Fréttir

Aðfaranótt þriðjudagsins 13. september lögðu þrettán leikmenn og tveir þjálfarar (Aron M. Björnsson og José María Costa) körfuknattleiksdeildar Tindastóls af stað til að taka þátt í 30. Torneo de Baloncesto, gríðarsterku og sögufrægu körfuboltamóti í Höfuðborg Tenerife. Til að ferja liðið með sem bestu þægindum í flugið til Keflavíkur valdist laglegur hvítur Benz kálfur af ´91 árgerð keyrður rétt sunnan við 2 milljón kílómetra. Til að stýra herlegheitunum og tryggja verðmætan farminn var leikreyndasti leikmaður liðsins með rétt um 200 leiki, Svavar Atli Birgisson fenginn til að keyra stystu leið upp að flugvél.

Það fróðlega við að taka þátt í forvali VG nú á síðustu vikum sumars er að fara um hið víðfeðma Norðvesturkjördæmi og hitta fólk. Allt frá Hvalfjarðarbotni um Akranes, Borgarfjörð, Snæfellsnes og Dali , um sunnan verða Vestfirði, frá Patreksfirði til Ísafjarðar, um Strandir, Hólmavík í Árneshrepp, um Húnavatns- og Skagafjarðasýslur, norður í Fljót að austan og víðar.

Í síðastliðinni viku var samstarfssamningur milli atvinnuvega- og nýsköpunarráðuneytisins og Fisktækniskóla Íslands um áframhaldandi stuðning við eflingu og uppbyggingu náms í fisktækni undirritaður. Á vef ráðuneytisins segir að það hafi styrkt þetta verkefni frá árinu 2014 og á þessu ári verður grunnnám í fisktækni í boði á Sauðárkróki , Höfn í Hornafirði og Dalvík.

Sjálfstyrkingarnámskeiðið Konur eru konum bestar verður haldið í safnaðarheimili Sauðárkrókskirkju þriðjudagana 27. september og 4. október. Námskeiðið er þátttakendum að kostnaðarlausu. Sr. Sigríður Gunnarsdóttir, sóknarprestur á Sauðárkróki, segir að að námskeiðið sé liður í safnaðarstarfinu, að bjóða upp á eitthvað uppbyggilegt.

Dagsetningar keppnisdaga í KS-Deildinni fyrir veturinn 2017 liggja nú fyrir. Sjö lið keppa í deildinni og eru fjórir knapar í hverju liði. Þrír knapar úr hverju liði keppa í hverri grein. Það lið sem fær fæst stig eftir veturinn fellur úr deildinni. Árangur keppnisliða og einstaklinga er mældur í stigum.

Byggðaráð Svf. Skagafjarðar hefur lagt til að kjörstaðir í Sveitarfélaginu Skagafirði vegna kosninga til Alþingis sem ráðgerðar eru 29. október 2016 verði eftirtaldir:Skagasel, Bóknámshús FNV, Félagsheimilið Árgarður, Grunnskólinn á Hólum, Félagsheimilið Höfðaborg, Grunnskólinn á Sólgörðum, Varmahlíðarskóli og Heilbrigðisstofnun Norðurlands á Sauðárkróki.

Eins og Feykir greindi frá á dögunum hafa Austur-Húnvetningurinn Hjalti Jónsson og kona hans, Lára Sóley Jóhannsdóttir, sent frá sér sína aðra plötu, Árbraut. Var hún plata vikunnar á Rás 2. Tónlistargagnrýnandinn Arnar Eggert Thoroddsen rýnir í verkið og birtist gagnrýnin á vefnum ruv.is. Það er innihaldi plötunnar lýst sem þekkilegri og ljúfri þjóðlagatónlist með klassískum blæ.

Héraðsfréttablöð eru hverju samfélagi mikilvæg og við í Norðvesturkjördæmi gætum ekki hugsað okkur að vera án blaða eins og Feykis, Skessuhorns og Bæjarins besta, svo dæmi séu tekin. Það er líka gaman að lesa alvöru fréttir um alvöru fólk en ekki einungis þá sem prýða forsíðu glanstímarita. Duglegt og skapandi fólk í héraði fær gjarnan mikið pláss í héraðsfréttablöðum og héraðsfréttablöðin eru öflugur auglýsingamiðill. Ég les öll þessi blöð og hef gaman af.

Aðfaranótt sunnudags féll aurskriða á veginn milli Fagraness og Hólakots á Reykjaströnd eftir mikinn rigningardag. Flóðið var það mikið að bílar komust ekki um. Rúnar Pétursson yfirverkstjóri hjá Vegagerðinni segir það hafa tekið allan sunnudaginn að gera veginn færan og tókst það um kvöldmatarleytið.

„Við gerum ráð fyrir að slátra svipuðu magni og í fyrra,“ segir Ágúst Andrésson forstöðumaður Kjötafurðarstöðvar KS en þar hófst sláturtíðin í gær. Hjá SAH Afurðum á Blönduósi hófst hún þann 7. september og lýkur þann 28. október nk.