Skagafjörður

Fyrirtækið Steinull hf. á Sauðárkróki fékk nýlega viðurkenningu frá VÍS fyrir góðan árangur í forvörnum og öryggismálum. Einar Einarsson framkvæmdastjóri Steinullar veitti verðlaununum viðtöku frá Sigrúnu Rögnu Ólafsdóttur forstjóra VÍS. Afhendingin fór fram á forvarnaráðstefnu VÍS og Vinnueftirlitsins á Grand Hóteli í Reykjavík síðastliðin fimmtudag.

Næsti fyrirlestur í fyrirlestraröðinni „Vísindi og grautur“ verður haldinn heima á Hólum í stofu 202, miðvikudaginn 10. febrúar nk. Guðrún Helgadóttir prófessor heldur erindi sem hún kallar: „Samfélagsleg áhrif ferðaþjónustu, þrjú tilvik úr dreifbýli“.

Á fundi fræðslunefndar Sveitarfélagsins Skagafjarðar þann 2. febrúar 2016 ítrekaði nefndin fyrri bókanir sínar um mikilvægi þess að framkvæmdum við nýja deild leikskólans Birkilundar verði hraðað svo sem verða má. Lýsti nefndin jafnframt áhyggjum af því hve verkið hefur dregist.

Nú er komið að vetrarfríi í skólunum í Skagafirði og breytist opnunartími sundlaugarinnar í Varmahlíð á meðan það stendur yfir. Fimmtudaginn 11. febrúar verður opið milli kl 14 og 21 og föstudaginn 12. febrúar verður lokað.

Alþingismennirnir Einar Kristinn Guðfinnsson og Haraldur Benediktsson boða til almenns fundar á Kaffi Krók, Sauðárkróki miðvikudaginn 10. febrúar nk. kl. 20. Á fundinn mætir einnig Ari Edvald, forstjóri MS og formaður atvinnumálanefndar Sjálfstæðisflokksins.

Það snjóar á Norðurlandi en samkvæmt vef Vegagerðarinnar eru þó flestir vegir vel færir og hreinsun vega langt komin. Enn er þó þungfært á Siglufjarðarvegi. Norðan 8-15 og él er á Ströndum og Norðurlandi vestra. Lægir smám saman á morgun. Frost 2 til 10 stig.

Meistaradeild Norðurlands kynnir nú til leiks þriðja liðið sem hefur boðað þátttöku sína í KS deildinni í vetur, en það er Hofstorfan / 66°norður. Liðstjóri er Elvar E. Einarsson og með honum eru Bjarni Jónasson, Lilja Pálmadóttir og Gústaf Ásgeir Hinriksson, en sá síðastnefndi kemur inn fyrir Tryggva Björnsson.

Minjastofnun Íslands auglýsti tvær stöður lausar í starfstöð sinni á Sauðárkróki á dögunum, annars vegar starf arkiteksts og hins vegar fornleifafræðings. Þá var staða fornleifafræðings við Minjastofnun í Reykjavík einnig auglýst laus til umsóknar. Umsóknarfrestur rann út þann 1. febrúar sl. Samkvæmt vef Minjastofnunar bárust 13 umsóknir um störfin þrjú og er verið að vinna úr umsóknum.

Á vef Sveitarfélagsins Skagafjarðar kemur fram að íbúum sveitarfélagsins hefur fjölgað undanfarið ár. Samkvæmt tölum úr þjóðskrá fór íbúafjöldinn lægst niður í 3884 íbúa í nóvember sl. en fjöldi íbúa var 3910 þann 1. janúar 2015 og eru nú orðnir 3928 talsins.

Tindastólsmenn héldu austur á Egilsstaði í gær þar sem þeir léku við lið Hattar í Dominos-deildinni í körfubolta. Lið Hattar situr á botni deildarinnar með aðeins einn sigur í vetur en nú á nýju ári hafa þeir alla jafna verið að spila hörkuleiki en mátt bíta í það súra epli að tapa leikjum sínum á ögurstundu. Það varð engin breyting á því í gær því Pétur Birgisson setti niður sigurþrist þegar tvær sekúndur voru eftir af leiknum og breytti stöðunni úr 81-81 í 81-84.