Samgöngustofa boðar átak vegna minnkandi notkunar bílbelta

feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 26.03.2026 kl. 14.29
Ungmenni á aldrinum 18-24 ára velja í auknum mæli að sleppa bílbeltum. Fjórtán sinnum meiri hætta á að verða fórnarlamb banaslyss sé bílbelti ekki notað. „Mikilvægt að ná til þessa hóps með öllum leiðum og stuðla að viðhorfsbreytingu,” segir Gunnar Geir Gunnarsson.
Samgöngustofa, í samstarfi við Aur, hefur ýtt úr vör herferðinni Ekki gera þig að fífli og er meginmarkmið hennar að fá ungt fólk til að endurskoða viðhorf sín til notkunar bílbelta. Herferðin er viðbragð við niðurstöðum viðhorfskannana sem Samgöngustofa hefur látið gera árlega og eru niðurstöður síðustu ára bæði skýrar og sláandi.

Skv. niðurstöðum viðhorfskönnunarinnar eiga 10-15% ungra karla á bilinu 18-24 ára það til að sleppa beltinu. „Við sjáum slæma þróun síðustu ár, þ.e. að fleiri karlar á aldrinum 18-24 ára velja að spenna ekki beltin af einhverjum ástæðum. Það kemur okkur ekki síður á óvart að konur á þessum aldri eru að feta í fótspor karlanna og eru sömuleiðis farnar að draga úr notkun bílbelta. Þetta er bæði ógnvænleg og illskiljanleg þróun. Því er gífurlega mikilvægt að ná til þessa hóps og stuðla að viðhorfsbreytingu,” segir Gunnar Geir Gunnarsson, deildarstjóri öryggis-og fræðsludeildar Samgöngustofu.

Gunnar Geir segir ólíklegt að fortölur séu vænlegar til árangurs þegar talað er til þessa hóps, því var ákveðið að fara í aðra átt með herferðinni Ekki gera þig að fífli og reyna að ná til hópsins með húmor og léttleika að vopni, þrátt fyrir að um háalvarlegt umræðuefni sé að ræða. Stóra áskorunin snúist um að ná til þessa fólks.

Víðsvegar hafa sést klesst andlit í auglýsingaplássum og á samfélagsmiðlum. Áhrifavaldar hafa einnig verið öflugir í að leggja málefninu lið með því að birta af sér myndir með klesst andliti og er tilgangurinn sá að fanga athygli markhópsins og ná þannig að hefja samtal og koma boðskapnum í gegn. „Við vitum að fólk á þessum aldri upplifir sig oft ódauðlegt eða ósigrandi og þess vegna viljum við fara öðruvísi leiðir að hópnum. Viðhorfsbreytingin er lífsnauðsynleg en þau sem kjósa að spenna ekki beltið eru fjórtán sinnum líklegri til að lenda í banaslysi heldur en þau sem nota þennan sjálfsagða öryggisbúnað. Þetta er staðreynd sem við verðum að hafa í huga þegar við setjumst upp í bíl, hvort sem er sem farþegar eða bílstjórar og tökum ákvörðun um að spenna beltið eða ekki.”

Samgöngustofa og Aur hvetja landsmenn til að kynna sér herferðina og taka virkan þátt með því að prófa „Klesst’ann” hnappinn á heimasíðu verkefnisins, spenntur.is og deila áfram með vinum og vandamönnum. Þannig er hægt að hafa gaman af alvöru málsins.
Til baka

