Skagafjörður

Það er mikið um að vera á höfninni á Sauðárkróki þessa dagana en margir stærri bátar hafa landað afla sínum þar. Þrír bátar sjávarútvegsfyrirtækisins Vísis í Grindavík munu landa afla sínum á Króknum fram að áramótum en þeir sækja miðin fyrir norðan land.

Þann 14. júlí sl. fæddist unga parinu Nökkva Má Víðissyni frá Kjarvalsstöðum í Hjaltadal og Önnu Baldvinu Vagnsdóttur frá Minni-Ökrum í Blönduhlíð sonur. Við fæðingu var drengurinn aðeins 1688 grömm eða tæplega sjö merkur, enda fæddur sjö vikum fyrir tímann. Barnið var tekið með bráðakeisaraskurði þar sem hreyfingar þess höfðu minnkað og það hætt að stækka auk þess sem lítið legvatn var eftir. Að fæðingunni lokinni tjáði barnalæknir þeim að þar hefði hver mínúta skipt máli og hefði verið beðið mikið lengur hefðu lífslíkur barnsins verið litlar.

Nú er Heimsmeistaramóti íslenska hestsins, sem fram fór í Oirschot í Hollandi, lokið. Þrír Skagfirðingar voru meðal keppenda, þeir Finnbogi Bjarnason, Þórarinn Eymundsson og Jóhann Skúlason og náðu þeir afbragðs árangri.

Sveitarfélagið Húnaþing vestra hefur ákveðið að leggja nemendum til námsgögn, þeim að kostnaðarlausu, næsta skólaár.

Króksmót Tindastóls og FISK Seafood fór fram nú um helgina á Sauðárkróki. Þátttaka var með ágætum og óhætt að fullyrða að veðrið hafi verið Króksurum og gestum þeirra hliðhollt því varla er hægt að tala um að hreyft hafi vind svo nokkru næmi frá því að gestir tóku að streyma á Krókinn síðastliðinn föstudag í logni og heiðskýru og þangað til mótinu lauk – þá fór hinsvegar að rigna.

Unnið hefur verið að gerð lestrarstefnu Skagafjarðar sl. tvö ár sem verður kynnt öllu starfsfólki leik-, grunn- og tónlistarskóla á fræðsludegi sem haldinn verður í Miðgarði nk. þriðjudag. Svokölluð læsisteymi, sem í sátu fulltrúar leik-, grunn- og tónlistarskóla, hélt utan um vinnuna undir stjórn Sigurlaugar Rúnar Brynleifsdóttur, deildarstjóra við Grunnskólann austan Vatna.

Vélbáturinn Sæmundur SK 1, einkennisbókstafir TFOQ, var smíðaður hjá skipasmíðastöð í bænum Hällevikstrand í Svíþjóð árið 1946. Báturinn var smíðaður að tilstuðlan Ríkissjóðs Íslands. Þjóðernis og eignayfirlýsing gefin út í Goteborg, dags 9. maí árið 1946. Báturinn var keyptur nýr til Sauðárkróks og var kaupandinn Útgerðarfélag Sauðárkróks sem stofnað hafði verið árið 1945 og eru samþykktir þess félags dagsettar 8. júní 1945. Stjórn félagsins skipuðu: formaður Haraldur Júlíusson kaupmaður, Magnús Bjarnason kennari, Guðmundur Sveinsson fulltrúi, Gísli Vilhjálmsson útgerðarmaður og Kristófer Eggertsson skipstjóri, allir búsettir á Sauðárkróki.

Prjóna- og handverkskonan Helga Dóra Lúðvíksdóttir á Sauðárkróki sagði frá handavinnunni sinni í 26. tölublaði Feykis á þessu ári. Hún byrjaði ung að prjóna og gafst ekki upp þótt lykkjurnar sætu stundum fastar á prjónunum. Hún hefur líka gaman af mörgu öðru handverki eins og til dæmis steinakörlum og -kerlingum sem hún hefur unnið mikið með.

Sjósundskonurnar Harpa Hrund Berndsen og Sigrún Þuríður Geirsdóttir syntu Drangeyjarsund í dag. Sennilega er Drangeyjarsund (Grettissund) þekktasta sjósund sem synt hefur verið við Íslandsstrendur og þykir mikið afrek. Afrekið felst í því að synda um 7 km leið frá Drangey að Reykjanesi á Reykjaströnd án þess að klæða kuldann af sér, en sjórinn á þessum slóðum er frekar kaldur. Þegar þær syntu var hitastig sjávar á bilinu 9,5 - 10,5 gráður.

Íslenskir sauðfjárbændur horfa fram á þriðjungs lækkun á afurðaverði í haust, í kjölfar nærri 10% lækkunar á síðasta ári. Þessar lækkanir munu koma harkalega niður á sveitum landsins og bitna sérstaklega á yngri bændum. Bændur hafa þegar lagt út í nánast allan kostnað við lambakjötsframleiðslu haustsins og lækkun á afurðaverði er því hrein og klár launalækkun. Þessi launalækkun er 1.800 milljónir króna fyrir stéttina í heild ef hún gengur eftir sem horfir og bætist þá við 600 milljónir sem bændur tóku á sig í fyrra.