Skagafjörður

Stjórnstöð Landhelgisgæslunnar barst um áttaleytið í gærkvöldi neyðarkall frá bát sem var að veiðum á utanverðum Skagafirði. Leki var kominn að bátnum og útlit fyrir að skipverjarnir tveir þyrftu að yfirgefa hann. Öllum nærstöddum skipum var beint að bátnum ásamt því að þyrla Landhelgisgæslunnar og björgunarskip Slysavarnafélagsins Landsbjargar á Skagaströnd og Siglufirði héldu á vettvang. Þá var Herkúlesflugvél frá bandaríska flughernum send til leitar.

Skagfirðingar fjölmenntu í Borgarnes sl. fimmtudag þegar Skallagrímsmenn tóku á móti Tindastóli í Dominos deildinni í körfubolta. Mikil stemning var á leiknum og stuðningsmannasveitin Grettir stóð fyrir sínu og sem fyrr, líkt og sjötti maður Stólanna. En það setti blett á annars góða stuðningsmenn að einhverjir supu áfengið meira en þeir sjálfir þoldu og voru gestunum ekki til fyrirmyndar. Formaður Grettis, en svo heitir sveitin, sendi frá sér afsökunarbeiðni í gær enda ekki sú ásýnd sem hún vill standa fyrir, sem sýnd var í Fjósinu í Borgarnesi.

Sól og blíða var á Króknum þegar furðuverur gengu um bæinn og sungu fyrir nammi á öskudaginn. Eftir morgunröltið var kötturinn, eða kannski kötturinn í sekknum, sleginn úr tunnunni, og yngstu krakkarnir slógu úr kassanum, í íþróttahúsinu. Í meðfylgjandi myndbandi má sjá margvíslega söngvara sem komu í afgreiðslu Nýprents og létu ljós sitt skína.

„Við hjónin höfum afskaplega gaman af því að elda og borða góðan mat. Indverskur matur er í miklu uppáhaldi og þegar við eldum hann þá viljum við gera sem mest frá grunni sem tekur stundum dágóðan tíma en er alveg afskaplega gott,“ segja þau. „Þegar við eldum þá erum við sjaldnast með forrétt, höfum frekar fleiri tegundir af meðlæti. Það er líklega bara á jólum og áramótum sem við erum með forrétti, og örfá önnur hátíðleg tækifæri. Við eigum nokkrar uppáhalds indverskar uppskriftir sem við höfum sankað að okkur í gegnum tíðina. Máltíðin sem við deilum með lesendum Feykis er í sérstöku uppáhaldi og er elduð reglulega á heimilinu. Indverskur kjúklingur með einföldu meðlæti. Uppskriftin er komin frá vinkonu okkar, Svanbjörgu Helenu Jónsdóttur, sem að okkar mati er Martha Stewart okkar Íslendinga. Frábær kokkur sem nær að galdra fram kræsingar nánast fyrirhafnarlaust. Þessi máltíð var ein sú fyrsta sem ég eldaði fyrir Alfreð þegar við vorum að kynnast á sínum tíma og hefur líklega orðið til þess að hann fékk á mér matarást sem hefur ekki dofnað síðan.

Þar sem ís er aftur kominn á Svínavatn hefur verið ákveðið, með skömmum fyrirvara, að efna til ísmóts á sunnudaginn, 5. mars klukkan 13:00. Keppt verður í tölti í opnum flokki, flokki áhugamanna og 16 ára og yngri svo sem verið hefur. Riðin verður ein ferð á hægu tölti, tvær ferðir hraðabreytingar og ein ferð á yfirferðartölti.

Tindastólsmenn heimsóttu Skallagrímspilta í Borgarnesi í gær í 20. umferð Dominos-deildarinnar. Reiknað var með hörkuleik, enda liðin í hörkubaráttu á sitt hvorum enda stigatöflunnar, og stuðningsmenn liðanna voru ekki sviknir. Leikurinn var jafn og spennandi allan tímann, Skallarnir yfirleitt með nauma forystu en á lokamínútunum reyndust Stólarnir sterkari og lönduðu góðum sigri í Fjósinu, 81-88.

Þann 25. mars nk. verður haldin hátíðardagskrá í Eldborgarsal Hörpu sem tileinkuð er íslensku Vesturförunum og afkomendum þeirra. Hátíðin er liður í verkefni sem Vesturfarasetrið á Hofsósi og Karlakórinn Heimir í Skagafirði standa að og nefnist Kveðja frá Íslandi.

Sveitarfélögin Skagaströnd, Skagafjörður, Húnaþing vestra og Akrahreppur hafa ákveðið að starfrækja í sameiningu Náttúrustofu Norðurlands vestra, ásamt öðrum sveitarfélögum á svæðinu sem kunni að gerast aðilar að stofnuninni. Sveitarfélögin munu að lágmarki leggja til 30% af rekstrarkostnaði náttúrustofunnar á móti framlagi ríkisins og mun skipting framlaganna verða í hlutfalli við íbúafjölda þeirra.

Skagfirðingurinn Indriði Ragnar Grétarsson var kjörinn nýr formaður Skotveiðifélags Íslands, Skotvís, á aðalfundi félagsins sem fram fór laugardaginn 25. febrúar sl. Tekur hann við af Dúa J. Landmark en Indriði hefur verið í stjórn síðan 2012 og verið varaformaður félagsins síðustu tvö ár.

Starfsfólk sundlauga og íþróttahúsa í Skagafirði sátu í dag námskeið í meðferð slökkvitækja hjá Brunavörnum Skagafjarðar. Leiðbeinendur voru þeir Hreiðar Örn Steinþórsson og Guðmundur R. Guðmundsson, slökkviliðsmenn. Þátttakendur á námskeiðinu voru 16 talsins. Á námskeiðinu var farið yfir ýmsar tegundir slökkvitækja og við hvaða aðstæður hver tegund hentar best.