Skagafjörður

Bílaklúbbur Skagafjarðar vill vekja athygli á að nokkrir vegir í Skagafirði verða lokaðir tímabundið á morgun, föstudag og á laugardag, vegna keppni í þriðju umferð Íslandsmótsins í rallý. Lokunin er gerð með leyfi Vegagerðar og lögreglu.

Tindastólsstelpurnar fóru enga fýluferð á Vilhjálmsvöll á Egilsstöðum eða Villa Park eins og gárungarnir kalla völlinn. Þar mættu þær sameinuðu liði Fjarðarbyggðar, Hattar og Leiknis. Leikurinn reyndist hin mesta markaveisla en honum lyktaði með þremur mörkum gegn fimm, Tindastóli í vil. Nýráðinn leikmaður, Jesse Shugg skoraði þrennu í leiknum.

Hinn fjögurra vetra gæðingur, Dofri frá Sauðárkróki náði góðum árangri á nýliðnu Landsmóti hestamanna á Hólum en þar endaði hann í áttunda sæti fjögurra vetra stóðhesta. Dofri stóð þó efstur sem klárhestur. 



Opna Vodafone minningamótið um Friðrik lækni, heiðursfélaga í Golfklúbbi Sauðárkróks og einn af stofnendum GSS var haldið á laugdaginnvar í blíðskaparveðri. Alls tóku 29 keppendur þátt í mótinu en leikfyrirkomulag var höggleikur með forgjöf.

Mánudaginn í síðustu viku, þann 11. júlí, voru liðin 90 ár frá því að Vesturósbrú Héraðsvatna var vígð að viðstöddu miklu fjölmenni. Frá þessu segir á Facebooksíðunni Sauðárkrókur – bærinn undir Nöfunum.

Rallýáhugafólk leggur land undir fót um helgina en þriðja umferð íslandsmótsins í rallý fer fram í Skagafirði 22. og 23. júlí næstkomandi. Það er Bílaklúbbur Skagafjarðar sem heldur keppnina en hátt í tuttugu áhafnir eru skráðar til leiks. Eru þar á meðal helstu rallýkeppendur landsins.

Þyrla Landhelgisgæslunnar fór í leitarleiðangur yfir Norðurlandi í dag, til að ganga úr skugga um að ekki væru fleiri ísbirnir á svæðinu, eftir ísbjörn gekk á land við Hvalnes á Skaga í gær. Að sögn vaktmanns hjá Landhelgisgæslunni sást ekki til ísbjarna við leitina.

Ísbjörn sem gekk á land við bæinn Hvalnes á Skaga var felldur seint í gærkvöldi, um leið og leyfi barst frá lögreglu, að sögn ábúenda á bænum. Um 500 metra frá Höfðanum þar sem hans varð fyrst vart voru heimalningar í girðingu og börn að leik. Haft var samband við vana skyttu, Jón Sigurjónsson í Garði í Hegranesi og kom hann þegar á vettvang og felldi dýrið í einu skoti úr um 130 metra færi.

Það var leikið í rjómablíðu á Sauðárkróksvelli í dag en þá fengu Tindastólsmenn liðsmenn Kára af Akranesi í heimsókn. Lið Tindastóls var sterkari aðilinn í leiknum og uppskar sanngjarnan 1-0 sigur þrátt fyrir nokkra pressu gestanna undir lok leiks.

Hin árlega sumarmessa í Knappstaðakirkju í Stíflu í Fljótum var síðasta sunnudag. Fljótamenn, brottfluttir sem heimamenn, sumarbústaðareigendur og fleiri góðir gestir fjölmenntu til messu, þrátt fyrir slæma veðurspá. Rættist enda úr veðrinu og gátu þeir sem ekki komust inn í kirkjuna því setið í kirkjugarðinum á meðan messað var.