Fleiri fréttir

  • Hólar í Hjaltadal. MYND FEYKIR.IS

    Hólar í Hjaltadal, “hér og þar og þá og nú.” | Gunnar Rögnvaldsson skrifar

    feykir.is Skagafjörður, Aðsendar greinar 26.03.2026 kl. 15.09 gunnhildur@feykir.is
    Það var ekki laust við að allmargir velunnarar Hóla í Hjaltadal hrykkju í kút þegar kvisaðist út að ríkisstjórnin hefði heimilað sölu á ýmsum eignum á Hólastað. Í þeim tillögum eru skólahúsið, skólastjórabústaðurinn, búshúsið og fleiri byggingar sem ásamt kirkjunni, hafa verið táknmyndir Hólastaðar í heila öld, fyrirmyndir listaverka sem prýða stofur heimila um allt land. Ástæðan er m.a. talin sú að kostnaður við að bjarga þeim eftir mygluskemmdir sé svo mikill að viðbættum rökum um að skólahúsið henti ekki lengur sem kennslu og skrifstofuhús sk.nýjustu kröfum. Alllengi hefur mátt sjá í hvað stefndi með þessar byggingar og umhverfi og í raun átakanlegt hve ríkið hefur sofið á verðinum og það ekki í fyrsta skipti þegar Hólar eiga í hlut. Helgasti staður landsins á eftir Þingvöllum, vagga kirkju, mennta og menningarsögu landsins, fyrrum höfuðstaður Norðurlands sem reistur var síðast úr rústum fyrir rúmum fjörutíu árum og fékk m.a. umhverfisverðlaun Skagafjarðar 2007. Að það sé ekki meiri metnaður til staðar er sorglegt og niðurlægingin alger þegar bjóða á upp helstu kennileiti staðarins eins og niðursetning á vistabandsárunum. Það virðist vera eins konar lenska hjá hinu opinbera að kosta miklu til nýframkvæmda og í raun á stundum allt of miklu vegna óráðsíu en láta svo eðlilegt og reglubundið viðhald bíða þar til allt er komið á eindaga. Ljósi punkturinn er biskupshús, dómkirkjan og Auðunarstofa sem vígslubiskup hefur undir sínum verndarvæng ásamt nánasta umhverfi og hlúir vel að.
    Meira
  • Kennarar FNV í Danmörku. MYND FNV

    Skólaheimsókn kennara til Slagelse

    feykir.is Skagafjörður, Austur-Húnavatnssýsla, Vestur-Húnavatnssýsla 26.03.2026 kl. 14.35 gunnhildur@feykir.is
    Dagana 19. og 20. mars síðastliðinn heimsóttu kennarar frá Fjölbrautaskóla Norðurlands vestra framhaldsskólann Zealand Business College í Danmörku. Skólinn, sem jafnan er nefndur ZBC, er með starfsstöðvar í nokkrum bæjum á Sjálandi. Kennarar FNV heimsóttu skólann sem staðsettur er í Slagelse sem er að mörgu leyti sambærilegur FNV, þar sem boðið er upp á bæði verk- og bóknámsbrautir.
    Meira
  • MYND SKAGAFJÖRÐUR

    Met í afkomu Hafnarsjóðs Skagafjarðar

    feykir.is Skagafjörður 26.03.2026 kl. 13.47 gunnhildur@feykir.is
    Afkoma Hafnarsjóðs Skagafjarðar fyrir árið 2025 var afar góð og hefur aldrei verið betri. Rekstrarhagnaður ársins var 81,6 milljón eftir afskriftir og fjármagnsgjöld. Eigið fé Hafnarsjóðs er 718 milljónir og langtímaskuldir 118 milljónir. Landað var alls 24.414 tonnum á Sauðárkróki og 65 tonnum á Hofsósi.
    Meira
  • Barbara sigurvegari gærkvöldsins. MYND FACEBOOK

    Úrslit í Gæðingalist Meistaradeildar KS

    feykir.is Skagafjörður, Íþróttir 26.03.2026 kl. 10.56 gunnhildur@feykir.is
    Keppt var í Gæðingalist í Meistaradeild KS í miðvikudagskvöld, 25. mars. Haf & Land ehf bauð áhorfendum frítt inn og fór það svo að Barbara Wenzl og Loftur frá Kálfsstöðum stóðu uppi sem sigurvegarar með einkunnina 7.50 eftir flotta sýningu. Í öðru sæti, þar rétt á eftir var Mette Mannseth og Töfri frá Þúfum með 7.47 og í því þriðja var Vera Schneiderschen og Feykir frá Selfossi með 7.43. 
    Meira
Yfirlit frétta