A-Húnavatnssýsla

Brunavarnir A-Hún., leitar að slökkviliðsstjóra og hefur starfið verið auglýst laust til umsóknar. Meðal verkefna slökkviliðsstjóra eru m.a. rekstur slökkviliðs, menntun og æfingar slökkviliðsmanna, ásamt eldvarnareftirliti sveitarfélaganna og öðru því er snýr að rekstri slökkviliðs A-Hún. Um er að ræða hlutastarf, samkvæmt nánara samkomulagi 60% (-100%) og verður leitast við að finna starf á móti, sem fellur að starfskyldum slökkviliðsstjóra, samhliða ráðningunni, ef við á.

Sveitarfélagið Skagaströnd hefur látið vinna samantekt um ferðamenn á Skagaströnd árin 2004-2017 og hefur hún verið birt á vef sveitarfélagsins. Skýrsluhöfundur er Rögnvaldur Guðmundsson hjá Rannsóknum og ráðgjöf ferðaþjónstunnar ehf.

Lögreglan á Norðurlandi vestra bendir, á Facebooksíðu sinni, íbúum á slæma veðurspá eftir hádegi í dag og á morgun og bendir fólki á að huga að lausamunum og öðru smálegu. Þá er ekki ólíklegt að færð spillist á heiðum og er því þeim sem hyggja á ferðalög bent á að fylgjast með færð á vegum á upplýsingasíðu Vegagerðarinnar http://www.vegagerdin.is/…/faerd-og-…/nordurland-faerd-kort/ eða í upplýsingasíma Vegagerðarinnar 1777

Markaðsstofa Norðurlands, Rannsóknarmiðstöð ferðamála og Háskólinn á Hólum, undirrituðu sl. mánudag samning sín á milli um rannsóknarverkefni á áfangstaðnum Norðurlandi. Rannsóknin hefur það meginmarkmið að skoða ýmsa þætti sem varða markaðssetningu Norðurlands og þá markhópa sem sækja svæðið heim. Verkefnið er það stærsta sem ráðist hefur verið í hvað rannsóknir á ferðaþjónustu á Norðurlandi snertir og niðurstöðurnar gætu orðið fordæmisgefandi fyrir aðrar rannsóknir í landshlutanum að því er greint er frá á vef Markaðsstofu Norðurlands.

Á síðasta ári var bætt við stöðugildum hjá flestum lögregluembættum um landið til að styrkja skilvirkni lögreglunnar í kynferðisbrotamálum. Þar með var hafin vinna við að hrinda í framkvæmd aðgerðaáætlun um meðferð kynferðisbrota innan réttavörslukerfisins. Sú aðgerðaáætlun felur m.a. í sér að renna styrkari stoðum undir samstarf milli lögreglu og ákæruvalds til að bæta stöðu brotaþola í kynferðisbrotamálum og styrkja réttarstöðu þeirra.

Samtök sveitarfélaga á Norðurlandi vestra taka nú þátt í alþjóðlegu samstarfsverkefni sem nýlega hlaut styrk úr sjóði Norðurslóðaverkefna. Verkefni þessu er ætlað að taka á ýmsum áskorunum sem fyrirtæki á jaðarsvæðum kunna jafnan að glíma við, svo sem smæð markaðar, fjarlægð frá markaði og einangrun. Frá þessu er sagt á vef SSNV.

Jólabasar kvenfélagsins Heklu verður haldinn í Skagabúð sunnudaginn 2. desember kl. 14-17. Þar verður ýmislegt til sölu, s.s. jólakort og pappír, gott úrval af heimaunninni vöru og handverki. Heitt súkkulaði og meðlæti selt á 1.000 kr. fyrir eldri en 12 ára, 500 kr. fyrir 7-12 ára og frítt fyrir 6 ára og yngri.

Næstkomandi fimmtudag, 29. nóvember, munu Þekkingar- og Textílsetur í samstarfi við Nýsköpunarmiðstöð Íslands halda málstofu um ,,Stafrænan textíl – nýsköpun í þróun, hönnun og framleiðslu”. Málstofan verður haldin í Þjóðminjasafni Íslands kl. 9:00 - 11.00. Á dagskrá eru fjölbreytt erindi um möguleika og tækifæri á sviði textíls. Meðal þeirra sem flytja erindi á málþinginu er Anastasia Pistofidou, stofnandi Fab Textiles Research Lab í Barcelona, Katrín Káradóttir, fagstjóri í fatahönnun við Listaháskóla Íslands og Ragnheiður Björk Þórsdóttir, textíllistamaður og sérfræðingur Þekkingar- og Textílsetursins.

Ríflega hundruð manns lögðu leið sína í gamla bæinn á Blönduósi síðastliðinn laugardag en þar fór fram í fyrsta sinn viðburðurinn Notaleg vetrarstund í gamla bænum á Blönduósi. Viðburðurinn var á vegum rekstraraðila á svæðinu sem buðu gestum og gangandi að líta við, kynna sér starfsemina og þiggja léttar veitingar. Söguganga á vegum Katharinu Schneider og Vötnin Angling Service vakti mikla lukku meðal gesta en verkefnið hefur verið í hönnun um nokkurt skeið og er það styrkt af Uppbyggingarsjóði SSNV.

Crecitinfo birti nýlega lista yfir 857 framúrskarandi fyrirtækja á landinu sem eru um 2% íslenskra fyrirtækja. Creditinfo hefur síðastliðin níu ár unnið greiningar á ýmsum þáttum varðandi rekstur og stöðu fyrirtækja á Íslandi og er meginmarkmið greiningarinnar að verðlauna þau fyrirtæki sem standa sig vel og stuðla að bættu viðskiptaumhverfi.