Fréttir

Árskóli á Sauðarkróki hefur, fyrstur skóla landsins, tekið í notkun sýndarveruleikagleraugu sem opnar á óþrjótandi möguleika í allri kennslu skólans. Auk gleraugnanna voru keyptir snjallsímar sem hluti búnaðar og myndavél sem hentar til verkefnavinnu nemenda.

Fyrir skömmu voru færðar af því fréttir að mygla hafi fundist í húsnæði leikskólans á Hofsósi sem síðar kom í ljós að var ekki hættuleg. En sem leikskóli hefur húsnæðið ekki þótt viðunandi og þarfnast það verulegra úrbóta. Á fundi byggðaráðs í síðustu viku kom fram að mikilvægt væri að leysa húsnæðismálin til framtíðar.

Við Grunnskóla Húnaþings vestra er laust tímabundið starf stuðningsfulltrúa á unglingastigi en um er að ræða 50-75% starf til 31. maí 2017. Á heimasíðu Húnaþings vestra segir að leitað sé að einstaklingi með skipulagshæfileika, lipurð í mannlegum samskiptum, hæfni til að sýna frumkvæði í starfi og taka þátt í samstarfi.

Fyrir skömmu var auglýst starf forstöðumanns fyrirtækjasviðs Byggðastofnunar. Alls bárust 20 umsóknir og hefur Arnar Már Elíasson verið ráðinn í starfið. Á vef Byggðastofnunar segir að Arnar Már hafi mikla reynslu af banka og útlánastarfsemi þar sem hann hafi starfað hjá Íslandsbanka og sem lánastjóri og fyrirtækjafulltrúi hjá SPRON.

Alþjóðlegur ADHD vitundarmánuður er nú nýhafinn en október er lagður undir vitundarvakningu ár hvert. ADHD samtökin taka virkan þátt í átakinu nú líkt og fyrr með margvíslegum hætti. Nýtt endurskinsmerki var kynnt í dgær, tveir nýir fræðslubæklingar voru gefnir út og árlegt málþing samtakanna var kynnt. Málþingið veðrur haldið í lok október og beinist athyglin að föngum og öðrum sem lenda í refsivörslukerfinu.

Síðastliðinn laugardag var haldinn sauðfjárdagur hreppanna fornu Fells-, Hofs-, Hóla- og Viðvíkurhrepps í Þráarhöllinni á Hólum í Hjaltadal. Fram fóru ýmis atriði s.s. eins og skrautgimbrakeppni, lambhrútakeppni og svo var gáfulegasta kindin valin.

Átak til að efla forritunarkunnáttu íslenskra barna verður kynnt í dag en Mennta- og menningarmálaráðuneytið, Samtök iðnaðarins, Menntamálastofnun og RÚV hafa tekið höndum saman um verkefnið með það að markmiði að efla forritunarkunnáttu íslenskra barna, auka vitund um mikilvægi forritunar í daglegum störfum, efla rökhugsun og stuðla að auknum áhuga á tækni- og iðngreinum.

Mánudaginn 10. október nk. opnar ljósmyndasýningin, Náttúran í Austur-Húnavatnssýslu í íþróttahúsinu á Blönduósi. Þar ætlar áhugaljósmyndarinn Róbert Daníel Jónsson að sýna myndir sem teknar eru í Austur-Húnvatnssýslu. Aðal markmið sýningarinnar er að auka áhuga fólks á fallegri náttúru Austur- Húnavatnssýslu og er hún styrkt af Uppbyggingarsjóði Norðurlands vestra.

Eins og fram hefur komið í fjölmiðlum og Feykir hefur fjallað um hefur afurðaverð til bænda verið mjög í umræðunni að undanförnu og í því samhengi hafa margir bent á að ef að fram fer sem horfir geti sauðfjárbændur ekki lengur greitt sjálfum sér laun. Margir hafa brugðið á það ráð að bjóða lambakjöt beint frá býli og eru auglýsingar um slíkt áberandi á samfélagsmiðlun.

Feyki barst ábending frá Friðriki Brekkan, leiðsögumanni um slæmt aðgengi fyrir fatlaða að Glaumbæjarsafni en þangað fór hann með hóp fyrr í haust. Hann segir að einn af hápunktum ferðarinnar hafi átt að vera ferð til að skoða þjóðlega hluti m.a. í Glaumbæ í Skagafirði.