Norðanátt og kólnandi veður næstu daga
Veðurútlitið næstu daga minnir frekar meira á haustspá en sumarspánna sem við óskum eftir. „Norðanáttin gerir sig aftur heimankomna um helgina og verður allhvöss norðvestan til og á Suðausturlandi. Henni fylgir að venju úrkoma, nú í formi rigningar með svölu veðri á norðan- og austanverðu landinu en úrkomumest verður á sunnudag,“ segir veðurfræðingur á Veðurstofu Íslands í hugleiðingum sínum um veðrið næstu daga.
Á Suður- og Vesturlandi verður skýjað með köflum en smá skúrir á víð og dreif og þægilegur hiti að deginum. Dregur smám saman úr vindi og rofar til eftir helgi en áfram strekkingur og svalt með austurströndinni segir jafnframt á vef Veðurstofu Íslands.
Norðlæg átt, 5-13 m/s og dálítil væta N- og A-lands, en bjart með köflum S- og V-til. Hiti 10 til 15 stig, en 4 til 10 stig um landið N-vert.
Gengur í norðaustan 8-15 á morgun, og fer að rigna um landið A-vert annað kvöld.
Á sunnudag:
Norðaustan 8-15 og rigning með köflum, en 15-20 m/s við SA-ströndina. Dregur úr vindi og úrkomu eftir hádegi. Hiti 8 til 15 stig, en 4 til 8 stig NA-til.
Á mánudag og þriðjudag:
Norðlæg átt, 5-13 m/s og skúrir N-lands, en bjart með köflum S-til. Hiti 7 til 16 stig, hlýjast sunnan heiða.
Á miðvikudag og fimmtudag:
Suðvestlæg átt og dálítil væta um landið V-vert, annars þurrt að mestu. Heldur hlýnandi.
/SHV
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.