Fréttir

Sigrún Magnúsdóttir, umhverfis- og auðlindaráðherra, hefur að höfðu samráði við Ragnheiði Elínu Árnadóttur, iðnaðar- og viðskiptaráðherra, ákveðið að leggja fram á Alþingi tillögu til þingsályktunar um vernd og orkunýtingu landsvæða. Tillagan er samhljóða niðurstöðum verkefnisstjórnar 3. áfanga rammaáætlunar, sem skilaði ráðherra lokaskýrslu sinni síðastliðinn föstudag. Greint er frá þessu á vef Umhverfisráðuneytisins.

Það verður margt um að vera í kringum stóðsmölun í Laxárdal í Húnavatnshreppi helgina 16.-18. september. Dagskráin stendur alla helgina og teygir sig m.a. í Laxárdal, Skrapatungurétt og á Blönduós, og ber yfirskriftina Hestar, handverk og hamingja.

Nýju aðstöðuhúsi var komið fyrir við kirkjugarð Sauðkrækinga á Nöfum um síðustu helgi. Því er ætlað að hjálpa til við að auka þjónustu við almenning s.s. með almennri upplýsingagjöf vegna garðsins og salernisaðstöðu sem ekki hefur verið til staðar.

KÍTÓN er félag kvenna í tónlist og var það stofnað árið 2012, eftir að í ljós kom að einungis 4% tilnefninga til íslensku tónlistarverðlaunanna það árið féllu í hlut kvenna. „Tilgangur félagsins er að skapa jákvæða umræðu, samstöðu og samstarfsvettvang meðal kvenna í tónlist. Þeim tilgangi er náð með auknum sýnileika, viðburðum og stöðugu samtali við tónlistarkonur á Íslandi,“ sagði Harpa Fönn, verkefnastýra og varaformaður KÍTÓN, í samtali við Feyki. Einn slíkur viðburður, svokölluð tónsmiðja, verður haldinn á Hvammstanga dagana 4.-9. september næstkomandi.

Rallý Reykjavík, fjórða umferð í íslandsmótinu í rallý fór fram dagana 25. – 27. ágúst sl. Um var að ræða afar langa keppni þar sem eknir voru um 1.000 km á þremur dögum en þar af rúmlega 300 á sérleiðum. Ekið var víðs vegar um Suður- og Vesturland, m.a. um Kaldadal, Djúpavatn og í nágrenni Heklu. Sex félagar úr bílaklúbbi Skagafjarðar tóku þátt, en lentu í basli með bíla sína og náði því ekki inn í baráttuna um verðlaunasætin.

Hugtakið út á landi gætur bæði verið ógurlega krúttlegt í huga fólks en jafnframt eins og versta klúryrði. Þegar fólk talar um að fara í sæta sumarhúsið sitt út á landi, fallega einbýlishúsið sem staðsett er á besta stað í miðbæ Patreksfjarðar þá er hugtakið ógurlega krúttlegt. En þegar umræðuefni snýst um að hafa stofnun eða þjónustu á vegum ríkisins staðsetta út á landi verða margir eins og andsetnir og hreinlega tjúllast.

Á föstudagskvöldið var haldið kappreiðamót á Sauðárkróki og um leið var boðið í grill þeim starfsmönnum sem unnu í sjálfboðavinnu á Landsmótinu og vormóti Skagfirðings. Einnig var öllum öðrum félögum einnig boðið að vera með og njóta veitinga fram eftir kvöldi. Á kappreiðamótinu var keppt í greinum sem ekki hafa verið mikið brúkaðar síðustu ár/áratugi. Úr varð hin skemmtilegasta samvera og upplifun og vill stjórn Skagfirðings þakka félögum fyrir þeirra framlag.

Næsta laugardag, þann 3. september, verður prófkjör Sjálfstæðisflokksins í Norðvesturkjördæmi haldið en það er liður í undirbúningi flokksins fyrir alþingiskosningarnar í haust. Alls gefa 10 frambjóðendur kost á sér til að taka sæti á lista og er þarna er á ferðinni öflugur hópur einstaklinga sem munu leggja sig alla fram við það að stuðla að bættum lífskjörum fólks og treysta frekar skilyrði til atvinnuuppbyggingar í kjördæminu á grundvelli sjálfstæðisstefnunnar.

Nú stendur yfir kosning í forvali Vinstri grænna í Norðvesturkjördæmi fyrir komandi Alþingiskosningar. Ég býð mig fram til að leiða listann í 1. sæti. Skráðir félagar 21. ágúst sl. hafa rétt til þátttöku og hafa fengið kjörseðla með nöfnum frambjóðenda og raða í 6 efstu sætin. Kjörseðilinn þarf að setja í póst í umslögum sem fylgja. Umslagið þarf að stimplast í síðasta lagi mánudaginn 5. september. Mikilvægt er að svæðið, kjördæmið og landsbyggðin öll hafi öfluga talsmenn á Alþingi.

Feykir gerði samning við Landsbókasafn í vor um að mynda þær síður blaðsins sem ekki voru til í stafrænu formi. Nú hafa þær verið birtar á vefnum, alls um tíu þúsund síður. Feykir er því orðinn aðgengilegur á vefsíðunni timarit.is, frá fyrsta tölublaði sem kom út 10. apríl 1981 til ársins 2009. Það sem eftir stendur, til september 2015, mun verða birt á vefnum í september og svo uppfært árlega eftir það.