A-Húnavatnssýsla

Textílsetur Íslands efnir til hönnunarsamkeppni þar sem hanna skal peysu með þemanu 100 ára fullveldi Íslands í tilefni þess að á þessu ári er öld liðin frá því að Ísland varð fullvalda ríki. Samkeppnin er haldin í tengslum við Prjónagleði 2018 sem verður á Blönduósi dagana 8.-10. júní í sumar.

„Það er nú ekki komin hefð í matargerð hjá okkur hjónaleysunum (nema þá kannski grilluð samloka með osti) enda einungis þrír mánuðir síðan við fórum að búa sjálf. Við erum því ekki enn búin að finna okkar sameiginlega uppáhaldsmat en við ætlum að gefa lesendum færi á að eiga jafn girnilega páska og við ætlum að eiga. Hvern þessara rétta hefur betri helmingurinn einungis gert einu sinni á ævinni, með margra ára milli bili, en með miklum ágætum þó,“ sagði Heiða Haralds. í 10. tbl Feykis 2016 en hún og Böðvar Friðriksson voru þá matgæðingar vikunnar og buðu upp á uppskriftir að herlegum veisluréttum fyrir páskamatseðilinn en nú styttist í að fólk fari að huga að honum.

Á fundi sveitarstjórnar Skagastrandar í gær, 15. mars, var lagt fyrir erindi frá Ámundakinn ehf. þar sem óskað var eftir að sveitarfélagið keypti 5 milljóna króna hlut í Ámundakinn ehf. á genginu 1,8 og nemur kaupverðið því 9 milljónum króna. Ástæða beiðnarinnar er að þörf er á viðhaldi og endurbótum á húsnæði félagsins að Bogabraut 1 á Skagaströnd sem Samkaup leigir undir verslunarrekstur sinn.

Ungmennasambands Austur-Húnvetninga heldur 101. ársþing sitt á Húnavöllum næstkomandi sunnudag, þann 18. mars, og hefst það klukkan 10:00. Á dagskrá þingsins verða hefðbundin þingmál eins og framlagning skýrslu stjórnar og endurskoðaðra reikninga, skipun þingnefnda og kosningar. Einnig verða Hvatningarverðlaun USAH afhent og kjöri Íþróttamanns USAH lýst.

Húni.is segir frá því að nú hefur verið opnaður upplýsingavefur um sameiningarmál sveitarfélaga í Austur-Húnavatnssýslu þar sem er að finna fréttir og tilkynningar, fundargerðir, minnisblöð og aðrar upplýsingar sem tengjast mögulegri sameiningu sveitarfélaganna fjögurra í Austur- Húnavatnssýslu; Skagastrandar, Skagabyggðar, Blönduósbæjar og Húnavatnshrepps, sem nú eiga í viðræðum um sameiningu. Slóðin á vefinn er:sameining.huni.is.

Síðastliðinn þriðjudag var félagsmönnum í Ferðamálafélagi Austur-Húnavatnssýslu og Félagi ferðaþjónustunnar í Skagafirði boðið á námskeið í Húnaveri þar sem fjallað var um þjóðerni og þjónustu. Á námskeiðinu fjallaði Margrét Reynisdóttir hjá Gerum betur um þjónustu, ólíka menningarheima og hvernig best sé að uppfylla þarfir ólíkra gesta. Margrét hefur sérhæft sig í námskeiðahaldi um þjónustu og hefur meðal annars gefið út fimm bækur um þjónustu og sex íslensk þjónustumyndbönd. Námskeiðið skipulagði Þórdís Rúnarsdóttir, ferðamálafulltrúi Austur-Húnavatnssýslu ásamt Margréti Reynisdóttur.

Nemendum í 9. bekk gefst kostur á að þreyta að nýju könnunarpróf í ensku og íslensku, en margir þeirra tóku próf við óviðunandi aðstæður í liðinni viku. Þátttaka í könnunarprófunum verður valkvæð, samkvæmt ákvörðun Lilju Alfreðsdóttur, mennta- og menningarmálaráðherra. Stjórnendur í hverjum skóla ákveða hvort þeir leggja prófin fyrir nemendur sína í vor eða haust.

Stefán Vagn Stefánsson varaþingmaður Framsóknar í Norðvesturkjördæmi var einn þeirra fimm varamanna er tóku sæti á Alþingi sl. mánudag. Hann kemur í stað Ásmundar Einars Daðasonar, félags - og jafnréttismálaráðherra, sem situr 62. fund kvennanefndar Sameinuðu þjóðanna í New York. Stefán Vagn fær innsýn í nefndarstarf Alþingis sem þingmaður og hefur nú tekið sæti í velferðarnefnd og utanríkismálanefnd Alþingis.

Lögreglan á Norðurlandi vestra hefur verið með öflugt umferðareftirlit undanfarna daga og hafa ökumenn sem ekki fara að lögum verið sektaðir. Lögreglan biður ökumenn að virða hámarkshraða á vegum og sýna tillitssemi í umferðinni. Um liðna helgi voru 101 ökumaður kærður fyrir of hraðan akstur, sá sem hraðast ók var mældur á 151 km hraða á klukkustund í Blönduhlíð í Skagafirði, þar sem hámarkshraði er 90 km á klukkustund.

Fermingarblað Feykis kemur út í dag, stútfullt af skemmtilegu efni sem tengist fermingum og páskahátíðinni beint og óbeint. Einnig er að finna efni sem tengist þessum viðburðum ekki neitt, en er forvitnilegt engu að síður. Blaðið ætti að rata inn á hvert heimili á Norðurlandi vestra áður en vikan er úti sem og til áskrifenda utan svæðisins.