Fréttir

Sumarhúsaeigandi í Fljótum hafði samband við Feyki og vildi koma því á framfæri að ástand á ruslagámum þar í sveit væri fyrir neðan allar hellur. Sendi viðkomandi Feyki meðfylgjandi mynd og nefndi að vegur að þremur sumarbústöðum lægi í gegnum sorpsvæðið.

Opna íþróttamót Þyts 2016 fór fram á Kirkjuhvammsvelli á Hvammstanga, félagssvæði Þyts, 19. og 20. ágúst sl.. Þátttaka var ágæt og þetta er síðasta mót sumarsins, að sögn Kolbrúnar Stellu Indriðadóttur, formanns Þyts.

Síðast liðið vor bauð júdódeild Ármanns í Reykjavík Tindastóli að slást í hópinn á æfingabúðir í júdó til Linköping í Svíþjóð. Fimm iðkendur júdódeildar Tindastóls á aldrinum níu til þrettán ára þáðu boðið og urðu samferða fimm iðkendum Ármanns á aldrinum þrettán til sextán ára, ásamt þjálfurum beggja félaga.

Ökumaður bif­reiðar, 55 ára karlmaður, lést þegar bíll hans fór í höfnina á Hvammstanga á fimmta tímanum síðdegis í dag. Þetta kemur fram í tilkynningu frá lögreglunni á Norðurlandi vestra.

Föstudagskvöldið, 26. ágúst kl. 21:00, verða tónleikar í Héðinsminni þar sem hjónin á Tjörn í Svarfaðardal, Kristjana og Kristján, skemmta á sinn einstaka hátt. „Þau eru löngu landskunn og það er einfaldlega mannbætandi að hlýða á þau og njóta tónlistarinnar,“ segir í auglýsingu í Sjónhorninu sem kom út í dag.

Bæjarbúar Skagastrandar og nágrennis munu gera sér glaðan dag um helgina en þá verður bæjarhátíðin Skagginn haldin í annað sinn. Að sögn Sigurlaugar Láru Ingimundardóttur, formanni Tómstunda- og menningarmálanefndar, fundu skipuleggjendur hátíðarinnar fyrir mikilli ánægju með hátíðina í fyrra og því var ákveðið að hafa hátíðina í ár með svipuðu sniði.

Áskorendamótið á Dæli í Víðidal verður haldið föstudaginn 26. ágúst næstkomandi. Mótið hefst klukkan 18:00. Samkvæmt fréttatilkynningu verður mótið með sama hætti og í fyrra, keppt verður í fimmgangi, fjórgangi, tölti og tölti T2.

Myndband sem Sauðkrækingurinn Daníel Þórarinsson setti á fésbókarsíðu sína nýlega hefur vakið mikla athygli en þar opnar hann hjarta sitt fyrir almenningi er hann opinberlega kemur út úr skápnum. „Ég er að opna mig með mínar tilfinningar, sem hljóðar þannig að ég fæddist aðeins öðru vísi en flestir aðrir,“ segir Daníel í myndbandinu. Þegar þetta er skrifað hafa 22 þúsund manns skoðað myndbandið.

Til stendur að endurbyggja mylluhúsið í Kirkjuhvammi við Hvammstanga næstu misserin og stendur áhugahópur um mylluna að þeim framkvæmdum. Myllan sem nú stendur uppi í Kirkjuhvammi var endursmíðuð af Jóni Ágústssyni og Birni Þ. Sigurðssyni, Bangsa, árið 1996.

Jóhanna María Sigmundsdóttir er yngsti Alþingismaður Íslandssögunnar, en hún komst nokkuð óvænt inn á þing sem fjórði þingmaður Framsóknarflokksins í Norðvesturkjördæmi við kosningarnar 2013.