A-Húnavatnssýsla

Eins og allir vita eru Strandamenn náttúrubörn sem í gegnum ár og aldir hafa glímt við náttúruöflin og lært að lifa með þeim. Þeir heyra grasið gróa og snjóinn snjóa og vita hvað það þýðir þegar hrafninn klöktir til beggja átta á bæjarhlaðinu. Nú stendur til að halda afar óvenjulega útihátíð á Ströndum helgina 28.-30. júlí, svokallaða Náttúrubarnahátíð. Þar fá gestir á öllum aldri, bæði börn og fullorðnir, tækifæri til að finna og rækta sitt innra náttúrubarn.

Blönduhlaup USAH var hlaupið síðasta laugardag í ljómandi veðri og gekk vel fyrir sig. Einungis 27 hlauparar skráðu sig til leiks sem er talsvert minni þátttaka en verið hefur undanfarin ár, þar af voru aðeins sex heimamenn, og vonast skipuleggjendur hlaupsins til að sjá breytingu á því í næsta Blönduhlaupi.

Aldarafmæli sjálfstæðis og fullveldis Íslands verður fagnað á næsta ári með fjölbreyttri dagskrá um land allt. Kallað verður eftir frumkvæði og virkri þátttöku landsmanna með tillögum að verkefnum á hátíðardagskrána sem standa mun allt árið 2018. Nefnd sem Alþingi skipaði til að annast undirbúning og framkvæmd afmælishátíðarinnar hefur hafið störf.

Á fundi byggðaráðs Blönduósbæjar í gær var samþykkt að öllum börnum í Blönduskóla verði veitt nauðsynleg námsgögn og ritföng frá og með næsta hausti endurgjaldslaust. Er það liður í því að vinna gegn mismunum barna og styður við að öll börn njóti jafnræðis í námi, að því er segir í fundargerð byggðaráðs. Þar kemur einnig fram að Ríkiskaup hafa ákveðið að bjóða upp á sameiginlegt örútboð á námsgögnum grunnskóla og samþykkti byggðaráð að taka þátt í því.

Ásdís Brynja Jónsdóttir á Hofi í Vatnsdal hefur verið valin í hollenska landsliðið í hestaíþróttum. Ásdís segir að leiðarvísirinn fyrir landsliðsvali sé öðruvísi háttað í Hollandi en á Íslandi en þar þarf að ná ákveðinni lágmarkseinkunn á world ranking mótum til að eiga möguleika á að verða valinn.

Breska ferðaskrifstofan Super Break mun á næstu dögum hefja sölu á ferðum til Norðurlands með beinu flugi frá Bretlandi. Þetta verður í fyrsta sinn sem boðið verður upp á beint flug til Akureyrar frá Bretlandi, en flogið verður alls átta sinnum frá átta mismunandi flugvöllum víðsvegar um Bretland. Þeirra á meðal eru Newcastle, Liverpool, Leeds, Bradford og Bournemouth. Samtals verður pláss fyrir um 1500 farþega í þessum ferðum.

Ákveðið hefur verið að lengja skráningarfrest á miðsumarssýninguna á Hólum og opið verður fyrir skráningu til miðnættis á morgun þriðjudagsins 18. júlí. Miðsumarsýningar verða á tveimur stöðum, á Hólum í Hjaltadal og á Gaddstaðaflötum og fara fram dagana 24.-28. júlí. Á kynbótasýningum sem haldnar voru í vor voru sýnd 716 hross á átta sýningum og fengu áhorfendur að sjá heimsmet falla.

Félagar í Skotfélaginu Markviss hafa gert það gott að undanförnu. Nú um helgina varð Snjólaug M. Jónsdóttir Íslandsmeistari kvenna í Nordisk Trap á móti sem fram fór á skotsvæði Skotfélags Akraness þar sem hún bætti Íslandsmet kvenna um 27 dúfur og skaut 114/150. Hún setti einnig Íslandsmet með final og skaut 22 dúfur í úrslitum og hlaut 136 stig sem var hæsta skor mótsins.

Uppskriftaþátturinn sem hér fer á eftir birtist í 28. tölublaði Feykis árið 2015.Það jafnast ekkert á við góðan grillmat til að gæða sér á á fallegu sumarkvöldi og grillaðar lambakótilettur klikka aldrei. Feykir býður því upp á uppskrift að óviðjafnanlegum grillmat sem óhætt er að mæla með. Marineringin er mjög góð og smellpassar við lambakjöt, án þess þó að vera of yfirgnæfandi. Mörgum finnst kartöflur ómissandi og við erum sammála, og látum uppskrift að dásamlegum kartöflum fylgja með. Máltíðin er svo fullkomnuð með grísku salati og graslaukssósu.

Björgunarsveitir frá Blönduósi og Skagaströnd voru kallaðar út klukkan eitt í dag vegna konu sem féll af hestbaki við Blöndu, í landi Kárastaða. Voru björgunarsveitarmenn komnir til konunnar milli klukkan tvö og hálfþrjú. Konan er með áverka á hné en að öðru leyti er líðan hennar stöðug. Þyrla Landhelgisgæslunnar var kölluð út til að flytja hana af vettvangi og fór TF-GNA í loftið laust fyrir klukkan þrjú og er væntanleg á staðinn fljótlega.