Skagafjörður

Stjórn Samtaka sveitarfélaga á Norðurlandi vestra fundaði nýlega með nokkrum ráðherrum um málefni landshlutans. Þórdís Kolbrún Reykfjörð Gylfadóttir, ráðherra ferðamála-, iðnaðar- og nýsköpunar, tók á móti hópnum í sínu ráðuneyti en því næst hélt hópurinn í Stjórnarráðið þar sem Katrín Jakobsdóttir, forsætisráðherra, tók á móti stjórnarmönnum. Loks hitti hópurinn Sigurð Inga Jóhannsson, ráðherra samgöngu- og sveitarstjórnarmála.

Sundlaugin í Varmahlíð fagnaði nýlega 80 ára vígsluafmæli og var þess minnst með veglegri veislu fimmtudaginn 29. ágúst. Samhliða afmælisveislunni var efnt til Grettissunds en í því var fyrst keppt á vígsluhátíð sundlaugarinnar fyrir 80 árum síðan.

Í liðinni viku fékk ég loks svör við fyrirspurnum mínum varðandi kostnað sveitarfélagins við endurbætur húsanna við Aðalgötu 21. Þar kemur fram að heildarkostnaður við framkvæmdir húsanna er nú tæpar 318 milljónir króna. Verkið er því komið 118 milljónir fram yfir upphaflega áætlun sem hljóðaði upp á 200 milljónir króna og er þó enn ekki lokið. Stærsti kostnaðarliðurinn eru iðnaðarmenn á tímakaupi, ásamt kostnaði við uppihald þeirra hér þar sem þeir komu annarsstaðar frá.

Matgæðingur vikunnar í 34. tbl. Feykis árið 2017 var Jón Ívar Hermannsson sem starfar sem tölvunarfræðingur hjá TM Software, dótturfélagi Nýherja og vinnur hann þar við ýmis hugbúnaðarverkefni. Jón Ívar er búsettur í Reykjavík en er þó alltaf með annan fótinn á Hvammstanga en þar er hann uppalinn. Jón segist lengi hafa haft áhuga á matargerð, ekki síst ef maturinn er frá framandi löndum, og hefur hann m.a. sótt námskeið í taílenskri og indverskri matargerð.

Á Félagsleikum Fljótamanna, sem haldnir voru um verslunarmannahelgina, var efnt til ýmissa viðburða, m.a. morgunverðarfundar um félagssögu Fljóta. Meðal þeirra sem þar töluðu var Örlygur Kristfinnsson, oft kenndur við Síldarminjasafnið á Siglufirði. Erindi hans nefndist Bakkabræður og áhrif þeirra í nútímanum. Þar fjallaði hann um þá bræður sem Fljótamenn og sagði nokkrar sögur af mögulegum afkomendum þeirra. Í pokahorninu geymdi hann magnaða sögu sem fáir, ef nokkur í salnum, hafði áður heyrt. Þar segir frá því að Bakkabræður hafi verið frumkvöðlar í saltfiskviðskiptum við Spánverja og annað óvænt leynist í sögunni.

Eins og sagt hefur verið frá í Feyki hófu Fljótamenn í sumar söfnun fyrir leiktækjum fyrir börn og unglinga sveitarinnar. Var ákveðið að byrja á að safna fyrir ærslabelg og fór söfnunin vel af stað og er söfnunarfé nú komið rétt yfir eina milljón króna.

„Aðkeypt önnur vinna“ er langstærsti útgjaldaliður vegna framkvæmda við byggingar við Aðalgötu 21 á Sauðárkróki alls 188.917.412,30 kr. af þeim tæpu 318 milljónum sem verkið hefur kostað til þessa. „Önnur vörukaup“ hljóðuðu upp á 69.252.845,22 og er þar með næst stærsti liður útgjaldanna. Þetta kemur fram í svörum byggðarráðs Svf. Skagafjarðar til Álfhildar Leifsdóttur, VG og óháðra, sem lagði fram fyrirspurn í tíu liðum er varðaði lagfæringar á húsnæði við Aðalgötu 21 og rekstri sýndarveruleikaseturs 1238.

Sveitarfélög geta nú kynnt sér hversu hár sameiningarstyrkur kæmi frá ríkinu ef samþykkt yrði að sameinast öðru sveitarfélagi. Samgöngu- og sveitarstjórnarráðuneytið hefur nú í fyrsta sinn birt í samráðsgátt tillögur að nýjum reglum um styrki Jöfnunarsjóðs sveitarfélaga sem ætlaðir eru til að greiða fyrir sameiningu og fengju sveitarfélögin fasta upphæð óháð því hverjum þau sameinast. Fjallað var um nýju reglurnar í hádegisfréttum RÚV í gær. Samkvæmt reglunum fengju þau sveitarfélög í Austur-Húnavatnssýslu sem nú eiga í sameiningarviðræðum, Húnavatnshreppur, Blönduósbær, Skagabyggð og Skagaströnd, samtals 705 milljónir króna í sameiningarstyrk ef af sameiningu yrði.

„Ég veit ekki betur en að lögreglan sé búin að rannsaka málið og senda það frá sér. Þá á eftir að taka um það ákvörðun hvort saksóknari haldi málinu til streitu eða felli niður,“ segir Þröstur H. Erlingsson bóndi í Birkihlíð í Skagafirði sem kærður var, ásamt Sveini Margeirssyni fv. forstjóra MATÍS, fyrir dreifingu og sölu á heimaslátruðu lambakjöti á bændamarkaði á Hofsósi á síðasta ári.

Göngur og réttir eru nú framundan, tími þar sem mikið er um að vera og í nógu að snúast í sveitum landsins. Fyrstu réttirnar á Norðurlandi vestra eru afstaðnar því segja má að bændur í Blöndudal hafi tekið forskot á sæluna með því að rétta í Rugludalsrétt sl. laugardag og einnig var réttað í Hvammsrétt og í Beinakeldurétt á sunnudag. Um næstu helgi verður svo smalað víða um sveitir og réttað á fjölmörgum stöðum á svæðinu, bæði þá og um næstu helgi á eftir.