið 2024. Þegar það samkomulag var gert hafði lengi ríkt óvissa um hvort og þá hvenær yrði unnt að tengja lögheimili í þéttbýli um land allt við háhraðanet. Áður hafði verið lokið við lagningu ljósleiðara í dreifbýli með styrkjum frá Fjarskiptasjóði.

Sigurbjörn Darri Pétursson býr í Brennihlíðinni á Króknum, er 14 ára gamall og gengur í Árskóla. Hann er íþróttagarpur Feykis að þessu sinni en þrátt fyrir ungan aldur er hann bæði búinn að leggja fótboltaskóna og pílurnar á hilluna – að minnsta kosti í bili. Hann er hins vegar á fullu í golfi og körfubolta og íþróttafélögin hans eru Golfklúbbur Skagafjarðar og Umf. Tindastóll.

Fimmtudaginn 10. september stóð Vegagerðin fyrir upplýsingafundi vegna fyrirhugaðra framkvæmda við Vatnsnesveg. Fundurinn var haldinn á Hótel Hvítserk í Vesturhópi og í frétt á vef Húnaþings vestra segir að á sjöunda tug gesta hafi sótt fundinn.

Það styttist í að sumarvertíðinni í fótboltanum ljúki. Leikir yngri flokka eru nánast óteljandi og sannarlega mikil breyting og annað landslag en var á síðustu öld. Feykir ákvað að forvitnast um hvernig hefur gengið og eitt og annað er við kemur barna- og unglingastarfinu í boltanum. Í unglingaflokkunum er um að ræða samstarf liðanna á Norðurlandi vestra og er það Tindastóll sem leiðir samstarfið og fara allir heimaleikir fram á Króknum.

Þegar þessi Feykir mælir með þáttur birtist þá var sumar (var í tbl. 20 sem kom út í lok maí) og stutt í Þjóðhátíðardaginn en nú er komið haust og við ætlum að kalla þetta hausttertur í staðinn. Það er jafn mikið tilefni að hræra í eina tertu nú eins og þá. Þegar ég fór á stúfana í maí þá fann ég þessa girnilegu marengstertu á gotterí og gersemar þar sem nýja Bíó kroppið frá Nóa Siríus var notað í uppskriftina. Seinni tertan er frá Alberteldar.is og er rommkúluterta sem Álfhildur Jónsdóttir frá Ísafirði á heiðurinn af. Nú er bara að setja á sig svuntuna og skella í tertu. - Njótið

Það voru ekki bara Tindastólsmenn sem spiluðu í dag í fótboltanum því hin meistaraflokksliðin á Norðurlandi vestra spiluðu sína síðustu leiki í Íslandsmótum sumarsins. Á Blönduósi lutu heimamenn í gras gegn Grafarvogspiltum og í Hafnarfirði var það Sara Dögg Gunnarsdóttir sem stjórnaði aðgerðum þegar lið Hauka vann nokkuð öruggan 14-0 sigur gegn Stólastúlkum.

Það var mikið undir á Sauðárkróksvelli í dag þegar lið Tindastóls tók á móti deildarmeisturum Víðis í lokaumferðinni. Stólarnir urðu að vinn leikinn til að eiga séns á að komast upp í 2. deild en þurftu að treysta á að grannarnir í KF næðu að halda aftur af liði KH. Leikurinn var hinn fjörugasti og liðin skoruðu samtals átta mörk og lokatölur 4-4. Lið KH náði hins vegar í sigur á Ólafsfirði og því hefði sigur Stóla ekki komið að gagni. Það blasir því við enn eitt ár í 3. deildinni.

Gul messa verður haldin í Blönduóskirkju sunnudaginn 13. september og hefst klukkan 18:00. Í Gulum september er lögð áhersla á að auka meðvitund fólks um mikilvægi geðræktar og sjálfsvígsforvarna, með kærleika, aðgát og umhyggju að leiðarljósi.

Það gengur norðaustan strengur yfir landið og honum fylgdi nokkur kuldi og úrkoma og það þýddi að víða til fjalla snjóaði. Aðstæður á fjallvegum hér norðanlands voru því ekki upp á það besta og víða var hálka eða hálkublettir á fjallvegum. Þannig mátti sjá á umferd.is að það voru hálkublettir á Þverárfjallsvegi fram yfir hádegi í dag en nú eru allir vegir greiðfærir.