Fréttir

Hin árlega Bjórhátíð verður haldin í sjötta sinn að Hólum í Hjaltadal næstkomandi laugardag. Eins og áður munu íslenskir bjórframleiðendur mæta og kynna sínar vörur, nýjungar á bjórmarkaðnum og svo vonandi hvað er væntanlegt.

Það er óhætt að segja að gleðin hafi verið við völd þegar árviss Gleðiganga Árskóla á Sauðárkróki fór fram í blíðaskaparveðri í gærmorgun. Lítríkir nemendur og starfsfólk fylktu liði frá skólanum að túninu við HSN á Sauðárkróki þar sem þeir brugðu á leik, sungu og dönsuðu við áhorf heimilis- og starfsfólk stofnunarinnar, áður en þau héldu áfram leið sinni niður í bæ. Gleðigangan endaði svo með grillveislu við Árskóla.

Hestamannafélagið Skagfirðingur býður börnum, unglingum og ungmennum sem stefna á úrtöku fyrir Landsmót boðið upp á æfingartíma. Æfingar fara fram föstudaginn 3. og laugardaginn 4. júní á Hólum í Hjaltadal. Kennarar verða Pétur Örn Sveinsson og Heiðrún Ósk Eymundsdóttir.

Tónlistarkonan Harpa Þorvaldsdóttir er uppalin á Hvammstanga en býr nú í Reykjavík. Harpa er dóttir Þovaldar Böðvarssonar, fyrrum rekstrarstjóra Vegagerðarinnar á Norðurlandi vestra, og Hólmfríðar Skúladóttur. Harpa hefur sungið síðan hún man eftir sér en hljóðfærið hennar er píanó. „Hef ekki geta skilið það við mig frá því ég byrjaði að læra 6 ára gömul,“ segir Harpa, en hún kemur fram á tónleikum á Hvammstanga þann 4. júní til styrktar Menningarfélagi Húnaþings vestra.

Knattspyrnudeild Tindastóls hefur auglýst æfingadagskrá sumarsins í Sjónhorninu í dag en æfingar hefjast næstkomandi mánudag. Í auglýsingunni segir að æfingar 6. flokks sé kl. 13:10 og 7. flokks 8:10 en því mun vera öfugt farið, rétt er að 6. flokkur mun æfa kl. 8:10 og 7.fl. er kl. 13:10.

Fjölbrautaskóla Norðurlands vestra var slitið í 37. sinn við hátíðlega athöfn í íþróttahúsinu á Sauðárkróki laugardaginn 28. maí síðastliðinn að viðstöddu fjölmenni. Alls brautskráðust 72 nemendur.

Sveitarstjórn Húnavatnshrepps samþykkti á fundi sínum þann 15. apríl að ljósleiðaravæða sveitarfélagið. Í fundargerð frá 15. apríl kemur fram að sveitarfélagið hafi fengið 84 millj.kr. styrk til framkvæmdarinnar frá Fjarskiptasjóði, í gegnum verkefnið Ísland ljóstengt sem tekur mið af markmiði ríkisstjórnarinnar og til útbreiðslu háhraða nettenginga.

Þann 29. apríl síðastliðinn varði Skagfirðingurinn Dagur Þór Baldvinsson lokaritgerð sína í Sjávarútvegsfræði við Háskólann á Akureyri sem fjallaði um áhrif skurðarhraða og stærðar fisks á flakagæði þorsks. Um er að ræða samstarfsverkefni milli FISK Seafood og Vélfags í Ólafsfirði sem unnið var hjá Iceprotein.

Í dag hófst vinabæjamót í Skagafirði en um 30 manns frá hinum Norðurlöndunum komu í fjörðinn í gærkvöldi. Vinabæirnir eru Espoo í Finnlandi, Køge í Danmörku, Kristianstad í Svíþjóð og Kongsberg í Noregi. Mótið stendur til 2. júní.

Búvörusamningur og tollasamningurinn við Evrópusambandið eru til umfjöllunar í nefndum Alþingis. Hægt er að gagnrýna báða þessa samninga út frá mörgum sjónarmiðum. Eins og komið hefur fram hefur tollasamningurinn ekki verið unninn í neinu samráði við bændur, aðra hagsmunaaðila, neytendur eða aðra flokka en þá flokka sem sitja í ríkisstjórn.