Skagafjörður

Heldur hefur lengst í gulu veðurviðvöruninn sem Veðurstofan skellti á Norðurland vestra í byrjun vikunnar. Fyrst átti hún að standa í um sólarhring, frá mánudegi til þriðjudags en nú þegar fimmtudagurinn rennur upp rennblautur og norðanbarinn þá er enn gul viðvörun og ekki útlit fyrir að henni verði aflétt fyrr en aðfaranótt föstudags.

Bændurnir á Lýtingsstöðum í Skagafirði hafa síðustu tuttugu og fimm árin rekið ferðaþjónustufyrirtæki þar sem áhersla hefur verið lögð á reynslu þeirra og þekkingu í hestamennsku í bland við þjónustu við ferðamenn þar sem þau hafa verið með einstaka upplifun á náttúru Íslands og miðlað sögu og menningu.

Snjórinn hefur víða gert bændum skráveifu síðustu daga líkt og Feykir hefur greint frá. Karólína í Hvammshlíð sendi okkur línu nú síðdegis og sagði stöðuna hjá sér þannig að hitinn væri rétt um frostmark og úrkoman sem til stóð að félli sem rigning, samkvæmt veðurspánni, er 100% snjór. Hún segist þó vera í góðum málum sem betur fer.

Byggðarráð Skagafjarðar ákvað á 148. fundi sínum þann 27. maí sl. að auglýsa til leigu þær lóðir á Nöfum sem hefur verið skilað inn. Fram kemur í tilkynningu á heimasíðu Skagafjarðar að umsækjendur skulu tilgreina í umsókn hvers konar not þeir hugsa sér að hafa af landinu og hvort þeir hafi leyfi til búfjárhalds í þéttbýli.

Vakin er athygli á því að sundlaugin í Varmahlíð opnar í dag miðvikudaginn 4. júní kl. 12:00, eftir tímabundna lokun vegna viðhaldsvinnu segir á vef Skagafjarðar.

„Það hefur aðeins lagast, fimm stiga hiti og rigning. Það hefur minnkað töluvert snjómagnið síðan í gær,“ sagði Halldór Gunnar bóndi á Molastöðum þegar Feykir fylgdi eftir fréttinni frá í gær þar sem fram kom að bændur í Fljótum hefðu allir sótt fé sitt og komið á hús, enda jörð komin undir snjó í þessu norðanskoti sem enn stendur yfir.

Bjórhátíðin á Hólum var haldin laugardaginn 31. maí en hátíðin fór fyrst fram í september 2011 og er sú hátíð sem oftast hefur verið haldin hér á landi. „Hún féll niður í Covid og hefur því verið haldin í þrettán skipti,“ segir Bjarni Kristófer en hann segir hátíðina hafa þróast úr hreinni bjórhátíð í bjór- og matarhátíð þar sem boðið er upp á fjölbreyttan götumat.

Það er enn rok og rigning í boði á Norðurlandi vestra en spár Veðurstofunnar gera ráð fyrir því að heldur dragi úr vætu og vindi þegar líður á daginn. Eitthvað örlítið hafa hitatölur þokast upp á við og því fellur úrkoman að mestu sem rigning en ekki snjór. Þó veðrið sé heldur að ganga niður gera spár ráð fyrir norðanátt og kulda svo langt sem spáin nær en þó er líklegt að við fáum svolitla sólargeisla á föstudaginn.

Kvennalið Þórs frá Akureyri mun ekki taka þátt í efstu deild körfunnar næsta vetur en stjórn félagsins hefur ákveðið að draga liðið úr keppni. „Við alla vega verðum með lið í efstu deild,“ sagði Dagur Þór Baldvinsson, formaður körfuknattleiksdeildar Tindastóls, þegar Feykir spurði hann út í áætlanir Tindastóls. Það verður því þannig næsta vetur að lið Tindastóls verður eina liðið af Norðurlandi til að halda upp merki Norðlendinga í Bónus deild kvenna.

Eins og komið hefur fram verða stjórnendaskipti í bæði Árskóla og FNV í vor. Ekki hefur verið tilkynnt hver verður skólameistari FNV, en Kristján Bjarni Halldórsson verið ráðinn skólastjóri Árskóla. Kristján hefur starfað sem áfangastjóri FNV, um árabil en færir sig nú norður fyrir Sauðána.