Fréttir

Lokamót Húnvetnsku liðakeppninnar fer fram í Þytsheimum á Hvammstanga nk. föstudag, þann 1. apríl. Keppt verður í tölt og skeið. „Hvetjum alla til að mæta á lokamótið í ár og hvetja keppendur til dáða, fá sér grillkjöt á flottu verði hjá frábæru konunum í kaffinefndinni og skola því niður með góðu glasi,“ segir á vef hestamannafélagsins Þyts.

Nýlega voru keyptir tveir lyftustólar í setustofu sjúkrahúss HVE á Hvammstanga. Var það gert fyrir ágóðann af opnun kaffihússins Kaffi Kandís á sjúkrahúsinu, sem er gert tvisvar á ári, annars vegar þegar litli jólabasarinn er haldinn í nóvembermánuði og svo hins vegar á vormánuðum samhliða listsýningu sem sýnd er á gangi sjúkrahússins. Hefur þetta verið aðalfjáröflun fyrir félagsstarfið sem fer fram á sjúkrahúsinu, sem er bæði fyrir vistmenn og dagþjónustufólkið. norðanátt.is greinir frá.

Sveitarfélagið Skagaströnd stefnir á áframhaldandi lagningu ljósleiðara í Sveitarfélaginu. Samkvæmt fréttatilkynningu á vef sveitarfélagsins er gert ráð fyrir að lögbýlum, íbúðar- og frístundahúsum í dreifbýlinu við Skagaströnd bjóðist að fá ljósleiðaratengingu. Um er að ræða húsin Laufás, Réttarholt, Sólvang, Ásholt, Ás, Litla Fell og frístundahúsið Snorraberg. „Óskað er eftir viðbrögðum umræddra húseigenda ef þeir hafa ekki áhuga á ljósleiðaratengingu,“ segir í tilkynningu frá sveitarstjóra.

Atkvæði hafa verið talin í atkvæðagreiðslu bænda um nýja samninga um starfsskilyrði nautgripa- og sauðfjárræktar en frestur til að greiða atkvæði rann út á miðnætti þriðjudagskvöldið 22. mars. Bændur samþykktu báða samningana.

Fimmtudaginn 17. mars sl. voru opnuð tilboð í nýjan vatnstank og viðbyggingu við lokahús á Gránumóum á Sauðárkróki. Samkvæmt fundargerð Veitunefndar Sveitarfélagsins Skagafjarðar frá 23. mars sl. bárust tvö tilboð í verkið.

Tekin hefur verið í notkun ný deild við leikskólann Birkilund. Á vef Sveitarfélagsins Skagafjarðar kemur fram að deildin hafi hlotið nafnið Reyniland og er staðsett þar sem áður var pósthús í Varmahlíð. Í dag eru átta börn á Reynilandi ásamt starfsfólki.

Ung stúlka féll af hest­baki í reiðhöll­inni á Hvammstanga í gær. Samkvæmt heimildum mbl.is var stúlkan flutt á Land­spít­alann með þyrlu Land­helg­is­gæsl­unn­ar.

KS-Deildin heldur áfram nk. miðvikudagskvöld í Svaðastaðahöllinni á Sauðárkróki þegar keppt verður í gæðingafimi og hefst keppnin kl. 19:00. „Frábærir hestar eru skráðir og hlökkum við til að sjá sem flesta í höllinni á miðvikudaginn,“ segir í fréttatilkynningu.

Það var boðið upp á taumlausa skemmtun og farsælan endi í Síkinu í kvöld þegar Keflvíkingar komu sperrtir til leiks eftir að Stólarnir höfðu, að sögn körfuboltaspekinga landsins, kveikt neistann í Keflvíkingum í síðasta leik sem Suðurnesjamennirnir unnu örugglega. Sú tíra var ekki lengi að slokkna því leik var nánast lokið eftir fyrsta leikhluta. Lokatölur í Síkinu 98-68 fyrir Tindastól sem hefurþví tryggt sæti sitt í fjögurra liða úrslitunum.