V-Húnavatnssýsla

Búast má við norðaustan hvassviðri eða stormi og hríðarbyl á öllu norðanverðu landinu í dag með takmörkuðu skyggni, hvassast er á NV-verðu landinu. Hálka eða hálkublettir eru á flestum leiðum á Norðurlandi vestra.

Karlakórinn Lóuþrælar heldur jólatónleika í Barnaskólanum á Borðeyri, þriðjudaginn 15. desember, kl. 20:30 og í Félagsheimilinu Hvammstanga, miðvikudaginn 16. desember, kl. 20:30. Á söngskránni eru jóla- og aðventulög, íslensk og erlend. Enginn aðgangseyrir.

Í síðustu netkönnun Feykis voru talin til nokkur mis sígild jólalög en spurt var hvert laganna kæmi þeim sem svaraði mest í jólagírinn. Það er skemmst frá því að segja að það var jólasálmurinn Ó helga nótt sem vann netkosninguna með miklum yfirburðum, hlaut 30% atkvæða en hægt var að velja á milli níu svara.

Nú er eða hlýna á landinu úr vestri með snjókomu, slyddu og síðar rigningu. Samkvæmt vef Vegagerðarinnar er hætt við að flughált verði við þessi umskipti að loknum frostakafla, þegar blotnar á klaka og þjappaðan snjó sem fyrir er. Hálka er á flestum vegum á Norðurlandi en sumstaðar snjóþekja, einkum á útvegum.

Líkt og undanfarin ár auglýsir Feykir eftir tilnefningum um mann ársins á Norðurlandi vestra. Tilnefningunni skal koma til Feykis á netfangið feykir@feykir.is í síðasta lagi fyrir miðnætti í kvöld, 14. desember.

Söngdívan Diddú var ekki fyrr búin að yfirgefa Skagafjörð, eftir að hafa sungið á tónleikum með Geirmundi Valtýssyni, en stormur sem kenndur hefur við hana gerði mikinn usla í Firðinum. Þrátt fyrir að þarna sé um tilviljun að ræða er ljóst að veðrið sem gekk yfir landið allt sl. mánudag og náði mestum hæðum á Suðurlandi og í Skagafirði, er eitt hið versta í 25 ár. Afleiðingarnar voru þær að umtalsverðar skemmdir urðu á mörgum íbúðar og útihúsum í Skagafirði, þakplötur losnuðu og lausamunir fuku.

Um næstu áramót munu margir fjölskyldumeðlimir á íslenskum heimilum fyllast óöryggi og skelfingu, þegar mannfólkið kveikir í skoteldum sér til skemmtunar. Þetta eru gæludýrin og hestarnir. Það er í flestum tilfellum hægt að laga eða fyrirbyggja hræðslu við hljóð fyrirfram. Þetta er gert með því að venja þau á hljóðin, svo þau átti sig á að ekkert hættulegt sé á ferð.

Í sumar og haust hafa staðið yfir miklar framkvæmdir hjá Hitaveitu Húnaþings vestra, í Miðfirði og Hrútafirði. Verklegum framkvæmdum hitaveitunnar er nú að mestu lokið og verður fyrsti áfangi tekinn formlega í notkun þriðjudaginn 15. desember nk. kl. 14:30.

Íbúðalánasjóður hefur ákveðið að setja um 500 íbúðir úr eigna­safni sjóðsins í opið sölu­ferli. Um er að ræða þriðjung þeirra íbúða sem nú eru í eigu sjóðsins eða 504 íbúðir alls. Íbúðirnar eru um land allt og verða boðnar til sölu í 15 eigna­söfnum. Veru­legur hluti íbúðanna er í útleigu en hluti eign­anna þarfnast lagfær­ingar.

Hópur Vestur-Húnvetninga sem staðið hafa að tónleikahaldi fyrir jólin undanfarin ár hélt jólatónleika í Ásbyrgi síðastliðinn fimmtudag. Hrafnhildur Ýr Víglundsdóttir, keppandi í Voice Ísland og ein af söngkonunum á tónleikunum segir að vel hafi tekist til og mæting verið góð að venju.