Heimþrá :: Áskorandapenni Aron Stefán Ólafsson frá Reykjum í Hrútafirði
Í Borgarnesi, á heimleið barst mér símskeyti frá Ingu á Kollsá. „Má ég senda á þig áskorendapennann í Feyki?“ Leyfðu mér að hugsa… maðurinn sem kann ekki að segja nei, segir að sjálfsögðu já. Hvað getur brottfluttur Húnvetningur, sem lifir í grámyglulegum hversdagsleika Reykjavíkur svo sem skrifað um, jú, auðvitað sveitina sína.
Laufið sem lék sér í sumargolunni er fallið, haustið komið og veturinn nálgast. Í „stórborginni“ Reykjavík getur dimmt og kalt haustkvöld gert sveitapiltinn lítinn og einmana. Hugurinn leitar þá í ræturnar, heim í sveitina, þar sem sumarminningar ylja og lýsa upp sálina.
Ef lífsins gangur bregður braut
brot í sál að sinni,
þá reynist ansi erfið þraut
að gleyma eigin minni.
Leggðu rækt við dýpstu rætur
raunir búa í þeim,
ef svo villast veikir fætur
vísar minning aftur heim.
Þetta er heimþráin, tilfinningin sem maður fann fyrst fyrir í barnæsku og hélt að myndi þroskast af manni, en svo gerðist ekki. Er þetta kannski þráin í æskuna, vorið í lífi manns, þar sem áhyggjurnar voru engar, bara leikur og frelsi. Sveitin er það sem veitir frelsi og öryggi, maður er partur af umhverfinu, ekki partur af umferðinni, eins og hér í Reykjavík. Mikið sem þessi borg getur verið grá og leiðigjörn, því er algjörlega óumflýjanlegt að fara sem oftast heim og endurnæra geðið.
Ef litlaust lífið leikur grátt
og leiðast fer mér leiðinn,
vegviss held í norðurátt
við mér tekur heimreiðin.
Að eiga sína sveit eru forréttindi, að hafa alist upp í sveit eru ennþá meiri forréttindi. Að búa að því sem maður lærði af sveitinni í æsku, veitir manni forskot bæði í leik og starfi. Nálægðin við náttúruna, dýr, bæði vilt og tamin, kennir barni svo ótrúlega margt. Hvernig á að umgangast og eiga samskipti við lifandi verur. Hvernig er hægt að nýta landsins gæði án þessa að ganga á þau og skemma. Það eru svona hlutir sem sveitin skilur eftir í manni, hún er mér kær og mjög mikilvæg.
Hversu ljúft er að eiga þig sællega sveit?
Staður í hjarta fullur minningum þeim
sem frelsið mér færir og það eitt ég veit
að alltaf og ætíð ég kem aftur heim.
Jæja nóg komið af væmnitali og ódýrum kveðskap. Þar sem ég sit hérna heima á Reykjum og skrifa þessi lokaorð, liggur beinast við að kasta boltanum beint yfir fjörð, heim að Kjörseyri, þar sem gleðigjafinn og verðlaunabóndinn Ingimar tekur væntanlega upp léttara hjal.
Áður birst í 42. tbl. Feykis 2022
Fleiri fréttir
-
Stórtjón á gervigrasvellinum á Króknum
feykir.is Skagafjörður, Íþróttir 23.04.2024 kl. 12.11Í leysingunum síðastliðinn laugardag fór gervigrasvöllurinn glæsilegi á íþróttasvæðinu á Sauðárkróki undir vatn og var völlurinn ekki leikhæfur á sunnudegi. Spilað var á vellinum í gær en ljóst var að völlurinn var ekki í góðu ástandi. „Í morgun mætti galvaskur hópur leikmanna Tindastóls og starfsmenn sveitarfélagsins og flettu gervigrasinu af á parti og kom í ljós að gúmmipúðinn undir er ónýtur,“ tjáði Adam Smári Hermannsson, formaður knattspyrnudeildar, Feyki.Meira -
Einvígi Tindastóls og Aþenu hefst á föstudag
feykir.is Skagafjörður, Íþróttir 23.04.2024 kl. 09.48„Einvígi við Aþenu leggst vel í mig. Aþena er með vel mannað lið í öllum stöðum og spila af mikilli ákefð. Það er mikil stemning í kringum bæði þessi lið og heimavöllurinn öflugur þannig að ég á von á hita og látum, bæði á vellinum og í stúkunni,“ segir Helgi Freyr Margeirsson, þjálfari kvennaliðs Tindastóls, en í gær varð ljóst að andstæðingur Stólastúlkna í einvíginu um sæti í Subway-deildinni yrðu lærisveinar Brynjars Karls, Aþena.Meira -
Upplýsingafundur Íslandspósts á Hvammstanga
feykir.is Vestur-Húnavatnssýsla 23.04.2024 kl. 09.36Feykir sagði frá því fyrr í vetur að Íslandspóstur hefði tekið ákvörðun um lokun fimm pósthúsa á landsbyggðinni og fimm útibúa að auki. Byggðarráð Húnaþings vestra mótmælti ákvörðun um að loka pósthúsinu á Hvammstanga en fá að öllum líkindum ekki snúið ákvörðuninni. Nú boðar Íslandspóstur til upplýsingafundar í Félagsheimilinu Hvammstanga mánudaginn 29. apríl kl. 17.Meira -
Baldur og Felix á Sauðárkróki og á Blönduósi í dag
feykir.is Skagafjörður, Austur-Húnavatnssýsla, Vestur-Húnavatnssýsla, Mannlíf 23.04.2024 kl. 08.34Það hefur efalaust ekki farið framhjá neinum að það eru forsetakosningar framundan en kosið verður 1. júní. Næsta mánuðinn verða því forsetaframbjóðendur, sem stefnir jú í að verði nokkrir, á faraldsfæti og munu taka í hendur eins margra og auðið er. Í dag verða þeir Baldur og Felix á ferðinni hér norðan heiða og í dag heimsækja þeir Sauðárkrók og Blönduós – þar sem Felix bjó einmitt um tíma.Meira -
Lukkudísirnar voru í liði með FH
feykir.is Skagafjörður, Íþróttir 22.04.2024 kl. 20.44Fyrsti leikur Tindastóls í Bestu deild kvenna þetta árið fór fram nú undir kvöld en þá tóku Stólastúlkur á móti liði FH við ágætar aðstæður. Það verður varla annað sagt en að lukkudísirnar hafi verið í liði með gestunum því í það minnsta þrívegis skall boltinn í stangir FH marksins. Það voru hins vegar Hafnfirðingarnir sem gerðu eina mark leiksins snemma í síðari hálfleik og þrátt fyrir talsverða pressu og nokkur ágæt færi þá tókst liði Tindastóls ekki að jafna.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.