Skagafjörður

Líkt og undanfarin ár stóð Feykir fyrir kjöri á manni ársins á Norðurlandi vetra. Gafst fólki kostur á að velja úr hópi þeirra sem tilnefndir voru af lesendum en nú bárust sex tilnefningar sem teknar voru til greina. Sigurður Hansen í Kringlumýri í Blönduhlíð hlaut flest atkvæði og ber því titilinn Maður ársins á Norðurlandi vestra.

Veðurstofa Íslands hefur gefið út veðurviðvaranir fyrir allt landið en hvasst er á Norður- og Austurlandi í dag, hríð og kalt í veðri. Suðaustan stormur með úrkomu verður á öllu landinu á morgun og hlýnar en hríðarviðvaranir eru í gildi á öllu landinu fyrir morgundaginn. Í athugasemd veðurfræðings segir að síðdegis á morgun hláni, svo gott sé að athuga með niðurföll þannig að vatn eigi greiða undankomuleið.

Nú liggur fyrir að ríflega 100 hross fórust í hamfaraveðrinu sem gekk yfir Norðurland vestra dagana 10.-12. desember 2019 og segir á heimasíðu MAST að um mestu afföll á hrossum í áratugi er að ræða. Sá fjöldi svarar til um 0,5% þeirra 20.000 hrossa sem ætla má að hafi verið á útigangi á þessu landssvæði.

Um miðjan desember birtist í samráðsgátt stjórnvalda skýrsla, sem unnin var að beiðni ráðuneyta Atvinnuvega- og nýsköpunarmála og Umhverfis- og auðlindamála. Í þessari skýrslu er fjallað um niðurstöður greininga á takmörkunum og áhrifum notkunar jarðstrengja á hæstu spennustigum flutningskerfa raforku. Í skýrslunni er til skoðunar meginflutningskerfi landsins, frá Brennimel í vestri norður um, austur og endað í Sigöldu.

Í gær, þann 1. janúar 2020, tók gildi ný reglugerð um sektir og önnur viðurlög vegna umferðarlagabrota til samræmis við ný umferðarlög nr. 77/2019 sem einnig tóku gildi sama dag og má finna helstu ný­mæli nýju laganna í samantekt á vef Sam­göngu­stofu. Meðal breytinga skv. reglugerðinni má nefna að sekt við akstri gegn rauðu ljósi hækkar úr 30 þúsund krónum í 50 þúsund krónur og að sektir við ölvunarakstri eru hertar.

RARIK mun koma til móts við þá viðskiptavini sem urðu fyrir rafmagnsleysi í hinu fordæmalausa illviðri sem brast á 10. desember sl. en hægt er að sækja um bætur vegna keyrslu varaaflsvéla og tjóns á búnaði á heimasíðu fyrirtækisins.

Samgöngu- og sveitarstjórnarráðherra staðfesti á dögunum tillögur valnefndar um verkefnastyrki vegna fjarvinnslustöðva sem veittir eru á grundvelli stefnumótandi byggðaáætlunar fyrir árin 2018-2024. Þrjú verkefni hlutu styrk og var verkefni Rannsóknarseturs Háskóla Íslands á Norðurlandi vestra, Gagnagrunnur sáttanefndarbóka, eitt þeirra.

Búið er að tryggja áframhaldandi starfssemi Atlantic Leather á Sauðárkróki en nýtt félag hefur keypt hluta þrotabúsins. Einungis verða fiskroð sútuð í hinu nýja fyrirtæki og mun þá gærusútun á Sauðárkróki og jafnvel landinu öllu heyra sögunni til. Gestastofa sútarans, sem hefur verið aðdráttarafl ferðamanna um árabil, verður flutt annað.

Rúnar Guðmundsson hefur verið ráðinn í starf skipulagsfulltrúa hjá Sveitarfélaginu Skagafirði og mun taka til starfa á fyrstu mánuðum ársins. Rúnar tekur við embættinu af Jóni Erni Berndsen sem gegn hefur starfinu frá 1. desember sl. og þar áður embætti skipulags- og byggingarfulltrúa hjá sveitarfélaginu til fjölda ára.

Eins og undanfarin ár er rýnt inn í framtíðina og reynt að sjá fyrir óorðna hluti hér í Feyki. Í mörg ár hafa spákonurnar í Spákonuhofinu á Skagaströnd rýnt í spil og rúnir en að þessu sinni gátu þær ekki orðið við beiðni blaðsins. Var þá leitað á önnur mið og eftir mikla eftirgrennslan náðist samband og samkomulag við einstakling sem vill ekki láta kalla sig spámann eða völvu heldu seiðskratta. Aðspurður um þá nafngift sagði hann að það hæfði sér best enda bruggaður seiður við þennan gjörning. Ekki vildi viðkomandi koma fram undir nafni og munum við verða við því.