Íþróttir

„Þarna mætti liðið sem við reiknuðum með í byrjun,“ segir Ingólfur Jón Geirsson stjórnarmaður í körfuknattleiksdeild Tindastóls eftir góðan sigur Stólanna á grönnum sínum Þór frá Akureyri 94-82 á Sauðárkróki í gærkvöldi. Mamadou Samb var stigahæstur Stóla með 25 stig, Pétur Rúnar Birgisson 20 og Cristopher Caird setti16 stig. Pape Seck annar Senegalanna í liðinu lék í tæpar 16 mínútur í gær og skoraði 11 stig.

Donni, Halldór Jón Sigurðsson, hefur verið ráðinn þjálfari meistara- og 2. flokks kvenna Þórs/KA til næstu þriggja ára. Vangaveltur voru um að hann tæki að sér þjálfun meistaraflokks Tindastóls þar sem hann ásamt fjölskyldu sinni er að flytja á Krókinn. Donni hefur undanfari tvö ár þjálfað karlalið Þórs á Akureyri við góðan orðstír.

Gróska íþróttafélag fatlaðra í Skagafirði í samvinnu við Íþróttasamband fatlaðra mun standa fyrir Íslandsmóti í Boccia einstaklingskeppni, dagana 15.-16. október nk. Mótið fer fram í íþróttahúsinu á Sauðárkróki og hefst mótsetning kl. 20:00 föstudagskvöldið 14. okt.

Húnavallaskóli er á meðal þriggja grunnskóla sem dregnir voru út í Norræna skólahlaupinu 2016. Hver þessara skóla fær 100.000 króna inneign í Altis, sem selur vörur til íþróttaiðkunar og munu vörurnar nýtast nemendum á skólalóðinni eða í íþróttahúsinu.

Tindastóll lék fyrsta leik sinn í Dominos-deildinni í kvöld og sótti heim vængbrotið lið Íslandsmeistara KR. Talsverðar væntingar eru gerðar til Tindastóls-liðsins fyrir tímabilið en þeir voru flengdir af flottu KR-liði með Brynjar Björn og Sigurð Þorvalds sjóðheita. Lið KR var fjórum stigum yfir í hálfleik en sigraði að lokum 98-78.

Við brotthvarf litla íþróttasalarins við gamla barnaskólann á Sauðárkróki hefur aðsókn í íþróttahúsið aukist svo um munar að það annar ekki eftirspurn eftir tímum í húsinu. Vegna þess sem og hvernig vetraræfingastaða íþróttafólks er háttað í dag ákvað byggðarráð Sveitarfélagsins Skagafjarðar að beina því til sviðstjóra veitu- og framkvæmdasviðs að hafin verði hönnun og kostnaðarmat þess að setja gervigras á norðurhluta æfingasvæðis við íþróttavöllinn á Sauðárkróki.

Tindastóll-TV stóð vaktina með glæsibrag síðasta vetur þegar hver einasti heimaleikur meistaraflokks Tindastóls í körfunni var sýndur í beinni útsendingu á Netinu auk margra útileikja. Nú er komið að því að endurnýja tæknibúnað og reyna að fjármagna verkefnið.

Um síðustu helgi hélt skotfélagið Ósmann skotvopnanámskeið á vegum Umhverfisstofnunar og er það í fyrsta skiptið í nokkurn tíma sem slíkt námskeið hefur verið haldið á Sauðárkróki. Eftir námskeiðið hafa þátttakendur aflað sér réttinda til notkunar á skotvopnum, svokölluð A- réttindi.

Króksbrautarhlaupið fór fram í blíðskaparveðri sl. laugardag en þá hlupu, gengu eða hjóluðu um 70 manns um 1500 kílómetra samanlagt. Skokkhópur Árna Stef., sem heldur utan um viðburðinn, vill koma á framfæri þökkum til fyrirtækja og einstaklingum fyrir þeirra framlag. Sérstakar þakkir fá Suðurleiðir fyrir akstur á hlaupadegi.

Lokahóf knattspyrnudeildar Tindastóls var haldið sl. laugardag og óhætt að segja að góðri uppskeru var fagnað. Bæði lið meistaraflokka, kvenna og karla, áttu góðu gengi að fagna. Srákarnir urðu deildarmeistarar 3. deildar með fádæma yfirburðum og stelpurnar unnu sinn riðil í 1. deild einnig með miklum yfirburðum.