V-Húnavatnssýsla

Skagafjörður auglýsti eftir nýjum umsjónarmanni með Málmey á Skagafirði á haustdögum. Málmey er stærsta eyjan á Skagafirði, um 160 ha að stærð. Á fund Byggðarráðs komu fulltrúar úr hópi þriggja umsækjenda um umsjónarmannastöðu um Málmey á Skagafirði, sem byggðarráð boðaði til að veita nánari upplýsingar um umsóknir hlutaðeigandi.

Feykir sagði fyrir skemmstu frá skemmtilegu námskeiði í grúski sem framundan væri hjá Héraðsbókasafninu og Héraðsskjalasafninu á Sauðárkróki. Gaman er að segja frá því að frábær þátttaka er á þessu bráðsniðuga námskeiði sem söfnin standa fyrir og hófst í gær. Alls eru 26 þátttakendur skráðir.

Sveitarstjórn Húnaþings vestra samþykkti á 377. fundi sínum þann 11. janúar 2024 framlengingu heimildar til niðurfellingar gatnagerðagjalda nokkurra íbúðarhúsalóða á Hvammstanga og Laugarbakka.

Á vefsíðu Sveitarfélags Skagastrandar kemur fram að þann 15. janúar 2024 var undirritaður verksamningur við Borgarverk ehf um endurbyggingu Ásgarðs.

Húnahornið segir frá því að byggðarráð Húnaþings vestra hafi lýst yfir ánægju með að niðurstöðu dómsmáls Reykjavíkurborgar á hendur Jöfnunarsjóði sveitarfélaga, vegna úthlutana úr sjóðnum, hafi verið áfrýjað Enda leiði niðurstaða dómsins, standi hann óbreyttur, til skerðingar framlaga allra sveitarfélaga í landinu. Með dómi Héraðsdóms Reykjavíkur í síðasta mánuði var íslenska ríkið dæmt til að greiða Reykjavíkurborg tæpa 3,4 milljarða ásamt vöxtum.

Í síðastliðnum desember var bætt í grjótgarðinn meðfram Hafnarbraut við höfnina á Hvammstanga. Þetta mun vera liður í framkvæmd sem fékk styrk frá Framkvæmdarsjóði ferðamannastaða en verkið felur í sér að gera öruggan göngustíg, með mögulegum pollum og köðlum, frá höfninni áleiðis að Selasetri Íslands. Þetta er gert til að tryggja öryggi og bæta upplifun ferðamanna jafnt sem heimafólksen grjótgarðurinn er fyrsta skrefið í því verki.

Vinna við lagningu neysluvatnslagnar frá Hvammstanga að Laugarbakka til að leysa vatnsskort sem þar hefur ítrekað verið að koma upp hefur staðið yfir frá því í sumar. Í frétt á vef Húnaþings vestra er sagt frá því að nú hefur vatni loks verið hleypt á lögnina.

Í tilkynningu frá Skagafjarðarveitum beina þeir þeim tilmælum til notenda hitaveitu á Sauðárkróki að fara sparlega með heita vatnið. Nú er mjög kalt og mikil vindkæling og útlit fyrir kulda áfram næstu daga og þess verður vart á stöðu heita vatnsins.

RARIK var með níu jarðstrengsverkefni með samtals 123 km af strengjum á Norðurlandi á síðasta ári en þetta kemur fram í yfirferð um verkefni ársins 2023 á heimasíðu RARIK. Sjö verkefnum er þegar lokið en þar af voru þrjú hér á Norðurlandi vestra; í Hrútafirði, Miðfirði og Fitjárdal.

Eftir stillt veður síðustu daga snýr veturkonungur aðeins upp á sig í nótt og á morgun. Spáð er 10-18 m/sek á morgun og ef nebba er stungið út fyrir dyrakarm má berlega finna að blástur er þegar hafinn. Norðanáttinni fylgir lítilsháttar snjókoma á svæðinu en bæði vindur og éljagangur gengur niður á miðvikudagsmorgni.