V-Húnavatnssýsla

Í matvöruverslunum hefur brauðmeti ýmiskonar verið boðið til sölu óinnpakkað í sjálfsafgreiðslu og flokkast sem „matvæli tilbúin til neyslu“ þ.e. matvæli sem fá enga meðhöndlun fyrir neyslu s.s. hitun eða skolun. Mikilvægt þykir að meðhöndla þessi matvæli með það í huga og verja fyrir mengun eða hindra að þau spillist á einhvern hátt.

Fulltrúar frá Viðlagatryggingu Íslands (VTÍ ) heimsóttu sveitarfélög á Norðurlandi vestra á dögunum og er heimsóknin liður í átaki stofnunarinnar til að bæta þekkingu á hlutverki hennar og skráningu opinberra mannvirkja í eigu sveitarfélaganna sem vátryggð eru hjá VTÍ.

Þessar duglegu stelpur á Hvammstanga söfnuðu á dögunum 13.573 kr til styrktar ABC barnahjálp. Þetta eru þær Katla Anný, Bríet Ingibjörg, Arna Ísabella og Steinunn Daníela. ABC barnahjálp er íslenskt hjálparstarf, stofnað árið 1988. Starfið snýst um það að gefa fátækum börnum tækifæri til menntunar og hjálpa götubörnum til nýs lífs með því að veita þeim heimili og menntun.

Þá er bolludagurinn á morgun og eflaust margir sem taka forskot á sæluna og fá sér bollu í dag, jafnvel kannski í gær og fyrradag líka! Margir eiga eflaust sínar föstu bolludagsuppskriftir og ganga því einbeittir til verks en alltaf eru einhverjir sem eru að gera hlutina í fyrsta sinn, nú eða jafnvel brydda upp á nýjungum. Hér er leitað í uppskriftasafn Eldhússystra, eins og stundum áður, og hér fylgir girnileg uppskrift af sænskum rjómabollum með marsipanfyllingu. Eldhússystirin Kristín Rannveig Snorradóttir hefur orðið: "

Kolbrún Birna Jökulrós og Þórkatla Björt Sumarrós voru matgæðingar vikunnar í 8. tölublaði Feykis árið 2015. Þær buðu upp á Mexíkóskt lasagna og Tagliatelle-Kjúkling og Toblerone-ís í eftirrétt. „Okkur systrunum finnst rosalega gaman að dúlla okkur í eldhúsinu og finnst okkur báðum mjög gaman að því að elda og baka. Við gleðjum stundum foreldra okkar þegar þeir koma úr fjósinu og þá erum við búnar að skella einhverju einföldu í eldfast mót og í ofninn, þá erum við langflottastar,“ segja Kolbrún Birna Jökulrós og Þórkatla Björt Sumarrós Þrastardætur, sælkerar vikunnar frá Birkihlíð í Skagafirði.

Tónleikaröð norðlenskra kvenna í tónlist sem tileinkuð var lofti, sjó og landi sló heldur betur í gegn síðastliðið haust. Tónlistarkonurnar fylltu hvert húsið á fætur öðru og hlutu mikið lof fyrir skemmtilega og einlæga nálgun á lögum tengdum sjómennsku, sveitarómantík og hernámsárunum. Laugardaginn 25. febrúar kl. 20.00 munu tónlistarkonurnar stíga á svið í Hamraborg í Menningarhúsinu Hofi og flytja brot af því besta úr tónleikaröðinni. Sjómannavalsinn, Sveitaball og Það er draumur að vera með dáta eru meðal þeirra laga sem munu hljóma.

Búist er við foráttuveðri um land allt í dag og er nú þegar farið að hvessa á sunnanverðu landinu. Spár gera ráð fyrir vaxandi suðaustanátt með snjókomu og síðar rigningu um landið suðvestanvert og stormi eða roki (20-28 m/s) víða síðdegis. Veðrið ætti að ná hámarki fljótlega eftir hádegi suðvestanlands en seinnipartinn í öðrum landshlutum. Milli kl. 16 og 17 er reiknað með að fari að lægja og draga úr vætu, fyrst á Reykjanesi og fljótlega eftir miðnætti muni skilin ganga norðaustur af landinu.

Fyrsta keppniskvöld KS deildarinnar fór fram í gærkvöldi í reiðhöllinni á Sauðárkróki og var keppt í fjórgangi. Artemisia Bertus og Korgur frá Ingólfshvoli stóðu uppi sem sigurvegarar eftir að hafa leitt forkeppnina með einkunnina 7,23. Í úrslitum hlutu þau einkunnina 7,50 sem dugði til sigurs eins og áður sagði. Þetta er annað árið í röð sem þau sigra þessa grein.

Síðastliðin þrjú ár hefur fólk allstaðar að úr heiminum ferðast til norðvestur Íslands á sveitabæinn Kollafoss í Húnaþingi vestra með tvennt í huga; að klappa lömbum og búa til leiki. Í ár verður þeim sið haldið áfram, þar sem Isolation Game Jam leikjasmiðjan verður haldin 7. til 11. júní næstkomandi. Miðasala opnar á heimasíðu smiðjunnar fyrsta mars næstkomandi.

Björgunarsveitarmenn verða seint kallaðir eiginhagsmunaseggir enda öll sú vinna sem menn og konur leggja í þar til gerð félög sjálfboðaliðastörf og oftar en ekki er mikið álag á þeim við að koma náunganum til hjálpar í hvaða veðri og aðstæðum sem er.