Skagafjörður

Varnarleikur var í hávegum hafður í Garðabænum í gærkvöldi þar sem topplið Stjörnunnar tók á móti Tindastólsmönnum. Stjörnumenn náðu yfirhöndinni strax í byrjun og slæmur kafli Tindastóls undir lok fyrri hálfleiks var dýrkeyptur þrátt fyrir ágæt áhlaup strákanna í síðari hálfleik. Þeir náðu að hleypa spennu í leikinn undir lokin en gamall Stóll, Urald King, var Garðbæingum dýrmætur síðustu mínútur leiksins og innsiglaði sigur heimamanna með tveimur kunnuglegum hraðaupphlaupstroðslum. Lokatölur voru 73-66.

Margrét Rún Stefánsdóttir á Sauðárkróki er mikið markmannsefni en nýlega var hún kölluð í æfingahóp U15 landsliðsins og er væntanlega að sprikla þar þegar þetta blað kemur út. Hún er af árgangi 2005 og því aðeins 14 ára gömul. Þrátt fyrir ungan aldur var Margréti treyst fyrir því að vera varamarkmaður hjá kvennaliði Tindastóls í Inkassó deildinni, seinni parts sumars, og fékk að spila nokkrar mínútur í leik gegn ÍR undir lok tímabils. Margrét Rún er dóttir Einarínu Einarsdóttur og Stefáns Öxndal Reynissonar og er Íþróttagarpur Feykis að þessu sinni.

Unglingarnir í 7.-10. bekk Varmahlíðarskóla frumsýna söngleikinn Slappaðu af! eftir Felix Bergsson í dag kl. 19 en seinni sýningin verður á morgun laugardag kl. 15:00 en þá verður veislukaffi í Varmahlíðarskóla að lokinni sýningu. Sú sýning kemur í stað áður fyrirhugaðrar fimmtudagssýningar. Leikstjórar eru þau Íris Olga Lúðvíksdóttir og Trostan Agnarsson.

Glöggir lesendur Sjónhornsins veittu því eftirtekt að dagsetningu vantaði í auglýsingu um ljóðakvöld sem verður haldið í Gránu, Aðalgötu 21 á Sauðárkróki, nk. sunnudagskvöld kl. 20:00. Fram koma Ingunn Snædal, Gísli Þór Ólafsson, Eyþór Árnason og Sigurður Hansen sem lesa munu upp eigin ljóð og segja frá sínum skáldskap. Húsið opnar 19:30. Aðgangseyrir er 1500 krónur og miðar eingöngu seldir við innganginn.

Framhaldsaðalfundur knattspyrnudeildar Tindastóls fór fram í gærkvöldi án þess að næðist að mynda nýja stjórn eins og vonast hafði verið eftir en leit hefur staðið að frambærilegum stjórnarmönnum frá aðalfundi 14. nóvember sl. Þrír úr fráfarandi stjórn og unglingaráði munu mynda bráðabirgðastjórn þangað til nýtt fólk fæst í verkið.

Framlög ríkisins til Heilsugæslu höfuðborgarsvæðisins jukust um 24% á árabilinu 2017 – 2020, eftir því sem fram kemur á vef stjórnarráðsins. Aukningin til Landspítala nam um 12% á sama tímabili, 8% til Sjúkrahússins á Akureyri og 10% að meðaltali til heilbrigðisstofnananna sex sem starfa um allt land.

Skíðakonan skagfirska, María Finnbogadóttir, A-landsliðskona í alpagreinum, gerði það gott í gær þegar hún sigraði í svigi á ungverska meistaramótinu fyrir 16-20 ára keppendur. Mótið er haldið í St. Lambrecht í Austurríki.

Ingi Vífill Guðmundsson, hefur verið ráðinn á starfsstöð Nýsköpunarmiðstöðvar Íslands á Sauðárkróki. Sagt er frá því á heimasíðu Sveitarfélagsins Skagafjarðar að Ingi Vífill hafi reynslu á rekstri sprotafyrirtæka og nýsköpunar á sviði markaðs- og kynningarmála og sé með fjölbreytta menntun og er meðal annars grafískur hönnuður.

Þann 1. janúar sl. lækkuðu almenn komugjöld í heilsugæslu úr 1.200 krónum í 700 krónur og á sama tíma hækkaði gjaldskrá vegna annarrar heilbrigðisþjónustu um 2,5%. Bótafjárhæðir slysatrygginga almannatrygginga og dagpeningar sjúkratryggðra hækkuðu um 3,2%.

Ferðaþjónustan á landinu öllu kemur saman árlega á Mannamótum Markaðsstofa landshlutanna. Sýningin hefur það að markmiði að efla tengsl á milli fyrirtækja á höfuðborgarsvæðinu og fyrirtækja allra landshluta auk þess að kynna vel nýjungar á svæðunum og auka sölumöguleika. Þennan frábæra dag er auðvelt að sjá hvers vegna erlendir ferðamenn flykkjast til landsins og hvers vegna áhuginn á Íslandi eykst ár frá ári. Kraftur og sköpunargleði einkennir fólkið í ferðaþjónustu sem sér tækifæri hvert sem litið er. Ótrúlegt er að sjá fjölbreytni og sérstöðu þeirrar þjónustu sem í boði er.