V-Húnavatnssýsla

Fyrirlestraröð Byggðasafns Húnvetninga og Strandamanna, Með sunnudagskaffinu, heldur áfram á þessu hausti. Næst mun sagnfræðingurinn Kristín Svava Tómasdóttir halda fyrirlesturinn „Stund klámsins“. Hún vinnur um þessar mundir að bók um sögu kláms á Íslandi, með sérstakri áherslu á 7. og 8. áratug 20. aldar, en fyrirhugað er að bókin komi út árið 2017.

Í skýrslu Íslandsbanka um íbúðamarkaðinn, sem Íslandsbanki birti á mánudag, er fjallað um íbúðamarkaðinn í hverjum landhluta. Samkvæmt skýrslunni er íbúðaverð hæst Sveitarfélaginu Skagafirði, en þar hefur fermetraverðið verið að meðaltali 162 þúsund krónur fyrstu níu mánuði þessa árs. Þá eiga nærri 60% af íbúðaviðskiptum í landshlutanum sér stað í sveitarfélaginu.

Þann 14. október s.l. voru haldnir kveðjutónleikar á Sjávarborg á Hvammstanga. Þar voru þau Jan Wölke og Madeline Tsoj kvödd með stæl, en þau dvöldu hér á Íslandi frá vormánuðum og fram í október til þess að vinna að heimildarmynd.

Byggðaráð Húnaþings vestra tók á fundi sínum í síðustu viku undir áhyggju lögreglumanna á landshlutanum af stöðu löggæslumála í umdæminu. Fram kom að samkvæmt upplýsingum frá Pétri Björnssyni, formanni Lögreglufélags Norðurlands vestra, eru framundan námskeið hjá lögreglumönnum sem haldin eru í Reykjavík. Vegna fjárhagsstöðu eru menn settir á námskeiðin á þeim tíma sem þeir eiga að vera að vinna svo ekki þurfi að greiða þeim yfirvinnu. Þar af leiðandi er látið vanta á vaktirnar á meðan.

Fjölbrautaskóli Norðurlands vestra mun bjóða upp á nám í húsasmíði og húsgagnasmíði með vinnu á vorönn 2017, ef næg þátttaka fæst. Námið tekur fjórar annir þar sem kennt er fimm helgar fyrstu þrjár annirnar og sex helgar þá fjórðu. Námið er ætlað nemendum 20 ára og eldri, sem hafa reynslu af byggingavinnu.

Athygli er vakin á því að í dag, fimmtudaginn 20. október og fimmtudaginn 27. október verður opið til kl. 19:00 á skrifstofum sýslumanns á Sauðárkróki og Blönduósi vegna utan kjörfundar atkvæðagreiðslu í alþingiskosningunum.

Sveitarstjórn Húnaþings vestra fagnar því að í nýsamþykktri samgönguáætlun 2015-2018 sé gert ráð fyrir framkvæmdum við brúarstæði Tjarnarár á Vatnsnesi, enda hafi framkvæmdin verið baráttumál um árabil. Hún sé þó ekki nægileg til að laga ástand vegarins og kemur ekki í veg fyrir hættuástand né styttir hún ferðatíma skólabarna í skóla.

Stjórn Samtaka stofnfjárhafa í fyrrum Sparisjóði Húnaþings og Stranda (SSPHUN) hefur sent félagsmönnum sínum bréf þar sem fram kemur tillaga um að leggja samtökin niður. Samtökin hafa ekki verið starfandi í um fjögur ár og ekki líkur á að farið verði af stað í frekari málshöfðun vegna stofnfjáraukningar í SPHÚN.

Atvinnuráðgjöf hefur verið í boði á Norðurlandi vestra síðan árið 1982. Það eru sveitarfélögin og byggðastofnun sem kosta starfsemina og hjá SSNV starfa í dag sex atvinnuráðgjafar í 5,5 stöðugildum. Veita þeir ráðgjöf á sviði atvinnuuppbyggingar, nýsköpunar og menningarmála til einstaklinga, fyrirtækja og sveitarfélaga.

BioPol ehf á Skagaströnd hefur nú auglýst eftir matvælafræðingi til þess að hafa umsjón með matarsmiðju sem mun rísa í tengslum við rannsóknastofu félagsins. Hlutverk matvælafræðingsins verður fyrst og fremst að veita nauðynlega sérfræðiráðgjöf og aðstoða frumvöðla við að þróa vörur sínar í markaðshæft form. Jafnframt mun viðkomandi aðili aðstoða við uppsetningu gæðahandbóka og veita nauðsynlega ráðgjöf er varðar kröfur hins opinbera varðandi matvælaframleiðslu.