Skagafjörður

Heilbrigðisráðherra hefur ákveðið, í samræmi til tillögur sóttvarnalæknis, breytingar á reglum um samkomutakmarkanir sem taka munu gildi þann 13. janúar og gilda til 17. febrúar næstkomandi. Fjöldatakmörk verða 20 manns og heilsu- og líkamsræktarstöðvum verður gert kleift að hefja starfsemi á ný en með ströngum skilyrðum. Sama gildir um síðasvæðin. Íþróttastarf barna og fullorðinna verður heimilað að uppfylltum skilyrðum og sömuleiðis íþróttakeppnir án áhorfenda.

Nú um áramótin lét Kári Gunnarsson frá Flatatungu af störfum hjá Byggðasögu Skagafjarðar eftir gríðarmikið framlag til þessa mikla ritverks.

Það var sannarlega mikið um að vera þegar blaðamaður leit við í verknámshúsi Fjölbrautaskóla Norðurlands vestra í morgun en þar kepptist hópur nemenda við að æfa sig fyrir sveinspróf í húsasmíði sem fer fram í skólanum næstu daga.

Í ljósi aðstæðna í heiminum, hefur Króksblótsnefnd ákveðið að þorrablót Króksara, Króksblót 2021, sem átti að vera núna í febrúar næstkomandi, verði frestað fram til ársins 2022.

Út er komin 2. smáskífa Gillons af væntanlegri plötu. Lagið nefnist Fíll og köttur og var það upprunalega samið fyrir 16 árum er höfundur dvaldi syðra við nám. Upptökustjórn er sem fyrr í höndum Sigfúsar Arnars Benediktssonar, félaga Gísla úr Contalgen Funeral og er tekið upp í Stúdíó Benmen. Þar vinna þeir Fúsi og Gísli í 5. sólóplötu þess síðarnefnda og mun hún bera heitið Bláturnablús. Útgáfa er áætluð seinna á þessu ári.

Ingvi Hrannar Ómarsson, kennsluráðgjafi við Árskóla á Sauðárkróki, hefur verið ráðinn til starfa hjá mennta- og menningarmálaráðuneytinu en hann er einn fjögurra sem ráðnir hafa verið á skrifstofu skóla-, íþrótta- og æskulýðsmála. Tvö starfanna eru störf án staðsetningar í nýju skólaþróunarteymi ráðuneytisins og hafa þau Ingvi Hrannar og Donata H. Bukowska verið ráðin í þau.

Unnur Valborg Hilmarsdóttir, framkvæmdastjóri Samtaka sveitarfélaga á Norðurlandi vestra, segir í viðtali á N4 mikilvægt að samgöngumál, umhverfismál og atvinnumál með áherslu á nýsköpun verði áberandi í umræðunni í aðdraganda væntanlegra alþingiskosninga í haust. Unnur segir að þörf sé á stórauknum stuðningi af hálfu ríkisvaldsins til að styrkja átak sveitarfélaganna á starfssvæði samtakanna, svo sem á formi uppbyggingar innviða og ívilnana. 

Skíðasvæðinu í Tindastóli barst öflugur liðsauki síðastliðinn mánudag þegar nýr snjótroðari var afhentur formlega. Það var Viggó Jónsson frá fyrirtækinu Rafstillingu ehf. sem afhenti sveitarstjórn nýja troðarann og var það Sigfús Ingi Sigfússon, sveitarstjóri Sveitarfélagsins Skagafjarðar, sem tók við lyklunum.

Vilko ehf. á Blönduósi og Náttúrusmiðjan ehf. hafa keypt allt hlutafé í íslenska líftæknifyrirtækinu Prótis sem hefur verið í eigu Kaupfélags Skagfirðinga frá upphafi. Í tengslum við viðskiptin verður Kaupfélag Skagfirðinga fimmtungshluthafi í Vilko ehf. Eitt af markmiðum þessara viðskipta er að auka samstarf milli aðila.

Líkt og undanfarin ár stóð Feykir fyrir kjöri á manni ársins á Norðurlandi vestra. Blaðinu bárust sjö tilnefningar og gafst lesendum kostur á að velja milli þeirra. Þátttaka var góð og varð niðurstaðan sú að Bryndís Rut Haraldsdóttir í Varmahlíð hlaut flest atkvæðin í kosningunni. Bryndís er fyrirliði kvennaliðs Tindastóls sem sigraði Lengjudeild kvenna með miklum glæsibrag í sumar. Þar fór Bryndís fyrir sínu liði í hjarta varnarinnar sem fékk aðeins á sig sjö mörk í 17 leikjum. Í tilnefningu sem blaðinu barst segir meðal annars að Bryndís Rut hafi verið jákvæð og hugrökk, stjórnað sínu liði með góðu fordæmi og talanda og vart stigið feilspor á vellinum. „Hún er fyrsti fyrirliði knattspyrnuliðs í sögu Tindastóls sem leiðir lið sitt upp í efstu deild.“