A-Húnavatnssýsla

Ferðamáladeild Háskólans á Hólum hafa undanfarna vetur haldið fyrirlestraröð undir heitinu Vísindi og grautur. Vegna Covid-19 hefur þessi fyrirlestraröð verið flutt á netið í vetur og verður því aðgengileg öllum áhugasömum. Annað erindi vetrarins verður haldið miðvikudaginn 2. desember næstkomandi. Í tilkynningu frá ferðamáladeild segir að í erindinu muni Sigríður Sigurðardóttir fjalla um niðurstöður rannsóknar um viðhorf fólks gagnvart torfhúsaarfi þjóðarinnar, hvaða sess torhús hafa í hugum heimamanna og viðbrögð erlendra gesta gagnvart þeim.

Veðurstofan hefur gefið út appelsínugula viðvörun vegna veðurs fyrir Faxaflóa, Breiðafjörð, Strandir og Norðurland vestra og Miðhálendi í kvöld og fram yfir miðnættið og gul viðvörun gildir fyrir Höfuðborgarsvæðið, Suðurland, Faxaflóa, Vestfirði, Strandir og Norðurland vestra og Norðurland eystra á morgun 26. nóv. frá hádegi og fram á föstudagsmorgun. Spáð er vaxandi suðaustanátt og að það þykkni upp, 18-25 m/s og snjókomu eða slyddu með köflum í kvöld og hlýnar, en sunnan 20-28 um miðnætti og úrkomuminna. Suðvestan 10-18 og él í fyrramálið, en 18-23 eftir hádegi og kólnar. Heldur hvassara annað kvöld.

Í dag er útgáfudagur Jólablaðs Feykis og í dag og næstu daga ættu áskrifendur og allir íbúar á Norðurlandi vestra að fá hressilegt blað inn um bréfalúguna. JólaFeykir er 40 síður að þessu sinni, stútfullt af fjölbreyttu efni og auglýsingum. Það er nú þegar komið á netið þannig að þeir sem ekki geta setið á sér geta stolist í það strax.

„Það er ástæða til að fagna áfangasigri hjá okkur á Norðurlandi vestra. Tafla dagsins er einstaklega ánægjuleg og vonumst við að hún haldist svona áfram,“ segir í tilkynning frá aðgerðastjórn almannavarna á Norðurlandi vestra en hnykkt er á því að til þess að svo verði áfram þurfa allir að halda vöku sinni og huga áfram að einstaklingsbundnu sóttvörnum, „ … því að almannavarnir í þessu tilfelli byrja heima!“

Feykir hafði samband við séra Sigríði Gunnarsdóttur, sóknarprest í Sauðárkróksprestakalli, og forvitnaðist örlítið um kirkjuhald nú á aðventu og jólum. Sigríður segir fátt benda til þess að samkomur á aðventu geti verið með sama sniði og áður. „Ég lifi í voninni að ástandið verði orðið það stöðugt um jól að fólki verði óhætt að ganga til kirkju,“ segir séra Sigríður.

Það hefur aldrei verið mikilvægara en nú á tímum kóvíd-19 að vekja athygli á þeirri staðreynd að ofbeldi gegn konum hefur aukist í heiminum. Dagana 25. nóvember til 10. desember munu Alþjóðasamtök Soroptimista, ásamt fjölda annarra félagasamtaka, standa fyrir sextán daga átaki á heimsvísu sem nefnist „Orange the world“. Markmiðið er að vekja athygli á ofbeldi gegn konum undir heitinu „Roðagyllum heiminn“. Þessi litur táknar bjartari framtíð án ofbeldis.

Byggðarráð Sveitarfélagsins Skagafjarðar harmar þá stöðu sem upp er komin í málefnum Jöfnunarsjóðs sveitarfélaga en í bókun ráðsins segir að Reykjavíkurborg virðist ætla að halda til streitu kröfu á hendur Jöfnunarsjóði upp á um 8,7 milljarða króna fyrir meint vangoldin framlög úr sjóðnum. Þessari kröfu hefur þegar verið hafnað af hálfu ríkisins og hefur Sigurður Ingi Jóhannsson, samgöngu- og sveitarstjórnarráðherra, sagt að krafa borgarinnar væri ósanngjörn og óskynsamleg.

Forseti Alþingis, Steingrímur J. Sigfússon, flutti minningarorð um Pál Pétursson, fyrrverandi alþingismann og ráðherra á þingfundi í morgun en Páll lést eftir erfið veikindi í gær. Páll, jafnan kenndur við Höllustaði í Blöndudal í Austur-Húnavatnssýslu, var alþingismaður Norðurlands vestra 1974–2003 fyrir Framsóknarflokkinn, félagsmálaráðherra 1995–2003 og formaður þingflokks Framsóknarflokksins 1980–1994.

Það hefur snjóað talsvert í Stólinn síðustu vikuna og góðar líkur á að gönguskíðabraut verði opnuð á næstu dögum á skíðasvæði Tindastóls. Á Fésbókarsíðu skíðasvæðisins kemur fram að búið sé að staðfesta, í Covid-fárinu, að gönguskíðabrautir séu nú leyfðar og því ekki seinna vænna fyrir skíðafólk að dusta rykið af skíðunum og fara að smyrja.

Heilbrigðisráðherra hefur gefið út að draga skuli úr takmörkun á skólastarfi í tónlistarskólum og auka þannig svigrúm til tónlistarkennslu til og með 1. desember. Þá verður tónlistarskólum heimilt að sinna einstaklingskennslu en halda skal tveggja metra reglu milli starfsfólks og nemenda. Hámarksfjöldi verður sambærilegur og í grunnskólum; 25 hjá eldri nemendunum, þ.e. í 5.–10. bekk en 50 hjá yngri nemendum. Tveggja metra reglan gildir um nemendur í 8.–10. bekk en ef víkja þarf frá henni skulu notaðar andlitsgrímur.