A-Húnavatnssýsla

Það styttist í tónleika Jólahúna sem fara fram í Félagsheimilinu á Blönduósi sunnudaginn 15. desember og hefjast á slaginu sex. Það er að mestu sami hópurinn sem kemur fram núna og var í fyrra en að sögn Árnýjar Bjarkar Brynjólfsdóttur, yfirjólahúns, er algjörlega frábær stemning í hópnum, „æfingarnar ganga eins og í sögu og einkennast fyrst og fremst af hlátri, samvinnu og góðri vináttu. Það er hreint út sagt ómetanlegt að hafa þau með sér í liði.“ Veðrið hefur þó aðeins haldið hópnum á tánum sem er kannski ekki skrítið miðað við árstíma, en gular og appelsínugular veðurviðvaranir hafa heiðrað hópinn með nærveru sinni á æfingum, aðeins raskað tímasetningum og ferðaplönum svo nú er komin mikil spenna í hópinn að sjá veðurspá fyrir tónleikadaginn sjálfan.

Laugardaginn 7. desember var haldinn á Hólum opinn fyrirlestur á vegum Ferðamáladeildar um fornleifarannsóknir þær sem deildin hefur, ásamt UMass Boston, staðið fyrir í Hjaltadal sl. fjögur ár. Fyrirlesturinn var vel sóttur en þar voru kynntar frumniðurstöður rannsóknanna sem hafa miðað að því að kanna aldur og þróun elstu byggðar í nágrenni Hólastóls, segir á Facebooksíðu Háskólans á Hólum.

Það eru ennþá til nokkrir miðar á tónleikana sem er kl. 17:00 á Jólin Heima sem eru nú haldnir í fimmta sinn. Ungt og hæfileikaríkt tónlistarfólk í Skagafirði blæs til jólatónleika, viðtökurnar hafa verið frábærar og þau hafa fyllt Miðgarð síðastliðin ár. Húsið opnar kl. 16:00 fyrir tónleikana sem byrja kl. 17:00 og svo opnar húsið kl. 20:00 fyrir tónleikana sem byrja á slaginu 21:00. Fram kemur svipaður hópur af hljóðfæraleikurum og söngfólki og undanfarin ár. Tónleikarnir eru styrktir af Uppbyggingarsjóði Norðurlands vestra og auk þess styrkja FISK, Tengill og KS verkefnið. Almennt verð á miðum eru litlar kr. 7.990.

Í tilefni af 50 ára afmæli Lionsklúbbsins Höfða á Hofsósi verður opið hús sunnudaginn 15. desember í Höfðaborg frá klukkan 14 til 16. Boðið verður upp á vöfflur, kaffi og kakó og því um að gera að kíkja við og taka spjallið við höfðingjana í klúbbnum.

Matgæðingar vikunnar í tbl 32 í fyrra voru Kristjana Sigríður Pálsdóttir og Óskar Ingi Magnússon. Kristjana og Óskar eiga þrjú börn; Nadíu Lind 12 ára, Rúrik Dalmann 8 ára og Bríeti Völu 2 árs. Kristjana er fædd og uppalin í Reykjavík og Óskar er úr Hegranesinu en þau eru búsett á Króknum. Kristjana vinnur í FNV en Óskar vinnur hjá Vörumiðlun á Króknum. „Við erum miklir matgæðingar og elskum að prufa eitthvað nýtt," segir Kristjana.

Það eru aðeins 11 dagar til jóla og já það er kominn föstudagur mér til mikillar gleði.... eða kannski ekki! Í dag er nefnilega föstudagurinn 13. sem á það til að koma upp einu sinni til þrisvar á ári. Talan 13 er fyrir suma óhappatala og þá sérstaklega ef þessi mánaðardagur ber upp á föstudegi. Þessi hjátrú er meðal útbreiddustu hjátrúa í heimi og kallast paraskevidekatriaphobia og er tengd óttanum við töluna þrettán eða triskaidekaphobia og setti sálfræðingurinn Donald Dossey þetta hugtak fram. Ég mæli því með að vera róleg/ur í dag og ekki fara að hendast upp í stiga (gætir dottið) eða baka (gætir brennt þig)... við skulum bara reyna að njóta samverunnar með fólkinu okkar í rólegheitum:) Getum bara verið dugleg um helgina, er það ekki annars?

Ákvörðun sveitarstjórnar Húnabyggðar um að bíða með uppbyggingu nýs leikskóla var ekki léttvæg og var hún tekin í ljósi þess að sveitarfélagið hefur ekki fjárhagslega burði til að fjármagna verkefnið, sem hefði krafist lántöku upp á 536 milljónir. Þetta kemur fram í bókun sveitarstjórnar frá fundi hennar í gær. Fræðslunefnd Húnabyggðar hafði áður lýst yfir vonbrigðum með ákvörðunina og sagt að mikil vinna hafi verið lögð í undirbúning, þarfagreiningu og útboð, segir á huni.is

Laugardaginn 14. desember kl. 15:00 verður hinn hefðbundni Upplestur á aðventu í Heimilisiðnaðarsafninu.

Skagfirski kammerkórinn býður til jólatónleika í Hóladómkirkju sunnudagskvöldið 15.desember kl.20:00 og Blönduóskirkju þriðjudaginn 17.desember einnig klukkan 20:00. Kammerkórinn heldur árlega jólatónleika.

Jú við förum í rétta dressið - peppum okkur upp og mætum í Síkið. Meistaraflokkur karla tekur á móti Njarðvík og byrjar leikurinn á slaginu 19:15. Ef þú átt ekkert til að fara í þá verður Tindastólsbúðin opin og nú með keppnistreyjur til sölu svo verða að sjálfsögðu hamborgarar á grillinu frá kl. 18:30.