A-Húnavatnssýsla

Matvælastofnun vekur athygli á að stofnunin óskar eftir tilkynningum ef villtir dauðir fuglar finnast, nema augljóst sé að þeir hafi drepist af slysförum. Tilgangurinn er að skima þá fyrir fuglaflensu og fylgjast þannig með mögulegri útbreiðslu hennar meðal farfugla hérlendis.

Sæþór Már Hinriksson hefur verið ráðinn blaðamaður á Feyki í sumarafleysingar og hóf störf í gær. Sæþór segist alltaf hafa verið opinn fyrir því að prófa nýja hluti en hann hafði aldrei prófað að vera blaðamaður og fannst því vera kominn tími á það. „Ég hef líka alltaf haft gaman af því að tala við fólk, eða að minnsta kosti gasa um ýmsa hluti og ekki skemmir fyrir að ég hef líka mikinn áhuga á fólki, allskonar fólki. Ég hef mikinn áhuga á okkar nærsamfélagi og reyni að setja mig inn í helstu hluti og málefni sem snerta það, og hef því að taka þátt í því með Feyki að vera spegill á samfélagið,“ segir hann.

Textílmiðstöð Íslands á Blönduósi stendur fyrir tveimur viðburðum tengdum HönnunarMars 2021. Annars vegar afhending verðlauna í Ullarþoni, hugmynda- og nýsköpunarkeppni sem haldin var í samstarfi við Nýsköpunarmiðstöð Íslands og hins vegar formleg opnun TextílLabs á Blönduósi. Í tilkynningu frá Textílmiðstöðinni kemur fram að verðlaun í Ullarþoni verða afhend af hr. Guðna Th. Jóhannessyni forseta Íslands nk. fimmtudag, 20. maí kl. 17 á svæði Textílfélagsins á Hafnartorgi, Kolagötu 2.

Eyrarrósin, viðurkenning fyrir framúrskarandi menningarverkefni utan höfuðborgarsvæðisins, var afhent í sautjánda sinn sunnudaginn 16. maí, við hátíðlega athöfn á Patreksfirði. Frú Eliza Reid forsetafrú og verndari Eyrarrósarinnar veitti verðlaunin. Handbendi brúðuleikhús á Hvammstanga hlaut viðurkenninguna að þessu sinni og er það í fyrsta sinn sem Eyrarrósin fellur í skaut verkefnis á Norðurlandi vestra. Greta Clough, stofnandi og listrænn stjórnandi Handbendis tók á móti viðurkenningunni og verðlaunafé að upphæð kr. 2.500.000. Viðurkenningunni fylgir að auki boð um að standa á viðburði á Listahátíð 2022 og framleitt verður vandað heimildamyndband um verkefnið.

Skúnaskrall – barnamenningarhátíð verður haldin í fyrsta sinn víðs vegar á Norðurlandi vestra frá 14. til 24. október 2021. Ýmis námskeið, vinnustofur og listviðburðir munu prýða dagskrá hátíðarinnar. Á heimasíðu Skúnaskralls segir að áhersla sé lögð á fjölbreytni í dagskrá og gott aðgengi. Meginreglan er að aðgangur sé ókeypis og veiti því öllum börnum og ungmennum á Norðurlandi vestra tækifæri til að upplifa og vinna að fjölbreytileika listsköpunar.

Lokamót meistaradeildar KS fór fram föstudagskvöldið 7. Maí síðastliðið í reiðhöllinni á Sauðárkróki, en keppt var að þessu sinni tölti og flugskeiði. Í töltkeppninni var það Bjarni Jónasson sem stóð uppi sem sigurvegari, en í skeiðinu fór Jóhann Magnússon hraðast allra. Mette Manseth stóð uppi sem einstaklings sigurvegari heildarkeppninnar og lið Íbishóls sigraði liðakeppnina.

Körfuboltabúðir Tindastóls verða haldnar dagana 9.-13. ágúst 2021 á Sauðárkróki. Búðirnar eru ætlaðar stelpum og strákum sem eru fædd árin 2005 til 2009. Á næstu dögum munu þjálfaranir sem verða í búðunum verða kynntir til leiks.Stefnt var að því að halda samskonar körfuboltabúðir í fyrra og var aðsókn framar vonum ... en að sjálfsögðu þurfti að fresta búðunum vegna Covid. Nú skal reynt á ný og hlakkar körfuboltafólk á Króknum til að sjá unga og spræka iðkendur mæta til leiks í ágúst.

Lið Kormáks Hvatar spilaði í gær sinn fyrsta leik í 4. deildinni í sumar en þá heimsóttu Húnvetningar lið Léttra í Breiðholtinu. Léttir er b-lið ÍR en þeir voru léttir á því í gær og lögðu gestina í leik sem endaði 3-2. Ekki byrjunin sem Ingvi Rafn þjálfari KH hafði óskað sér en það er nóg eftir af mótinu og tími til að hala inn stig.

Á fundi aðgerðastjórnar almannavarna á Norðurlandi vestra fyrr í dag, var tekin sú ákvörðun að óska ekki eftir því við heilbrigðisráðuneytið að framlengd verði sú reglugerð sem sett var fyrir sveitafélagið Skagafjörð og Akrahrepp, vegna hópsmits sem upp kom á svæðinu um og fyrir sl. helgi. Á heimasíðu lögreglunnar á Norðurlandi vestra segir að jafnframt muni aðrar sóttvarnaraðgerðir sem aðgerðastjórn greip til og gilda til og með morgundagsins, sunnudagsins 16. maí ekki verða framlengdar.

Það var kunngjört sl. mánudag hverjir sæktust eftir kjöri á framboðslista Sjálfstæðisflokksins í Norðvesturkjördæmi og kom þá í ljós að tveir þeirra níu sem það gerðu búa á Norðurlandi vestra. Annar þeirra er sr. Magnús Magnússon á Hvammstanga en hinn Teitur Björn Einarsson. Feykir hafði spurnir af því að Teitur og hans kona, Margrét Gísladóttir, frá Glaumbæ, væru búin að vera búsett í Skagafirði í um ár og bæði komu með störfin með sér úr höfuðborginni. Margrét sem framkvæmdastjóri Landssambands kúabænda en Teitur er lögmaður hjá Íslensku lögfræðistofunni. Þau búa í Geldingaholti 3 á Langholti ásamt drengjunum sínum tveimur, Gísla Torfa 4 ára og Einari Garðari 2 ára. Feykir sendi Teiti nokkrar spurningar sem hann snaraði sér í að svara.