Skagafjörður

Þær Dagný Stefánsdóttir og Ragnheiður Þórarinsdóttir stefna á nýstárlega ræktun að Laugamýri í Skagafirði en þar er um að ræða samrækt fiska og grænmetis í lokaðri hringrás næringarefna. Fiskurinn, tilapia, býr til áburð fyrir grænmetið og svo er hann einn mest seldi matfiskur í heiminum.

Stólastúlkur fóru illa að ráði sínu í gærkvöldi þegar þær spiluðu við lið Hamranna frá Akureyri í fallbaráttu 1. deildar kvenna. Þrátt fyrir að vera sterkari aðilinn megnið af leiknum gáfu stelpurnar tvö ódýr mörk en skoruðu sjálfar aðeins eitt mark og 1-2 tap staðreynd. Það er ljóst að hafi verið brekka fyrir leik þá er það Brattabrekka núna.

Unglingalandsmót UMFÍ fer fram á Egilsstöðum um verslunarmannahelgina og búast keppnishaldarar við um og yfir 1.000 keppendum á aldrinum 11-18 ára ásamt foreldrum og forráðamönnum þeirra. Alls er gert er ráð fyrir allt að 10.000 gestum í bænum frá öllu landinu á meðan mótið fer fram dagana 4.- 6. ágúst og spáir Veðurstofa Íslands úrvals keppnisveðri, þurrki og logni.

Það voru þeir Jón Bjarni Hrólfsson og Sæmundur Sæmundsson sem stóðu uppi sem sigurvegarar í Ljómarallinu sem haldið var í Skagafirði um helgina en þeir óku Mitsubishi Lancer EVO 6.5. Tími þeirra var 1:15:50. Í öðru sæti enduðu Skagfirðingarnir Baldur Haraldsson og Katrín María Andrésdóttir á Subaru Impreza. Litlu mátti muna en þau voru aðeins einni sekúndu á eftir sigurvegurunum eða 1:15:51. Í þriðja sæti urðu þeir Baldur Arnar Hlöðversson og Hjalti Snær Kristjánsson á Subaru Impreza á tímanum 1:18:17.

Árvökulir Króksarar hafa efalaust tekið eftir að talsvert hefur verið framkvæmt til að fegra ásýnd bæjarins í sumar; blómaskrúð víða og aðgengi fyrir göngufólk bætt á Nöfum svo eitthvað sé nefnt og nú í síðustu viku var gerður stígur í Nafirnar frá neðra tjaldsvæði og upp á það efra – eða öfugt.

Atvinnu-, menningar- og kynningarnefnd Sveitarfélagsins Skagafjarðar hefur skoðað kosti iðnaðarhúsnæðis sem fyrirhugað er að byggja við Borgarflöt 17-19 á Sauðárkróki og telur það besta kostinn sem bráðabirgðahúsnæði fyrir muni Byggðasafns Skagfirðinga uns fullbúið varðveisluhúsnæði verður tekið í notkun. Nefndin mælir með því við byggðarráð að gengið verði til samninga um kaup á fullnægjandi rými að Borgarflöt 17-19.

Skagfirðingurinn Sigtryggur Arnar Björnsson, leikmaður Tindastóls í úrvalsdeildinni í körfubolta, spilaði á fimmtudaginn sinn fyrsta landsleik fyrir Íslands hönd en þá mætti Ísland liði Belgíu. Liðin léku síðan aftur í gær og er skemmst frá því að segja að Ísland vann báða leikina og átti Arnar fínar innkomur í báðum leikjum.

Nú styttist í að leikmannaglugginn lokist í fótboltanum og hafa Tindastólsmenn verið á fullri ferð við að tryggja sér leikmenn eftir að hafa misst þrjá góða. Að sögn Stefáns Arnars Ómarssonar, þjálfara Tindastóls, þá eru tveir erlendir leikmenn gengnir til liðs við Stólana og þar að auki hafa þrír fyrrum Tindastólsmenn skráð félagaskipti og reiknað er með að einn íslenskur leikmaður bætist í hópinn fyrir júlílok.

Lúpínan er umdeild planta á Íslandi, mjög öflug landgræðslujurt sem grætt getur upp víðáttumiklar auðnir á skömmum tíma en getur verið hinn mesti skaðvaldur í viðkvæmu gróðurlendi líkt og berjamó. Á vefnum Flóra Íslands segir að ef hún kemst í mólendi leggur hún það undir sig smátt og smátt og eyðir úr því öllum gróðri. Lúpínuna er víða að finna og er hún dugleg við að breiða úr sér af sjálfsdáðum með fræjum. Nú er svo komið að berjaland Sauðkrækinga er í hættu þar sem jurtin er farin að leggja það undir sig.

Prjónakonan Sandra Halldórsdóttir á Sauðárkróki deildi sýnishornum af verkum sínum í 21. tölublaði Feykis. Hún hefur alltaf haft gaman af hannyrðum og segist ekki geta slakað á nema hafa prjónana í höndunum.