A-Húnavatnssýsla

Sjö umsækjendur voru um starf sveitarstjóra Blönduósbæjar, sem auglýst var laust til umsóknar, og rann umsóknarfresturinn út þann 2. júlí síðastliðinn.

Á heimasíðu Heilbrigðiseftirlits Norðurlands vestra má nú finna starfsskýrslu eftirlitsins fyrir árið 2017. Hlutverk Heilbrigðiseftirlitsins felst annars vegar einkum í því að sinna eftirliti með starfsleyfisskyldri starfsemi og hins vegar stjórnsýsla sem felur í sér lögbundnar umsagnir, m.a. um leyfisveitingar sýslumanna og skipulagsyfirvalda.

Blönduósbær og Listasafn Alþýðu hafa tekið höndum saman og skipulagt vinnustofu fyrir unglinga í vinnuskóla bæjarins dagana 10. og 11. júlí. Einnig hafa stéttarfélagið Samstaða á Blönduósi og menningarbændurnir á Kleifum haft hönd í bagga við undirbúning námskeiðsins.

Upplýsingamiðstöð ferðamála í Austur-Húnavatnssýslu tók til starfa á nýjum stað að Aðalgötu 8 þann 15. apríl síðastliðinn en miðstöðin var áður rekin yfir sumartímann í Héraðsbókasafni Austur-Húnavatnssýslu. Á sama stað er einnig til húsa handverksverslunin Hitt og þetta handverk þar sem má finna handverk eftir tæplega 40 einstaklinga úr sýslunni og Vötnin Angling Service en þar má finna veiðivörur af ýmsu tagi eða fá búnaðinn leigðan og einnig er hægt að kaupa þar veiðileyfi.

Sveitarstjórn Skagastrandar auglýsti starf sveitarstjóra laust til umsóknar og rann umsóknarfresturinn út þann 2. júlí sl. Átta umsóknir bárust um stöðuna.

Húni.is greinir frá því að í dag eru 30 ár síðan Blönduós hlaut bæjarréttindi og þar með nafngiftina Blönduósbær. Upphaflega tilheyrði Blönduós Torfalækjarhreppi. Staðurinn fékk löggildingu sem verslunarstaður þann 1. janúar 1876 þegar Thomsen kaupmaður hóf verslun þar en varð, árið 1914, að sérstökum hreppi, Blönduóshreppi. Þann 1. febrúar árið 1936 stækkaði svo hreppurinn þegar hann fékk skika úr landi Engihlíðarhrepps.

Í morgun voru sett upp prjónuð teppi í Flugstöð Leifs Eiríkssonar en teppin eru afrakstur samstarfsverkefnis í tilefni af 100 ára fullveldisafmæli Íslands en Textílsetur Íslands hlaut veglegan styrk til að taka þátt í verkefninu.

Á morgun, fimmtudaginn 5. júlí kl. 13:00, býður Matís til fundar í Miðgarði, þar sem fjallað verður um áskoranir og möguleika tengda nýsköpun í landbúnaði, sölu og dreifingu afurða og heimaslátrun og mikilvægi áhættumats.

Gistinóttum erlendra ferðamanna á hótelum hefur fjölgað um 1% séu bornir saman maímánuðir ársins í ár og síðastliðins árs. Þetta kemur fram í Hagsjá Landsbankans en hún er byggð á gögnum frá Hagstofunni.

Héraðsbókasafn Austur-Húnavatnssýslu á Blönduósi bryddar gjarnan upp á spennandi nýjungum. Í júlímánuði ætlar safnið að vera með kynningar á öðrum söfnum á Facebooksíðu sinni og segja frá skemmtilegum hugmyndum eða viðburðum sem í boði eru á vegum þeirra. „Kannski er þar eitthvað sem að vinir safnsins vildu sjá hér á Blönduósi?" segir á Facebooksíðunni.