Fréttir

Björgunarsveitin Skagfirðingasveit stendur fyrir kynningu á starfi sínu kl. 18:30 í dag, þriðjudaginn 17. september, í húsnæði Skátafélagsins Eilífsbúa við Borgartún 2 á Sauðárkróki. Kynningin er opin öllum áhugasömum, hvort heldur sem er fyrir þá sem hafa áhuga á að starfa með sveitinni eða þá sem eingöngu vilja auka þekkingu sína á starfi björgunarsveita.

Lögð hefur verið fram á Alþingi tillaga til þingsályktunar um Húnavallaleið en flutningsmenn eru Njáll Trausti Friðbertsson, þingmaður Sjálfstæðisflokksins í Norðausturkjördæmi, og Ásmundur Friðriksson þingmaður sama flokks í Suðurkjördæmi. Í frétt Húnahornsins um málið segir að tillagan feli í sér að Alþingi álykti að fela innviðaráðherra að fá Vegagerðinni það hlutverk að uppfæra forsendur fyrir uppbyggingu Húnavallaleiðar og hefja samtal við Húnabyggð um hvort Húnavallaleið verði bætt við sem nýframkvæmd í samgönguáætlun fyrir árin 2024–2038.

Göng úr Fljótum og yfir í Siglufjörð hafa verið mikið í umræðunni, og þá sérstaklega frá því í sumar, enda vegurinn um Almenninga og að Strákagöngum löngu orðinn óboðlegur og beinlínis hættulegur. Flestir virðast telja að ekki verði lengur við unað og nú síðast bárust fréttir þess efnis að innviðaráðherra hefði ákveðið að setja 30 milljónir í rannsóknarvinnu vegna nýrra Fljótaganga og stefnt að því að framkvæmdir geti hafist árið 2026. Feykir spurði Einar E. Einarsson, forseta sveitarstjórnar Skagafjarðar, hvort sveitarstjórnarfólk væri ánægt með viðbrögð ráðherra og þá væntanleg Fljótagöng.

Miðvikudaginn 11.september hóf Skagfirski kammerkórinn æfingar á ný eftir sumarfrí og heldur inn í sitt tuttugasta og fimmta starfsár.

Tveir helztu drifkraftar verðbólgunnar hér á landi undanfarin misseri hafa annars vegar verið kostnaður vegna húsnæðis og hins vegar innflutt verðbólga. Aðallega frá ríkjum Evrópusambandsins enda mest flutt inn þaðan. Verðbólga jókst þar ekki vegna aukinna umsvifa heldur fyrst og fremst vegna glórulausra ákvarðana evrópskra ráðamanna í orkumálum sem varð til þess að ófá ríki sambandsins urðu háð orku frá Rússlandi. Þegar loks var brugðist við í þeim efnum, þó enn sé flutt inn mikið af rússneskri orku, leiddi það til hærra orkuverðs, þar með hærri framleiðslukostnaðar og loks hærra vöruverðs sem síðan skilaði sér hingað.

„Ég ætla bara að ítreka það að við erum búin að standa við okkar. Við erum búin að sameina og mér finnst það asskoti hart að fá svona í bakið fyrir mitt samfélag. Við erum að reyna að sameina samfélög, við gerum það ekki með því að búa til óeiningu milli hverfa í okkar samfélagi,“ sagði Guðmundur Haukur Jakobsson, oddviti Húnabyggðar, í samtali við RÚV í gær.

Stjórnvöld hafa ákveðið að flýta rannsóknum fyrir jarðgöng úr Fljótum og til Siglufjarðar og er nú stefnt að því að borun fyrir jarðgöng geti hafist árið 2026. Þrjátíu milljónum verður varið í að undirbúa gerð jarðganga úr Skagafirði í Fjallabyggð sem myndi leysa af hólmi veg um Almenninga en hann hefur farið illa í veðrum og jarðhreyfingum undanfarin ár og er talinn hættulegur vegfarendum.

Það var hart barist í síðustu umferð 2. deildarinnar í tuðrusparkinu í gær. Hvorki hafði gengið né rekið hjá Kormáki/Hvöt í síðustu leikjum og útlitið ekki verulega gott fyrir lokaleikinn; erfiður andstæðingur í Ólafsvík á meðan lið KF spilaði heima á Ólafsfirði gegn Hetti/Huginn sem hafði tapað fimm leikjum í röð og virtust hættir þetta sumarið. Það eina sem spilaði með Húnvetningum var að þeir höfðu stigi meira en lið KF fyrir síðustu umferðina og það reyndist heldur betur mikilvægt þar sem bæði lið töpuðu og bættu því ekki við stigasafnið. Kormákur/Hvöt náði því í raun þeim frábæra árangri að halda sæti sínu í 2. deild og það voru víst ekki margir sem veðjuðu á það fyrir mót.

Stólastúlkur spiluðu síðasta leik sinn í Bestu deildinni þetta sumarið í gær þegar þær heimsóttu Stjörnuna í Garðabæinn í úrslitakeppni neðri liða. Bæði lið voru örugg með sitt sæti í deildinni en Donni vildi sjá sitt lið sækja til sigurs og ræna sjöunda sætinu af Stjörnunni og vinna Forsetabikarinn. Tindastóll þurfti að vinna leikinn með þriggja marka mun til þess að svo gæti orðið en það hafðist ekki í þetta skiptið. Lokatölur 2-1 fyrir Stjörnuna.

Það dugar ekki að slugsa með Bók-haldið og að þessu sinni er það skáldið góða, Gyrðir Elíasson, sem segir lesendum Feykis frá sambandi sínu við bækur, fyrr og nú. Gyrðir er fæddur í Reykjavík árið 1961 en ólst upp á Hólmagrund 8 á Sauðárkróki. Hann er giftur og á þrjár dætur, starfar sem rithöfundur og myndlistamaður. Þessa dagana er hann að vinna að bók með þýðingum á ljóðum norska skáldsins Olav H. Hauge.