A-Húnavatnssýsla

Sjávarlíftæknisetrið BioPol á Skagaströnd fékk nýverið tæplega þrigga milljón króna styrk frá Matvælasjóði til verkefnis sem kallast SeaTofu og snýst um að kanna fýsileika, greina og útfæra hugmynd tengdri íslenskri matvælaframleiðslu. Alls hlutu 40 verkefni styrk að þessu sinni en 129 umsóknir upp á rúmlega tvo milljarða bárust til sjóðsins.

Enginn lax kom á land í opnun Blöndu í gær en aðstæður fyrir veiðimenn voru erfiðar, rok, úrkoma og skítakuldi. Í frétt Húnahornsins segir að auk þess hafi áin verið vatnsmikil og lituð því sökum úrkomu hefur vatnsmagn í lækjum margfaldast. Opnanir í Blöndu hafa ekki gefið mikið af sér síðustu ár og á því varð ekki breyting að þessu sinni.

Nú á dögunum úthlutaði stjórn Fiskeldissjóðs rúmlega 465 milljónum króna til 15 verkefna í sjö fiskeldissveitarfélögum. Sjóðnum er ætlað að veita sveitarfélögum styrki til uppbyggingar innviða þar sem fiskeldi í sjókvíum er stundað, og styrkja þar með samfélög og stoðir atvinnulífs á þeim svæðum.

Nú hefur skólum fjórðungsins verið slitið einum af öðrum og þeir útskrifað nemendur sem hafa nú lokið sínum bekk og sumir jafnvel að ljúka grunnskólagöngunni og við taka ævintýri sumarsins með tilheyrandi skort á rútínu og vonandi góðu veðri.

Fimm leikir voru spilaðir í 2. deild karla í knattspyrnu í gærkvöldi. Á Blönduósvelli tóku leikmenn Kormáks/Hvatar á móti grönnum sínum í Dalvík/Reyni sem löngum hafa reynst ansi seigir. Gestirnir komust yfir snemma leiks og heimamenn, sem með sigri hefðu komið sér laglega fyrir í toppbaráttu deildarinnar, náðu ekki að koma boltanum í mark Eyfirðinga og máttu því þola súrt tap á heimavelli. Lokatölur 0-1.

Heldur hefur lengst í gulu veðurviðvöruninn sem Veðurstofan skellti á Norðurland vestra í byrjun vikunnar. Fyrst átti hún að standa í um sólarhring, frá mánudegi til þriðjudags en nú þegar fimmtudagurinn rennur upp rennblautur og norðanbarinn þá er enn gul viðvörun og ekki útlit fyrir að henni verði aflétt fyrr en aðfaranótt föstudags.

Snjórinn hefur víða gert bændum skráveifu síðustu daga líkt og Feykir hefur greint frá. Karólína í Hvammshlíð sendi okkur línu nú síðdegis og sagði stöðuna hjá sér þannig að hitinn væri rétt um frostmark og úrkoman sem til stóð að félli sem rigning, samkvæmt veðurspánni, er 100% snjór. Hún segist þó vera í góðum málum sem betur fer.

Það er enn rok og rigning í boði á Norðurlandi vestra en spár Veðurstofunnar gera ráð fyrir því að heldur dragi úr vætu og vindi þegar líður á daginn. Eitthvað örlítið hafa hitatölur þokast upp á við og því fellur úrkoman að mestu sem rigning en ekki snjór. Þó veðrið sé heldur að ganga niður gera spár ráð fyrir norðanátt og kulda svo langt sem spáin nær en þó er líklegt að við fáum svolitla sólargeisla á föstudaginn.

Skólaslit voru við Höfðaskóla á Skagaströnd sl. miðvikudag og við sama tækifæri voru nemendur 10. bekkjar útskrifaðir úr skólanum. „Við óskum ykkur öllum góðs sumarfrís og minnum á muna að vera dugleg að spyrja eftir bekkjarfélögum, leika saman, taka alla með í hópinn og vera góð og kurteis við alla,“ segir í færslu á vef skólans um leið og nemendum og forsjáraðilum er þakkað fyrir góða samveru á skólaárinu.

Óveðrið kemur víða við í dag. Hjá Jóni Kristófer bónda á Hæli á Ásum í A-Hún. leitaði þessi góða kind skjóls undir rababarabeði.