Grunnskóli austan Vatna Með allt á hreinu !
Allir þekkja kvikmyndina, Með allt á hreinu, þar sem Gærur og Stuðmenn bítast um dansgólfið og hylli landsmanna. Nemendur á unglingastigi Grunnskólans austan Vatna vinna nú hörðum höndum að því að setja stykkið upp á fjölunum í Höfðaborg á Hofsósi. Ragnheiður Halldórsdóttir leikstýrir hópnum en stuðst er við handrit frá Leikfélagi Menntaskólans í Reykjavík sem byggt er á kvikmyndinni.
Feykir sendi nokkrar spurningar á leikhópinn.
Hvernig hafa æfingar gengið?
Æfingar hafa gengið vel, en vissulega hafa veikindi og óveður sett strik í reikninginn. Krakkarnir hafa sýnt mikinn metnað enda margt að læra. Flóknir lagatextar sem eru nýir fyrir unglingunum þó svo að þeir séu fyrir löngu orðnir að klassík hjá okkur sem eldri erum. Það verður að hrósa þeim fyrir mikla þrautseigju og jákvæðni enda hefur ferlið verið virkilega tímafrekt og krefjandi. Eitt af því ánægjulega við að setja svona stykki upp er að hópurinn þéttist og það er vart til betra hópefli.
Hver hefur verið mesta áskorunin við uppsetninguna? Mesta áskorunin hefur líklega verið að ná strákunum niður úr rimlunum og köðlunum, þar sem félagsheimilið er líka notað sem íþróttahús. Einnig höfum við verið með smá samviskubit yfir því að aðrir nemendur komast ekki í íþróttir á meðan á æfingum stendur.
Nú er mikil tónlist í myndinni, hvernig er það leyst? Krakkarnir sýna ótrúlegt hugrekki, allir taka þátt og syngja á sviði. Margir syngja einsöng og það verður að hrósa þeim hvað þau leysa þetta vel. Þau hafa haft mikið frumkvæði í því að útfæra söng og dans. Við leyfum okkur að fullyrða að hæfileikar nemenda eiga eftir að koma mörgum á óvart.
Hvenær eru sýningar? Sýningarnar eru tvær. Sú fyrri á fimmtudaginn 26. mars kl. 18 og seinni sýningin á föstudaginn 27. mars kl. 20. Engar aukasýningar, svo við mælum með að hika ekki og panta miða í síma 847-7106.
Myndin er tekin á æfingu..
Fleiri fréttir
-
Senn geta Skagfirðingar og aðrir góðir gestir rennt sér í nýjum rennibrautum við Sundlaug Sauðárkróks
feykir.is Skagafjörður 23.03.2026 kl. 13.03Síðastliðið sumar bauð Fjársýslan, fyrir hönd sveitarfélagsins Skagafjarðar, út verk sem fólst í forsmíðuðum vatnsrennibrautum og rennibrautaturni, þar með talið efni, vinnu og uppsetningu, fyrir nýtt útisvæði við Sundlaug Sauðárkróks. Niðurstaða útboðsins var að tilboð Sportís var metið hagkvæmast að teknu tilliti til verð- og gæðamats. Um er að ræða þrjár rennibrautir, þar af tvær sem tengjast við nýjan 12 m. háan uppgönguturn. Turninn verður upphitaður, klæddur plexigleri og með led-lýsingu. Ljóst er að mannvirkið mun setja svip sinn á bæinn.Meira -
Mildi að ekki fór verr
feykir.is Skagafjörður, Lokað efni 23.03.2026 kl. 12.23Alvarlegt óhapp varð við Jökulsárbrú neðan við Goðdali sl. fimmtudag þegar bifreið lenti í flóði af krapa, snjó og grjóti. Aðstæður á svæðinu voru erfiðar og virðist sem skyndilegt aur- og krapaflóð hafi fallið yfir veginn og skollið á bílnum með miklum krafti.Meira -
Mikið er um að vera hjá íþróttahreyfingunni
feykir.is Skagafjörður, Austur-Húnavatnssýsla, Íþróttir, Vestur-Húnavatnssýsla 23.03.2026 kl. 10.50Hefur þú áhuga á íþróttum? Ef svarið er já þá er nóg um að vera í dag mánudaginn 23. mars. Íþrótta- og Ólympíusamband íslands, Ungmennafélag Íslands, Svæðisskrifstofur íþróttahéraða standa fyrir þremur mismunandi viðburðum í sal Fjölbrautarskóla Norðurlands vestra. Um er að ræða þrjá ólíka viðburði sem hægt er að lesa nánar um hér að neðan.Meira -
Formaðurinn á eldi gegn Fjallabyggð
feykir.is Skagafjörður, Íþróttir, Lokað efni 23.03.2026 kl. 10.24Tindastólsmenn héldu norður á Akureyri þar sem lið KF beið þeirra undir ljósunum á Akureyrarvelli. Um var að ræða leik í 1. umferð Mjólkurbikarsins sem var heimaleikur Tindastóls en völlurinn á Króknum var ekki talinn nothæfur sökum bleytu þó það hafi reyndar komið Tindastólsmönnum á óvart sem töldu standið á vellinum fínt á leikdegi skv. heimildum Feykis. Stólarnir léku við hvurn sinn fingur á Akureyri í staðinn og fóru með sigur af hólmi, 3-1, og mæta annað hvort Dalvík/Reyni eða Magna í 2. umferð 27. mars.Meira
