A-Húnavatnssýsla

Svandís Svavarsdóttir heilbrigðisráðherra hefur ákveðið að fresta um ótiltekinn tíma breytingum á neðri mörkum aldursviðmiða vegna lýðgrundaðra skimana fyrir brjóstakrabbameinum. Breyt­ing­arnar fólust í því að neðri aldursmörk skimana færðust úr 40 árum í 50 en hærri mörk úr 69 árum í 74. Áttu þær að ganga í gildi nú um ára­mót­in ásamt þeirri breyt­ingu að skim­an­ir fyr­ir brjósta- og leg­hálskrabba­meini færðust úr hönd­um Krabba­meins­fé­lags­ins til hins op­in­bera.

Stefán Vagn Stefánsson, yfirlögregluþjónn og formaður byggðarráðs Svf. Skagafjarðar, hefur ákveðið að gefa kost á sér til að leiða lista Framsóknarflokksins í Norðvesturkjördæmi fyrir næstu alþingiskosningar. Hann hafði áður gefið kost á sér í annað sæti listans en gírar sig nú upp í efsta sætið í kjölfar þess að Ásmundur Einar Daðason söðlar um og gefur kost á sér á lista Framsóknar í Reykjavíkurkjördæmi norður.

Það eru sviptingar hjá Framsóknarmönnum í Norðvesturkjördæmi. Um áramótin lá, að því er virtist, ljóst fyrir að Halla Signý Kristjánsdóttir frá Bolungarvík og Króksarinn Stefán Vagn Stefánsson myndu bítast um annað sæti á lista Framsóknar í komandi póstkosningum. Það var því ekki sótt að ráðherranum Ásmundi Einari Daðasyni sem skipaði efsta sæti listans í síðustu kosningum og því allt útlit fyrir að hann gengi að sætinu vísu. Nú hefur Ásmundur Einar hins vegar lýst því yfir að hann muni gefa kost á sér í Reykjavík norður sem sannarlega er óvænt flétta.

Tveir eru nú í einangrun vegna kórónuveirusmits samkvæmt nýrri tilkynningu frá aðgerðastjórn almannavarna á Norðurlandi vestra. Tekið er fram í tilkynningu að smitin séu landamærasmit og því ekki tilkomin á svæðinu. Fólk er samt sem áður hvatt til að halda vöku sinni áfram og muna einstaklingsbundnar sóttvarnir.

Ný reglu­gerð heil­brigðisráðherra um fjölda­tak­mark­an­ir ­tekur gildi í dag og er henni ætlað að gilda næstu fimm vikurnar eða til 17. febrúar. Stærstu breytingarnar eru þær að sam­komutak­mörk verða rýmkuð í 20 manns, heilsu- og lík­ams­rækt­ar­stöðvum verður heim­ilt að halda skipu­lagða hóp­tíma með ströng skil­yrðum en skemmtistöðum, krám og spila­söl­um verður enn gert að hafa lokað.

Viðskiptahraðallinn Hugsum hærra hófst síðastliðinn mánudag, 11. janúar, með þátttöku tíu fyrirtækja af Vestfjörðum og Norðurlandi vestra. Hraðallinn er unninn í samstarfi við ráðgjafafyrirtækið Senza og Vestfjarðarstofu og standa vinnustofur yfir þessa viku. Markmið hraðalsins er að aðstoða fyrirtæki að vinna fjárfestakynningar, skrifa styrkumsóknir, móta stefnu og ramma inn viðskiptaáætlun. Fyrirtækin halda svo áfram í reglulegri eftirfylgni með atvinnuráðgjafa samtakanna næstu mánuðina.

Hlutabótaleiðin, eða réttur til greiðslu atvinnuleysisbóta samhliða minnkuðu starfshlutfalli vegna tímabundins samdráttar í starfsemi vinnuveitenda, hefur verið framlengd og gildir nú til og með 31. maí 2021. Samkvæmt lögum um atvinnuleysistryggingar geta einstaklingar sem verið hafa í fullu starfi farið niður í allt að 50 prósenta starfshlutfall og átt rétt á atvinnuleysisbótum samhliða því starfshlutfalli.

Samtök sveitarfélaga á Norðurlandi vestra, í samstarfi við Samtök sveitarfélaga á Norðurlandi eystra, Austurbrú, Samtök sunnlenskra sveitarfélaga og Vestfjarðarstofa bjóða konum í atvinnurekstri á landsbyggðinni upp á svokallaða Hæfnihringi, fræðslu og stuðning sem stýrt er af leiðbeinendum í gegnum netforritið Zoom.

Þriðja erindi vetrarins í fyrirlestraröðinni Vísindi og grautur sem Ferðamáladeild Háskólans á Hólum stendur fyrir verður haldið miðvikudaginn 13. janúar næstkomandi. Þar mun Edward Hübens, prófessor í menningarlandfræði við háskólann í Wageningen í Hollandi fjalla um framtíð ferðaþjónustu eftir heimsfaraldur og velta upp mögulegum sviðsmyndum af eftirköstum aðgerða til að stemma stigu við honum. Edward mun sérstaklega ræða hvernig ferðalög fólks geta skapað gagnkvæman skilning, stuðlað að friði og hnattrænu samlífi og hvernig áherslan á félagslega fjarlægð í faraldrinum getur haft áhrif á þessa kosti ferðamennsku.

Særún Ægisdóttir er hárgreiðslu- og hannyrðakona ásamt því að stunda búskap ásamt manni sínum á bænum Haga í Húnavatnshreppi. Hún sagði okkur lítillega frá handverkinu sínu í Hvað ertu með á prjónunum? í 26. tölublaði Feykis árið 2018. Prjónaskapur er hennar uppáhalds handverk þó hún hafi reyndar prófað margar tegundir handavinnu um dagana. Særún segir að barnateppin sem hún hefur prjónað handa systkinabörnunum séu hennar uppáhaldsverk enda virkilega falleg eins og sjá má á einni af meðfylgjandi myndum.